Mateo 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Imi Jesús Belén-Provincia-Judeagin mimmilesgu, teun takalgu Errey-Herode pel-kwapa Provincia-Judeagin neg-takmai. Imi Jesús-mimmilejad-cholbal, Magomal tad-nakwed-akar Jerusalénzhe nonimal.

²Tegin Magomal Jerusalénzhe nonimalgu, ekisnonimal: —¿Judio-errey-imichal-mimmilejaddé pia maidé? Imi anmal tad-nakwedbal e-iskwa-kanonikid takchamal. Tenal anmal tanimalbal Pab Tummadyob we errey-otummogal.

³Tegin Errey-Herode Magomal-chogzhad itosgu, Herode chuli-pinzhe-pes. Tegin tulemal-Jerusaléngin-pukmalad-pel-kwapa ampa chuli-pinzhe-pesmalmo.

⁴Tenal Herode pel-kwapa tule-irwal-Pabzhe-kolmalad-tummaganzhe tegin tule-Moisés-igalgin-tulemal-oturdamaladzhe kochamalgu, Herode Judio-tummaganzhe ekichialzhun: —¿Imi Cristo-Pab-akpene-chogzhad-palmidagoed-tuledé, pia mimmilego-ade?

⁵Tegin Judio-tummagan Errey-Herodega chogalzhun: —Imi Cristo Belén-Provincia-Judeagin mimmilego. Tenal akpene Pab-kaka-palchoged Pab-kartagin nermasdo:

⁶Imi we neg-kwebur-Belén, Judea-napkin chii. Tenal we neg-kwebur pollé-taklegen, tenal neg-kwebur-pul-chunchogmaladga pul neg-chunchogedmo. Imi we neg-kwebur-Belén-akar tule-tummad nononiko neg-takegal, Tenal we tule-tummad an-Israel-tulemal-iktuedga kunoniko, tule-oveja-takedyob.

⁷Tegin Errey-Herode pidzhi Magomalzhe kochagu, Magomalzhe nuekwa ekichialzhun, iskwade inkwa naigunoni. Tegin Magomal Herodega palchogalmalzhun, emalde untargus takchamal iskwa kanoni.

⁸Tegin Herode kep Belénzhe Magomal-palmijogalidgin Magomalga chogal: —Imisgin pe nadmaldo. Tenal pe Belénzhe omojal, pe nuekwa machi-amimalo. Tegin pe machi-onojal, anka pe kannan choge-tagmalbalo, an Pab Tummadyob ne-otummo-negalmo.

⁹Tegin Magomal Herode-chogzhad itosmalgu, ukin nadmalzhun. Tenal Magomal irmanatapmaladgin, akpene iskwa-tad-nakwedzhik-kajad kannan Magomal-iktumai-kus kanonibal. Tenal we iskwa Magomal-iktu-natap machi-maidzhe omogal. Tegin Magomal-natapidgin arpak iskwa machi-maid-inniki naigunoni.

¹⁰Tenal Magomal takchagu iskwa emalga naigus, peyedzhe weligwal-itosmal.

¹¹Tegin Magomal machi-maid-negzhe togzhamalgu, taknonimal machi aga e-nan-María-waglik mai. Tegin Magomal machi-abir chimtinonimalgu, kep Pab Tummadyob machi-otummoalmal. Tegin Magomal kep ulu-egasmal Jesúsga immal-nuegan ukegal. Tegin Magomal Jesucristoga immal-nuegan ukchamal: olo, immal-wawadikid tegin ina-wawad-mirra.

¹²Tenal Pab Tummad kabdakedgin Magomalga chunmanoni ka chogal: “Pe melle kannan Herodeje pal nemalo.” Tegin Magomal kabdakedgin-ka-choglejadbal Herodeje pal nadzhul-kusmalzhun. Tegin Magomal igal-pidbal kannan aga negzhe nadmalzhun.

¹³Tegin Magomal-naded-cholbal, Pab-angel kabdakedgin Joséga chunmanoni ka chogal: “Kwisgu. Imi pedin machiga-tegin-e-nanga Egiptoje pe wakinenab. Tegin pe Egiptogin pe peio an-pega-chogoedzhe. Imi Herode María-machi-amine tar-mesgal.”

¹⁴Tegin José atagalgu, ilgwen machi-tegin-e-nan-ches. Tenal José apka te mutikkin yok naal nadmal Egiptoje.

¹⁵Tenal José Herode-purkwijadzhe Egiptogin pesmal. Imi Jesúsgin weob immal-kujad Pab akpene e-kaka-palchogedbal chogzhagujadyob pél kus. Tenal Pab Tummad chogzhado: Imi antin naga machije kocha Egiptogin nogal itije megdagal.

¹⁶Tegin Errey-Herode mag-itosgu Magomal e-yardas, Magomal-inik peyedzhe ulual. Tenal Magomal-machigin-chognonikidbal Herode wilub kas. Al Herode aga e-chapinganga chogal: “Imi pemal Beléngin tegin tule-abir-mamimalad pel-kwapa machimal-pirkabo-nikad imis-mimmilejadzhe-pakal pél pe mesmalo.” Tegidgin Herode-e-chapingan pel-kwapa machi-purwigana-mechamalzhun.

¹⁷Imi Herode weob machi-purwigana-mechaddin, akpene Pab-kaka-palchoged-Jeremías Pab-kartagin chogzhad-yopí kunoni. Tenal teun Jeremías chogzhado:

¹⁸Imi Ramágin tulemal pela-pela pukib-itogedbal okormananimal. Tenal we omegan-Raquel-e-wagwagan e-nuskan-purkwijadbal pela-pela okormananimal. Tenal tule kwen unnijul we omegan-pukib-itoged ochulogal.

¹⁹Tegin Herode-purkwijad-cholbal, Pab-angel Egiptogin kabdakedgin Joséga chunmanoni ka chogal:

²⁰“Imi pedin Israel-napche aga e-nanbak kannan machi-toto-chedenabbal. Tenal tule-machi-toto-mesbi-kunaid pato purkwis-choggu, al pe akalzhul kannan nebalo.”

²¹Tegin José Israel-napche machi-toto-cheszhun aga e-nanbak.

²²Tenal José wisgusgu Provincia-Judeagin Arquelao e-pab-Herode-anal neg-takmai-pes, José kwakial Provincia-Judeagin meggal. Tegin Pab-angel kabdakedgin Joséga chognoni-choggu Joséde akalzhul Galileagin mego, al José Provincia-Galileaje nadzhun.

²³Tegin José tegin María machi-totobak neg-kwebur-Nazaretche megnonimalzhun. Imi Jesús-Nazaretkin-megwijad akpene Pab-kaka-palchogmalad chogzhad-yopí kusdo. Tenal teun Pab-kaka-palchoged chogzhado: “Imi tulemal we tule-pinonimalo, tule-Nazaretkined.”