Misee 3

1

2

3

4

5

6

7

¹Gè ɠɛ ma: «À woilo, Zakɔɓe mavofodai ma ɠundiɠiiti, wɔi wo zeini Izelayɛle nuɓusɛiti unda! Wo-losuʋɛ la ga wo ʋa ziɛ ga sɔledai ɓaa?

²Wa ɠɛlɛzu faa ʋagɔi ʋa, faa ɲɔi ɠa nɛai wo ʋɛ, wa nuiti kɔlɔgi ɠulazu ti ma, wo ti ma zuai ɠula ti-ɠaeiti ma.»

³Ti-laamianigi ɠa nɔnɔ ga nà-nuɓusɛiti ma zuai. Ta ti-ɠɔlɔgi ɠulazu ti ma, ti ti-ɠaeiti galeɠale. Ti ti zuɓulukpulu, eɠɛ suai, nu gilizu kɔlu liɠii zu.

⁴Naa ɠa é ba, ta wooɠulana Ɠɔoɠɔ GALAGI ma ga é ɓɔ ti ʋa, Maliɠii la ti wooɠaaʋotega pɛ, kɛlɛ toɠa ʋoluave ti ʋa, tɔɔzei faa ɲɔi ʋa, ti kɛɛni.

⁵Ɠɔoɠɔ GALAGI wooi ɠaa, é ga nii, GALA goo wo nuiti ta-vaa zu, niiti ti ná-nuɓusɛiti kakasu, é ɠɛ ma: «Ni ta ani lɔɔna ti-la, ta ɗa ɠɛ ma naazu fai pɛ ge zolooga, kɛlɛ ta ɗa kɔɔi ʋɛɛ naati ba, zɔiti ti la ani lɔɔni ti-la.

⁶Wa ɠɛ niina kpidii zu, wo la mɔ kulakɛlɛma ɠaa! Ʋelela ʋele vaiti bo fai ɓega! Kpidii ɠa ʋɛɛ niina wo ma, eɠɛ foloi a daana, foloi zu ɠa ɓidi wo ʋɛ.»

⁷Zɔiti ti faiti bosu ma yeeluɠɔ, ɓaa ɠa ɠula ti ma, adɔɓɛɛ nuiti ta unfe! Ti pɛ ta ɠaazulɔɔɠu, mazɔlɔɔ GALA ge la ti wooɠaaʋotega pɛ.

⁸Kɛlɛ nɔ̀un, dàavegɛ ga gaaɓaai ta Ɠɔoɠɔ GALAGI ná-Zɛnvui, ta sɔledai, ta zɛbɛi, ga gè Zakɔɓe mavofodai ná-tɔ koloɠologiti dɛɛ la, ta gè Izelayɛle ná-kotoi lɛɛ la.

⁹À woilo deɠɛmu nii ma, Zakɔɓe mavofodai ma ɠundiɠiiti, wɔi wo zeini Izelayɛle nuɓusɛiti unda! Wa sɔle fai wɔinzeɠezu, wo telebodai maaʋe.

¹⁰Wa Siyɔn losu ga nu ʋaai, wo Zeeluzalɛme lo ga suɲɔi.

¹¹Ta-ɠundiɠiiti ta tukpɔi ɠaaleʋezu lobɛanii maazu. Kɛni ti ta-zalaɠa ɠula nuiti sala pɛ, ti ʋa nuiti kala ga tɔ gooi. Kɛni ti ta-ƓALA goo wo nuiti sala pɛ ga walii, ti ʋa ʋelela ʋele vaa wo. Ti ɗa ʋoluzei Ɠɔoɠɔ GALAGI ʋa, ti ɗa ɠɛ ma: «Ɠɔoɠɔ GALAGI la gi zaama ɓaa? Ɗa ma, maanɔɠɔ nɔpɛ ge la zeelia gi ma.»

¹²Naa ɠa é ba, wo maaʋele ma, Siyɔn ɠa woli, eɠɛ kpalagi, Zeeluzalɛme ɠa ɠɛ ga kɔtu ziɠigi, dɔɓɔi ɠa GALA pɛlɛi ma ɠizei maaɓɔɔle.