1Penga te pegbonyag ki Jesus, inibing sikandin te Espiritu Santo doton te kebigtilan amon boyowen i Satanas.
2Wedad palos kinaen i Jesus dalem te kepatan se aldaw, aw penga niyan binallos sikandin.
3Dimateng si Satanas aw minikagi sikandin, “Aw ontò ka Batà te Timanem, inangi pan se menge bato seini pineokit te tolos no amon doen kànen nikaw.”
4Meneng minikagi si Jesus, “Eked a, so doen kagi te Timanem insolat, ‘Kenà olò kànen se keilangan te otaw amon eked kematay, meneng keilangan kominawà se otaw te kedita te impunù te Timanem.’”
5Penga niyan, inibing i Satanas si Jesus doton diatas te dakel simbahan doton te Jerusalem.
6Minikagi si Satanas, “Nayan, aw ontò ka Batà te Timanem, kahang ka. Eked ka elegi, so doen kagi te Timanem insolat, ‘Isogò te Timanem se menge anghil amon meg-ipat dan kamno.’ Doen heman kagi te Timanem insolat, ‘Ewidan ka te menge anghil, aw engaten ka dan amon eked ka kesongkol te bato.’”
7Meneng minikagi si Jesus, “Eked a, so doen heman kagi te Timanem insolat, ‘Ikà niyo egtandà te Pengolo niyo Timanem.’”
8Penga niyan, inibing i Satanas si Jesus doton te ontò melangkaw bontod, aw impekità din kandin se kedita te ogpeanan te keneyonan aw kèpiya niyan.
9Minikagi si Satanas, “Aw lomongken ka diyà kanak aw simbahen a nikaw, ibegay ko diyà kamno se kedita te ogpeanan sìyan, amon lomowan ka diyà te kedita te otaw kidoen.”
10Meneng minikagi si Jesus, “Satanas, kesayo ka. Eked a pegsimba kamno, so doen kagi te Timanem insolat, ‘Timanem se Pengolo niyo aw sikandin se keilangan simbahen niyo, so sikandin olò se mepakay tekingan niyo.’”
11Penga niyan, nesayo si Satanas, aw doen menge anghil insogò te Timanem amon meg-ipat dan ki Jesus.
12Nayan, impedakep i Herod si Juan Memonyagay aw impekeleboso din. Pegketaga-taga i Jesus kenyan, minolì sikandin doton te probinsya te Galiliya.
13Minokit sikandin doton te lonsod te Nasarit aw dimeleg doton te lonsod te Kapirnaom aw mig-ogpà kidoen dapag te kilid te lanaw digsel te tanà te Sabulon aw Neftali.
14Pineokit kenyan, netoman se inikagi te telekeliwat te kagi te Timanem gebii si Isaias tepad te pegdateng i Jesus pigpolingunan te lowa,
15“Se kedita te otaw eg-ogpà doton te tanà te Sabulon aw Neftali, aw doton dapag te kilid te lanaw, aw doton dipag te wayeg te Jordan, aw doton te Galiliya eg-ogpaan te menge otaw kenà Judiyo,
16pengkey iling te eg-ogpà dan doton te kengitngitan, meneng kitaen dan se ontò melowa. Pengkey eg-ogpà dan doton te kengitngitan aw egkelemitan dan te kemetayun, meneng egkeenyagan dan.”
17Lekat niyan, migtebò si Jesus migtoladà, aw minikagi sikandin, “Pegselsel kaw den te menge salà ininang niyo, so agpet den lomowan se Timanem diyà kenyo.”
18Doen sebad aldaw, minipanaw si Jesus doton te kilid te lanaw te Galiliya. Kinità din se didowa memokotay si Simon iningedanan din ki Pedro, aw adi din si Andres nemokot.
19Timawal si Jesus, “Taking kaw kanak, so megtoladà a kenyo amon kenà ikan se meabat niyo, meneng otaw se ibingen niyo diyà kanak.”
20Pegketà, tinenanan dan se pokot aw timaking dan ki Jesus.
21Dimeleg si Jesus, aw kinità din se doma telekedowa si Santiago aw adi din si Juan didowa batà i Sebedeo. Kidoen dan te belangay sipat amay dan, aw migtigmes dan te pokot. Tinawal dan heman i Jesus,
22aw ayas dan tinenanan se belangay aw amay dan, aw timaking dan heman ki Jesus.
23Nayan, timeped si Jesus te kedita te lonsod doton te probinsya te Galiliya, aw migtoladà doton te menge simbahan te Judiyo. Migtoladà sikandin te Mèpiya Indan tepad te peglowan te Timanem, aw pinegolian din se kedita te otaw doen mesakit.
24Yan se doun te ontò sikandin nedengeg doton te kebelad te Sirya. Pinegolian din se kedita te otaw doen mesakit inibing diyà kandin, pengkey eden kemoloi te mesakit, aw otaw dinetengan te bosaw, aw otaw pigbaboy, aw otaw kenà egpekeiwal. Negolian se kedita dan.
25Ontò medita se otaw timaking ki Jesus. Tikedo dan te probinsya te Galiliya, aw lekat te Dikapolis, aw Jerusalem, aw probinsya te Judiya, aw lekat dipag te wayeg te Jordan.
