1Tekꞌuchiriꞌ, ri Jesús xkꞌam bꞌi ruma ri Ruxlabꞌixel ri Dios pa jun luwar katzꞌintzꞌotik chaꞌ kakꞌam upa ruma ritzel winaq.
2Ri Jesús xkꞌojiꞌ chilaꞌ yey cuarenta qꞌij y cuarenta aqꞌabꞌ kꞌu riꞌ na jinta kꞌo xutijo. Kꞌisbꞌal re waꞌ xpe numik che.
3Xqibꞌ kꞌu ritzel winaq rukꞌ ri Jesús re kukꞌam upa chaꞌ katzaq pa mak, jewaꞌ xubꞌiꞌij che: —We qatzij at Ukꞌajol ri Dios, chat-taqan che chaꞌ taq waꞌbꞌaj kuꞌan wa —xchaꞌ.
4Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Na xew ta ruma ri wa e kꞌas ri tikawex, ma e kꞌaslik ruma ronoje taq chꞌaꞌtem kel lo puchiꞌ ri Dios —xchaꞌ.
5Ekꞌuchiriꞌ, ritzel winaq xukꞌam bꞌi pa ri santowilaj tinamit Jerusalem kꞌa chikaj che ruwi ri Rocho Dios.
6Xubꞌiꞌij kꞌu che: —We qatzij at Ukꞌajol ri Dios, chakꞌaqa bꞌi awibꞌ kꞌa chuꞌlew y na jinta kꞌo kakꞌulumaj, ma jewaꞌ tzꞌibꞌital kan chupa Rutzij Upixabꞌ ri Dios: Ri Dios kebꞌutaq lo ru ángeles awukꞌ chaꞌ katkichajij. Katkichap kꞌu rukꞌ ri kiqꞌabꞌ chaꞌ na kaꞌchiqa ta rawaqan che juna abꞌaj —xchaꞌ.
7Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Makꞌam upa ri Dios Qajawxel —xchaꞌ.
8Ekꞌuchiriꞌ, ritzel winaq xukꞌam tanchi ubꞌi ri Jesús chutzaꞌm jun nimalaj juyubꞌ y xukꞌut kꞌu chwach, ronoje ri taqanik kaꞌan puwi taq ri tinamit che ruwachulew rukꞌ ronoje ruchomalil taq waꞌ.
9Xubꞌiꞌij kꞌu che: —Ronoje taq waꞌ kanya paqꞌabꞌ we kaxukubꞌaꞌ awibꞌ chinuwach y kaloqꞌnimaj nuqꞌij —xchaꞌ.
10Ekꞌu ri Jesús xubꞌiꞌij che: —Chatela chinuwach Satanás, ma jewaꞌ tzꞌibꞌital kan chupa Rutzij Upixabꞌ ri Dios: Lik chaloqꞌnimaj uqꞌij ri Dios Qajawxel y xew Rire chanimaj uqꞌij —xchaꞌ.
11Ekꞌu ritzel winaq xuya kan ri Jesús y xel bꞌi chiriꞌ. Xekꞌun kꞌu lo jujun ángeles y xkijeqo kakinimaj ri Jesús.
12Ri Jesús, echiriꞌ xuto kꞌo ri Juan pa cárcel, xeꞌek tanchi Galilea.
13Xel bꞌi pa ri tinamit Nazaret y xeꞌjeqela pa ri tinamit Capernaúm. Waꞌ jun tinamit kꞌo chuchiꞌ ri mar pa ri luwar re Zabulón y re Neftalí.
14Xuꞌan kꞌu waꞌ chaꞌ e kuꞌana janipa rutzꞌibꞌam kan ri qꞌalajisanel Isaías echiriꞌ xubꞌiꞌij:
15Pa ri luwar re Zabulón y re Neftalí, ri kꞌo pa rubꞌeyal ri mar, chꞌaqa yaꞌ che ri nimayaꞌ Jordán, pa taq ri luwar re Galilea pa ejeqel wi ukꞌiyal winaq na e ta aj judiꞌabꞌ;
16ri tikawex ejeqel pa qꞌequꞌm xkil ri Qꞌijsaq yey ri ejeqel pa ri qꞌequꞌm re kamik, xwon ri Qꞌijsaq pakiwiꞌ xchaꞌ.
17Chwi kꞌu lo riꞌ xujeq ri Jesús katzijonik, jewaꞌ kubꞌiꞌij: «Tzelej tzij alaq chwach ri Dios, ma rutaqanik ri Dios petinaq chilaꞌ chikaj lik xa naqaj chi kꞌo wuloq» kachaꞌ.
18Echiriꞌ kabꞌin ri Jesús chuchiꞌ ri mar re Galilea, xril pan kiwach kebꞌ achijabꞌ kichaqꞌ kibꞌ, jun Simón rubꞌiꞌ (Pedro kecha che) y ri jun chik Andrés rubꞌiꞌ. Rike e aj chapal kar, yey e riꞌ ketajin che ukꞌaqik ri ki atarraya pa ri mar.
19Ekꞌu ri Jesús xubꞌiꞌij chike: —Chixpetoq, chixterej lo chwij, y riꞌin kanꞌan chiwe ix aj molol tikawex, jelaꞌ pachaꞌ iꞌanom lo chike ri kar —xcha chike.
20Y na jampatana xkiya kan ri ki atarraya y xeterej bꞌi chirij ri Jesús.
21Xbꞌin kꞌu pan jubꞌiqꞌ chik y xeril chi pan kebꞌ achijabꞌ kichaqꞌ kibꞌ, jun Jacobo rubꞌiꞌ y ri jun chik Juan rubꞌiꞌ. Wa kaꞌibꞌ e ukꞌajol ri Zebedeo. Rike e kꞌo chupa jun barco junam rukꞌ ri kiqaw y ketajin che ukꞌojoxik ri ki atarraya. Ekꞌu ri Jesús xebꞌusikꞌij bꞌi.
22Y na jampatana rike xkiya kan ri kibarco y ri kiqaw, y xeterej kꞌu bꞌi chirij ri Jesús.
23Ri Jesús xikꞌow che ronoje tinamit re Galilea. Kakꞌutun pa taq sinagogas chujujunal tinamit, kutzijoj ri Utzilaj Tzij re rutaqanik ri Dios y kukunaj ronoje uwach yabꞌil kꞌo chike ri winaq.
24Konoje ri e kꞌo pa taq ri tinamit re Siria xketaꞌmaj taq ri kuꞌan ri Jesús. Xekikꞌam kꞌu lo chwach Rire konoje ri tikawex rukꞌ taq ukꞌiyal kꞌaxkꞌolil. Waꞌ e ri e kꞌo pa yabꞌil, ri kꞌax kikꞌulumam, ri e kꞌo pakiqꞌabꞌ itzel uxlabꞌixel, ri kebꞌumaj tew y ri e sik. Ekꞌu ri Jesús xebꞌukunaj konoje.
25Lik e kꞌi kꞌu ri xeterej bꞌi chirij. Waꞌ e petinaq Jerusalem y che jujun chik luwar re Judea, kukꞌ ri e petinaq pa taq ri tinamit re Galilea, re Decápolis y che jujun chik tinamit e kꞌo chꞌaqa yaꞌ che ri nimayaꞌ Jordán.
