1Echiriꞌ xel bꞌi ri Jesús pa ri Rocho Dios yey e riꞌ keꞌek, xeqibꞌ rutijoꞌn rukꞌ re kakikꞌut che, ruchomalil ri nimaq taq ja re ri Rocho Dios.
2Ekꞌu ri Jesús xukꞌul uwach: —¿Kiwil riꞌix ronoje waꞌ? Paqatzij wi kambꞌiꞌij chiwe, wara na kakanaj ta chi kan juna abꞌaj puwi juna chik, ma ronoje kawulixik —xchaꞌ.
3Tekꞌuchiriꞌ, xebꞌopon chwa ri juyubꞌ Olivos. Yey echiriꞌ xtzꞌuyiꞌ ri Jesús, xeqibꞌ rutijoꞌn rukꞌ, y ekꞌu laꞌ xa kitukel xkijeq kakitzꞌonoj che: —Bꞌiꞌij ko la chiqe, ¿jampa nawi kuꞌana taq riꞌ waꞌ? ¿Yey saꞌ ri kꞌutubꞌal re ri kꞌunibꞌal la y re ri kꞌisbꞌal re ruwachulew? —xechaꞌ.
4Ekꞌu ri Jesús xukꞌul uwach: «Lik chichajij iwibꞌ chaꞌ na jinta junoq kasokow iweꞌix.
5Ma lik e kꞌi ri tikawex kekꞌunik y xa kakichiqꞌimaj uwach ri nubꞌiꞌ, jewaꞌ kakibꞌiꞌij: “In ri Cristo, Ruchaꞌoꞌn lo ri Dios” kechaꞌ. Y lik e kꞌi ri kesokotaj kuma rike.
6»Kita kꞌu riꞌ kꞌo chꞌaꞌoj jewaꞌ y kꞌo chꞌaꞌoj jelaꞌ. Mixiꞌij kꞌu iwibꞌ che, ma lik chirajawaxik wi kuꞌana taq waꞌ; noꞌj na e ta waꞌ ri kꞌisbꞌal re ruwachulew.
7Ma e kꞌo tinamit keyaktaj chikij jujun chik tinamit y e kꞌo taqanelabꞌ keyaktaj chikij jujun chik taqanelabꞌ. Kape kꞌu numik y yabꞌil yey kuꞌan taq kabꞌraqan che ukꞌiyal luwar.
8Ronoje waꞌ e jeqebꞌal re taq ri kꞌaxkꞌobꞌik kakꞌunik.
9»Ekꞌuchiriꞌ, kixyaꞌ riꞌix pa taq kꞌaxkꞌobꞌik y kixkamisaxik; yey konoje taq ri tinamit che ruwachulew lik tzel kixkilo ruma ikojom ri nubꞌiꞌ.
10Chupa taq laꞌ laꞌ qꞌij, lik e kꞌi ri kakesaj kibꞌ chirij ri Dios, kakijeq lik tzel kakil kibꞌ chikiwach y kakikꞌayij kibꞌ chikiwach.
11»Lik e kꞌi ri qꞌalajisanelabꞌ xa e sokosoꞌnel keyaktajik y lik e kꞌi ri winaq kesokotaj kuma rike.
12Ruma kꞌu rukꞌiyarik taq uwach ri mak, lik e kꞌi ri kaqꞌobꞌ ri rutzil kꞌuꞌxaj pa kanimaꞌ.
13China kꞌu ri lik kuchuqꞌubꞌej ribꞌ chwach taq waꞌ wa kꞌaxkꞌobꞌik kꞌa chupa ri kꞌisbꞌal re, e riꞌ ri kakolobꞌetajik.
14»Yey wa Utzilaj Tzij re rutaqanik ri Dios katzijox na chike rukꞌiyal kiwach taq ri tikawex e kꞌo che ruwachulew chaꞌ konoje kaketaꞌmaj kꞌu riꞌ waꞌ; tekꞌuchiriꞌ, kakꞌun lo ri kꞌisbꞌal re ruwachulew.
15»E uwariꞌche echiriꞌ kiwil riꞌix ri lik chꞌul y lik kꞌixbꞌal uwach kayaꞌ chupa ri Luwar Santo, jelaꞌ pachaꞌ ri xutzꞌibꞌaj kan ri qꞌalajisanel Daniel; (china kꞌu ri kajilan re waꞌ, chumaja usukꞌ),
16ekꞌu ri e kꞌo pa taq ri luwar re Judea chebꞌanimaj ubꞌi chwa taq ri juyubꞌ.
17China kꞌu ri kꞌo lo chwi ri rocho, maqaj ne lo che ukꞌamik bꞌi ubꞌitaq re pa ja.
18Yey china ri kꞌo lo pa juyubꞌ, matzelej ne lo che ukꞌamik bꞌi ruqꞌuꞌ re pisbꞌal rij.
19»Chupa taq kꞌu laꞌ la qꞌij, lik toqꞌoꞌ kiwach ri e yewaꞌ ixoqibꞌ y ri ketzꞌumtisanik.
20Lik kꞌu chitzꞌonoj che ri Dios chaꞌ echiriꞌ kixanimaj bꞌi, na e ta uqꞌijol echiriꞌ kꞌax tew y kꞌo jabꞌ yey na chupa tane juna qꞌij re uxlanibꞌal.
21Ma kakꞌun kꞌu jun unimal kꞌaxkꞌobꞌik, waꞌ na uꞌanom ta kꞌana julajoq chwi lo ri jeqebꞌal ruwachulew y na kuꞌana ta chi ne kꞌana julajoq.
22We ta ri Qaqaw Dios na kuqꞌatij ta taq laꞌ la qꞌij re runimal kꞌaxkꞌobꞌik, riꞌ na jinta junoq kakꞌasiꞌ kanoq; pero ruma kꞌu kꞌax kebꞌunaꞌ ri ebꞌuchaꞌom, kuqꞌatij ruqꞌijol waꞌ.
23»We kꞌo kꞌu junoq riꞌ kabꞌiꞌn chiwe: “¡Chiwilapeꞌ, wara kꞌo wi ri Cristo!” o “¡Chiwilapeꞌ, leꞌ kꞌolik!”, mixok il che.
24Ma kekꞌun ri kakiꞌan “Cristo” che kibꞌ y ri kakiꞌan “e qꞌalajisanelabꞌ re ri Dios” che kibꞌ, pero xa e sokosoꞌnel. Ekꞌu rike kakiꞌan nimaq taq kꞌutubꞌal y milagros re kesokosoꞌn rukꞌ, yey kꞌo ne pa saq kesokotaj jujun chike ri ebꞌuchaꞌom ri Dios.
25»Chita kꞌu riꞌ ma ximbꞌiꞌij waꞌ chiwe riꞌix echiriꞌ kꞌamajaꞌ ne kuꞌanaꞌ.
26E uwariꞌche tobꞌ kabꞌiꞌx chiwe: “Chiwilapeꞌ, leꞌ ri Cristo kꞌo pa ri luwar katzꞌintzꞌotik”, mixꞌek che rilik. Tobꞌ ne kabꞌiꞌx chiwe: “Chiwilapeꞌ, leꞌ ri Cristo kꞌo lo pa ja”, mixok il che.
27Ma jelaꞌ pachaꞌ echiriꞌ kayokꞌ kaꞌn ruxeꞌ kaj pa relebꞌal lo ri qꞌij y kilitaj kꞌa putzaqibꞌal ri qꞌij, jelaꞌ kuꞌan rukꞌunibꞌal Ralaxel Chikixoꞌl Tikawex.
28Ma lik kaqꞌalajin rukꞌunibꞌal chikiwach konoje ri winaq; e jelaꞌ pachaꞌ lik kaqꞌalajin pa kꞌo wi juna kaminaq, ma puwi waꞌ kakimol wi kibꞌ taq ri kꞌuch.
29»Xew kꞌu kikꞌow ri kꞌaxkꞌobꞌik chupa taq laꞌ la qꞌij, kuꞌan qꞌequꞌm uwach ri qꞌij, ri ikꞌ na kuya ta chi ruwonibꞌal, ri chꞌumil ketzaq lo che ruwa kaj yey konoje ri kꞌo kichuqꞌabꞌ che ruwa kaj keyikiyoꞌxik.
30Ekꞌuchiriꞌ, kilitaj che ruwa kaj ri kꞌutubꞌal re rukꞌunibꞌal Ralaxel Chikixoꞌl Tikawex. Konoje kꞌu rukꞌiyal kiwach taq ri tikawex e kꞌo che ruwachulew kebꞌoqꞌik y kakil kꞌu Ralaxel Chikixoꞌl Tikawex kakꞌun lo pa sutzꞌ chwa ri kaj rukꞌ ruchuqꞌabꞌ y rukꞌ runimal uchomalil.
31Kebꞌutaq kꞌu ru ángeles rukꞌ unimal uchꞌawibꞌal trompeta re kakimol kichiꞌ konoje ri ebꞌuchaꞌom ri Dios pa taq ronoje luwar che rukajchal rajlibꞌal ruwachulew.
32»E chimaja ri jun kꞌambꞌal naꞌoj puwi ri cheꞌ re higo: Echiriꞌ kujeq katux lo kꞌakꞌ uqꞌabꞌ y kujeq kꞌut katux ruxaq, ruma kꞌu laꞌ kiwetaꞌmaj xa naqaj chi kꞌo wi lo ruqꞌijol echiriꞌ kabꞌukbꞌutik y na jinta jabꞌ.
33Jekꞌuriꞌlaꞌ riꞌix, echiriꞌ kiwilo kuꞌana ronoje taq waꞌ, chiwetaꞌmaj kꞌu riꞌ xa naqaj chi kꞌo wi lo ruqꞌijol rukꞌunibꞌal Ralaxel Chikixoꞌl Tikawex.
34Paqatzij wi kambꞌiꞌij chiwe: E kꞌo tikawex che taq laꞌ la qꞌij na kekam tana we na kakil tubꞌi ronoje waꞌ.
35Ruwa kaj y ruwachulew xa kasach uwach, noꞌj taq ri nuchꞌaꞌtem na kasach ta uwach.
36»Ekꞌu chwi ruqꞌijol y ruꞌorayil waꞌ, na jinta junoq etaꞌmayom re; na ketaꞌam tane ri ángeles e kꞌo chilaꞌ chikaj, ma xew ri Nuqaw etaꞌmayom re.
37Ma jelaꞌ pachaꞌ ri xuꞌan chupa taq ri qꞌij re ri Noé, jelaꞌ kuꞌana pa rukꞌunibꞌal Ralaxel Chikixoꞌl Tikawex.
38Ma chupa taq laꞌ la qꞌij echiriꞌ kꞌamajaꞌ kape ri unimal jabꞌ, taq ri winaq xew kakitij kiwa, kakitij kiyaꞌ, kekꞌuliꞌik y kekiya ri kalkꞌoꞌal pa kꞌulanikil. Ekꞌu ketajin riꞌ che uꞌanikil echiriꞌ xopon ruqꞌijol xok bꞌi ri Noé chupa ri nimalaj barco.
39Na xkinaꞌbꞌej tane ri xpe pakiwiꞌ, kꞌate kꞌu xkinaꞌo xkꞌun lo ri unimal jabꞌ; ri yaꞌ xebꞌukꞌam bꞌi ri winaq y xekam kꞌu konoje. Jekꞌulaꞌ kuꞌano echiriꞌ kakꞌun tanchi Ralaxel Chikixoꞌl Tikawex, ma xaqikꞌateꞌt kakꞌunik.
40»Chupa kꞌu laꞌ la qꞌij, kꞌo kuꞌana wi e kꞌo kebꞌ achijabꞌ chwa juyubꞌ; jun kakꞌam bꞌi y ri jun chik kayaꞌiꞌ kanoq.
41O e kꞌo kebꞌ ixoqibꞌ junam kekeꞌnik, jun kꞌu kakꞌam bꞌi y ri jun chik kayaꞌiꞌ kanoq.
42Lik kꞌut mawar iwach riꞌix, ma na iwetaꞌam ta ruꞌorayil rukꞌunibꞌal ri Iwajawal.
43»Ekꞌu chiwetaꞌmaj waꞌ: Juna achi rajaw ja we ta karetaꞌmaj ri ora echiriꞌ kopon releqꞌom, riꞌ na kawar ta kꞌenoq y na kuya ta luwar kok releqꞌom pa ri rocho.
44E uwariꞌche riꞌix chiyijbꞌaꞌ iwibꞌ che rukꞌunibꞌal Ralaxel Chikixoꞌl Tikawex, ma kꞌaxtaj kakꞌunik echiriꞌ na jinta inaꞌbꞌem.
45»¿Chinoq chiwe e pachaꞌ juna aj chak lik jusukꞌ y kꞌo unaꞌoj, ri yaꞌom puqꞌabꞌ kebꞌutzuq chupa ruꞌorayil konoje ri e kꞌo pa rocho rupatrón?
46Lik kꞌu nim uqꞌij ralaxik riꞌ ri aj chak we xkꞌun lo rupatrón, koluꞌriqaꞌ katajin che uꞌanik ruchak.
47Ma paqatzij wi kambꞌiꞌij chiwe: Rupatrón kuꞌana taqanel che rire puwi ronoje rubꞌitaq re.
48»Noꞌj we waꞌ wa jun aj chak kuꞌan ri na utz taj y kubꞌiꞌij kꞌu pa ranimaꞌ: “Ri nupatrón kꞌamajaꞌ katzelej loq”
49y kujeq kꞌu kebꞌuchꞌay ri rach aj chakibꞌ; yey ekꞌu rire xew kawaꞌik y kaqꞌabꞌar kukꞌ qꞌabꞌaꞌrelabꞌ, ¿saꞌ kꞌu riꞌ ri kukꞌulumaj?
50Kakꞌun lo riꞌ rupatrón chupa ri qꞌij y ri ora echiriꞌ waꞌ wa aj chak na royeꞌem taj.
51Kuqꞌat kꞌu tzij riꞌ puwi ri raj chak y lik kuya pa kꞌax junam kukꞌ ri xa kebꞌ kipalaj, chiriꞌ kꞌu riꞌ koqꞌ wi y kaqichꞌichꞌ wi ruwi reꞌ.
