1Iorou ka bogo napano Jone Baruei naio baruei ea Yesu bisi, ana Niununo Lu buru Yesu ban ea vio yauo tai ka sim̃aro nalo kanalo parinio tubo rila von naio.
2Naruei Yesu naio mondulu ka bogoti duelimo va veri 40 a bogiano duelimo va veri 40, ka bolkouo, mia iorou ka bogoti nalo nei ana jijer taneaio.
3Ana mo Sim̃aro, toro nam̃a milavonvon tomu nalo, naio ber ka Yesu, berinavo “Verenio jau kobe Atua kenerinio riano, ana mo kover ka puruveru nalo na aju na, ka amei ave joko, ka kesen tai.”
4Ana Yesu naio berdop̃eio, berinavo “Makanio, bior Niosi Lu naio berenio ruei, berinavo ‘Maka toro rijikia rimeul ea ga sinaniano, mia toro mijikia rimeul ea iliano nonovio napano Atua naio berenio.’”
5Mia Sim̃aro naio milavon Yesu kiano jidomiano bereio, naio jiloglog Yerusalemo, naio buru kiano jidomiano bavin mave ea Atua Kunuano Lu.
6Naruei Sim̃aro ber ka Yesu, berinavo “Verenio jau kobe Atua kenerinio, ana mo jau koviako kavatove ea borotano. Mia jau kovu ga na, bior Iliano Lu naio berii Atua, berinavo ‘Mia naio mijikia riila kiano nailiano nalo, ka amei atu avitikariso. Mia nalo adukarso ga ka jum̃alo mave, ka mia kavan re jaamo ea puruveru.’”
7Ana Yesu berdop̃e Sim̃aro, berinavo “Makanio, bior Niosi Lu ber bunu ruei, berinavo ‘Maka rivu ka kalavon kanamo Tubo Atua, jau katadua re naio ka rila kiamo vite tai.’”
8Naruei Sim̃aro naio milavon Yesu bereio, ka jidom rivuru Yesu kiano jidomiano rivavin ea burusuku na toru laka tai, ka mia naio rijikia siloglog buruvenuo nonovio na vio yetemeriba nei ka Yesu, rivija vite maraiu nene nalo.
9Naruei Sim̃aro milavon Yesu bereio va rolu nene, berinavo “Saba nalo na komial na mia kiniou najamo kalo vanso, verenio jau keinietano, jau kolotu ka kiniou.”
10Mia Yesu naio mil ban Sim̃aro, berdop̃e kiano iliano, berinavo “Jau kovuro den kiniou, Sim̃aro. Niosi Lu naio berenio ruei, berinavo ‘Mia jau kolotu ka ga Tubo kiamo Atua, naio ga takurano, mia naio ga kala kanano im̃auano.’”
11Naruei Sim̃aro buro den Yesu, ana nailiano nalo abinimei, aju naliko amiyolup̃ilup̃i naio.
12Mia ka bogo nei, parinio tubo Erot kiano tomu na mira nalo tai aba abokar Jone Baruei, ana aburu naio ban ea yimo na tetavokoiano. Mia ka legiano nene ga Yesu naio mijogial lilianiano nei, naruei naio jumolu den vio na, ana ban bereio ea tanobuku na vio Kalele.
13Mia naio maka riva toa vio Nasarete, mia naio mijaka batove ea m̃arkomeli na vio Kapeneam, napano naio jo vaataro ka ueiyabo na toru na vio Kalele. Vio nalo nei napano jikar Kalele batove boru koyou ea tei, beamu borotano nei naio be Sebulano kiano bajulukuti nalo bija Naptali kiano bajulukuti nalo kialo nua.
14Tenei miyotuba jel jibe nei ka mia rila iliano nalo napano Naverialiano Aisea berialio nanua ruei, rimei rive riano tibe ka napano naio berenio, berinavo
15“Kamiu tomu nalo na Sebulano bija Naptali kialo vio nalo, napano kamiu kumitu iviso ka m̃arauei na vio Yortano bija tei na toru, kamiu na vio Kalele, vio na tomu na maka ajikia Atua, kamiu kuvijog iliano nei:
16Tomu nalo napano m̃a aju nunu ga, mia nalo aial burum̃ara yulu tai. Nalo na aju nunu dam̃ariga, ka mia m̃a am̃arm̃aro ga, mia burum̃ara yulu tai naio rimereralilo.”
17Mia jikar ea bogo nei, ana Yesu naio jom̃a mioliolu, naio berinavo “Kamiu monoka kuvilig kenemiu jidomiano nalo ka kenemiu kariano nalo, bior navenatuboiano na vio mave naio binimei vaataro ruei.”
18Yesu naio jom̃a mieliel kiki jakii baramudou na ueiyabo napano toru na vio Kalele, ana naio mial tomu juo, Saimon Pitere naio kuruano Adru. Naljuo ajum̃a ajuvan sup̃ede, bior naljuo amijikia bajago nam̃a aburu niado.
19Mia naio ber kalo, berinavo “Kamjuo kuvitakisor kiniou, mia kiniou nala kamiu kuve navagadeano na tomu nalo.”
20Mia vaarakurano, naljuo ajuvan kialo sup̃ede nalo ajubo, ana nalo ajakisor Yesu.
21Karina Yesu naio miel ban lie kija ga bereio, ana naio mial tomjuo dolu bereio, Yemesi naio kuruano Jone, nalo abe Sepeti kenerinio nalo. Nalo ajua kialo buluku uako naliko karam̃alo, nalo ajum̃a amila batitig kialo sup̃ede. Naruei Yesu biolo ka atakisorio,
22mia vaarakurano ga, nalo ajumolu sop̃eli, ajuvan karam̃alo jobo ea kialo uako, ana nalo ajakisor Yesu abano.
23Naruei Yesu naio jom̃a mieliel ea vio nalo napano Kalele, naio jom̃a berloglog kulo Ju nalo ea kialo yimo na lotuano nalo. Naio jom̃a berial ioluano novo nei na Atua kiano navenatuboiano, mia naio mieliel ka tomu napano nam̃a amie, naio milarur tomu nam̃a mieiano dedade nalo milalo, abo bereio.
24Naruei ajukunu ka Yesu siano banbano barko reraio bunu burum̃ara tanobuku na vio Kalele tivelinio batove, napano ajisia ka Siria. Naruei tomu nalo na vio na bunu abarvar kialo namieiano nalo abinimei amial Yesu. Nalo nene tealo amie, tealo amijog niabele mijalele, tealo niadu jualo, tealo ajum̃a amiabulu m̃arm̃aro, mia nalo tealo napano niabele nalo am̃arm̃aro, mia Yesu naio milarurlo abo bereio.
25Mia tiniobi toru na tomu nalo ajakisor Yesu ka bogo na. Nalo nei amolmoluo ea vio Kalele, ea vio napano ajisia ka Komeli Duelimo, mia ea vio Yerusalemo a ea vio dolu nalo na vio Yutea, a ea vio nalo napano jua m̃arauei na vio Yortano tivelinio bano. Nalo na vio nalo nei naruei nalo ajakisor Yesu ea bogo na.
