1Saen euna Seten uqa Jisas temdu figiannu Kis Gun uqa Jisas iwaldocob wadauna nuen.
2Uqa deel 40 cahineg witicca sab qee jec bilen. Saen hedocob wen don.
3Wen dodon temgec eu uqaca limei madon, “Hina Anut Melahfi meen i maadecem sab ibuldocob jaga,” don.
4Euqa Jisas uqa Seten jejeg hewi madon, “Anutna jaqec je eu odi madena: ‘Sab jec himec dana cebac bilec qee adena qa je cunug Anut conadec cali hona eu dana cebac bilec adena,’ ena,” don.
5Odocob Seten uqa Jisas ehudimei jobon gunna ehi ti tempel qab tatacanna muden.
6Mudimei madon, “Anutna jaqec je eu odi madena: ‘Anut uqana ensel maadeceb hina jaim meenna qee tudoiaunnu age hina ebenegana hewihi ehi ni mihuqagan,’ ena. Eunu hina Anut Melahfi busali tonoga,” don.
7Jisas Seten jejeg hewi madon, “Anutna jaqec je osoha madena: ‘Tibud, hinana Anut, eu cain temdu fagaun,’ ena,” don.
8Odocob Seten uqa haun Jisas ehudi aluh benna ehi ti muden. Mudimei mahamaha cul cunug agena tumutum cahulecca ihacdudu madon,
9“Faga, hina amina gob cehi ijanu cuha fecemfi fagana eu cunug culihigen,” don.
10Odocob Jisas Seten jejeg hewi madon, “Anutna jaqec je odi madena: ‘Tibud uqa hinana Anut uqanu cuha faga, uqa himec cewel utugale!’ ena, Eunu Seten, cuculti nuuga,” don.
11Odocob Seten uqa Jisas cuculdi nueceb ensel age hu Jisas cewel utoin.
12Aria, Jisas uqa age Jon hewimeig gihacdoc jona mudein ec dumei uqa Galili hatu ono nuen.
13Odimei uqa Nasaret culimei Kapaneam jobon nui bilen. Kapaneam jobon eu Galili wa gad cagocna isec nijina, eu Sebjulan sihulca Naftali sihulca agena hatu gadac nijina.
14Je hahun madec dana, Aisaia, je oso wele maden eu ihoc ligiannu odi odon. Uqa odi jaqen:
15“Sebjulan sihulca, Naftali sihulca, alena hatu eu Galili wa gad cagocna isec nijia, Jodan Wa ono isec, Galili hatu Juda dana qee eundec agena,
16hatu euna dana cajaca age tuna biloloig eu fulacdoc ben oso fein, dana cajaca age cal mec hatuna tuna biloloig, eu fulacdoc ben oso iletaden,” Aisaia odi jaqen.
17Saen ina Jisas uqa dana cajaca je qasali maadi sanan mimei maaden, “Sao cul jobon eu age cemenega hona. Eunu agena silailnu tului falicdoigale,” aden.
18Jisas uqa Galili wa gad cagocna cocobi dana oso waliagca fecialen, eu Saimon, age Pita egina, uqa waliag Andruca. Ale cimec ben wana hehelesin fen. Ge, age cul dool cedec dana.
19Odocob Jisas maalen, “Hu tootecebil ija odalecemin ale dana cajaca cedadowasan,” alen.
20Maaleceb mahuc bahic alena cimec ben cuculesi uqa toodu belesin.
21Uqa nag bahic onoca limei dana oso waliagca fil fecialen, eu Jems, uqa Sebedi melah, uqa waliag Jonca. Ale memela, Sebedica, agena wagna bibileig cimec ben tatalec eu haun wewegi bilein. Odocob Jisas utaalen.
22Mahuc bahic ale wag memelaca cuculadi limesi Jisas toodu belesin.
23Jisas uqa Galili hatu cunug cocobi nuen. Uqa Juda agena cuha jonana limei dana cajaca iwaladen. Odimei uqa sao cul jobonnu me je qasali maaden. Odimei uqa dana cajaca agena hag filfilca age dewenega laleg mein eundec filfilca me maden.
24Age uqa hutannu je saec eu Siria hatu cunugna ihoc len. Odocob age dana cajaca hag gug filfil me qee maden eundecca, dain ben aden eundecca, buga me qee hewadein eundecca, dana caja titi hudec hagca age gaid dewenega qeleceb toni mahulegina eundecca, dana tefulunuga laleg mi cal mein eundecca cedadi Jisasca ahocobil Jisas uqa me maden.
25Dana cajaca am ben age Galili hatunadecca, Dekapolis hatunadecca, Jerusalemdecca, Judia hatunadecca, Jodan Wa ono isec hatunadecca age toodu belein.
