Naokɛa 18:3-12

³Aali zĩkɛnɛ aa laaidↄ kpɛ́piwa, ãma aasuli sↄ̃ ma kúkĩi pↄ́ↄzio ge gbagbakĩi, kɛ́ ampiↄ ń ápiↄ ásu gagao yã́i.

⁴Aali nawá aa laaidↄ kpaaũkpɛwa ń kpɛ́pi zĩo píi, ãma gbɛ̃pãle suli sↄ̃ázio.

⁵Laaidↄa ma kúkĩi ń gbagbakĩiowa gↄ̃̀ á yã́ ũɛ, kɛ́ másu pↄkũmabↄbↄ Isailiↄwa lↄo yã́i.

⁶Mámɛ ma á Levii deeↄ sɛ̀ Isailiↄ guu, ma ń dílɛɛ́ aaↄ dɛ ma zĩkɛnaↄ ũ, aaↄ kpaaũkpɛ zĩ kɛ.

⁷Mpi ń n nɛ́ↄ ámɛ á sa'ozĩ kɛ gbagbakĩi ń pↄ́ pↄ́ kú zwã̀akpɛuↄ yã́ musu. Málɛ sa'ozĩ naɛ́ á ↄzĩ gba ũɛ. Tó gbɛ̃pãle sↄ̃̀i, à gàɛ.

⁸Dii ò Aalonaɛ: Ma pↄ́ pↄ́ wì ma gba zĩ nànɛ n ↄzĩɛ. Ma sa pↄ́ Isailiↄ ì oa kpàmaɛ ń n nɛ́ↄ á baa ũ e gↄↄpii.

⁹Ma pↄ́ pↄ́ i tɛ́kũoↄá n pↄ́ɛ. Pↄ́ pↄ́ wa ma gbaↄ píi, pↄ́wɛntin nò, duun awakpabↄn nò, tàae fĩabobↄn nò, n pↄ́ɛ ń n nɛ́ↄ.

¹⁰Á gↄ̃ɛↄ píi í ble gu pↄ́ a kua adoau, íↄ dↄ̃ kɛ́ ma pↄ́ɛ.

¹¹Kɛ́ beeá n pↄ́ɛ lↄ: Sa pↄ́ wì a pↄ́ mↄmɛɛ, Isailiↄ lí ma gba. Ma n gbaɛ, á baan we gↄↄpii, mpi ń n gbɛ̃́ↄ, gↄ̃ɛↄ ń nↄɛↄ. N bɛ gbɛ̃́ pↄ́ i gbãlɛo píi aàli ble.

¹²Nísi maa píi ń vɛ̃ɛ maa píio ń pↄ́wɛna káau pↄ́ aaì kpaao, máli n gbaɛ.