Misee 1

1

2

3

4

5

6

7

¹Wooiti ka ga niiti Ɠɔoɠɔ GALAGI ti laazeelini Mɔleesɛte nui Misee ma, Zuda masa saʋagɔiti ta-yeeɠɛɠalaiti, Yɔtame, ta Aɠaze ta Ezeekiase. Kulakɛlɛmai naati ti ʋilɛni taa wolaiti ba, ti ga, Samali ta Zeeluzalɛme.

²Nuɓusɛiti pɛ à woilo! Zooi ta wɔiti wo zooi ɠa, à ɠida bu! Maliɠii Ɠɔoɠɔ GALAGI ɠa yɛsu seizu ɲadegai, é zeele wooi wo wo laalɔɠɔma!

³Wɛlɛ Maliɠii ɠana ɠula seizuʋɛ, é yei, é ɗa ɠɔɠɔziɛ zalaɠa ɠula adaʋɛti su.

⁴Gizeiti ti ɗa ɓusɛ kɔɠɔwu, pɛtugiti sulaa ɗa lao, eɠɛ kedoi ɠaa ɠa ɠɛ wuunsu abui ɠa, eɠɛ ziɛ a ɠɛ gizei yeizu.

⁵Naa pɛ ka ga Zakɔɓe mavofodaiti ta-lɔ koloɠologi, Izelayɛle ʋɛlɛyeɠei ná-kotoi maaʋele ma. Ɓɛ ɠa é Zakɔɓe liizu tɔ koloɠologi ma? Ná-taa wolai Samali laade ɓaa? Ɓɛ ɠa é Zuda liizu ani ɠɔɔ vaiti ma? Zeeluzalɛme laade ɓaa?

⁶Maliɠii ɠɛni ma: «Naa ma, nà Samali ɠɛɛzu ga kɔtu ziɠigi dɔɓɔi zu, ti ɗa leezɛn ɓelei la ma, nà ná-kɔtuiti kilikili, ti la nɛmɛi zu, gè kpale ná, ma wuulaagiti ti maaɠala.

⁷Ná-kɔɔɠɔ gani kpɛtɛaiti su ɠa ɠaleɠale, ná-tɔnɔ ɲɔiti pɛ ti ɠala. Ná-vololiba zaɠaaiti, gè naati suɓulukpulu, tɔɔzei naati ti ɓɛtɛni ga ná-koloɠologi ma ɠulanumai, ta ʋaazu ɠɛɛzu ga koloɠologi taɠiligaa ma ɠulanumai.»

⁸Naa ɠa é kɛɛzu gè ɠaalɛizu, gè ɗa wɔlɔ, gè ɗa ziɛ ga ɠɔɠɔa ɲakai, kɔ̀ba ɲakai, gè ɗa kpeei loo eɠɛ koʋei, gè ɗa kpalagi wo eɠɛ saa wɔnigi.

⁹Mazɔlɔɔ maanɔɠɔi seeliai Samali ma, é la ɠulaa su pɛ. É zeelia Zuda yooi ma ta Zeeluzalɛme taa ziɠidaʋɛ, ʋɛ nà-nuɓusɛiti ti zeini ná.

¹⁰À mina daazeeli Gate taazuʋɛ, à mina wɔlɔ! Ɓɛte-Leafela nuiti à ɠilikili fufiligi zu!

¹¹Safiil nuiti, à leʋe ga ɠɔba ɲakai ta wa-unfegi! Saanan nuiti ti la zoosu ti ʋa ɠula taa ʋa. Gɔlɔi ɠa wosu Ɓɛte-Ɠayɛsɛle taazuʋɛ, kpɔba zobo ge la mɔ ná.

¹²Malɔte taaʋeaiti sasu ɠa ɓalizu ta-ɠulanumaiti ma vaa zu. Mazɔlɔɔ nimiza vai Ɠɔoɠɔ GALAGI teʋegai é zeelia Zeeluzalɛme taa ziɠidaʋɛ ma.

¹³Lakise laaʋeaiti, à wa-ɠɔɔɠɔ wotoloiti ta sooiti kɛʋele ɓɛtɛ. Wo ʋokɔɠɔni Izelayɛle ná-wooʋaladai ma, wo Zeeluzalɛme lɔ tɔ koloɠologiti su.

¹⁴Naa ma, Zuda nuɓusɛiti à bali ma wa Mɔleesɛte-Gate nuiti. Akeziɓe taa wolai la ɠɛa ga kula faa zu ani Izelayɛle nuɓusɛiti ta-masagiti bɛ.

¹⁵Maliɠii ɠa wo lɔɔzu nu niinɛ yeezu Maleesa nuiti. Izelayɛle ɠundiɠiiti ti-lɔɠɔ ɠulaai, ta ʋelazuʋɛ ɠaiziɛ Adulame ʋugi zu.

¹⁶À wɔungiti bo, wo ti ɓuye ma, Zeeluzalɛme taaʋeaiti, kpaanagi ɠɛ wo unma, eɠɛ ɗuai nɔungi, à wo yiima lointi ta-wɔlɔi wo, mazɔlɔɔ ta liizu ga tiye duɔlai zu, ti maaɠooza wo ʋa.