Markus 6:30-52

³⁰Yesus Nina hophopon man laa raderre radauledi Lirna Wawa'an enihe wali mai roro Yesus pakromo wuku wali'ur, leke loikaru rira nala'la'a lirna la'an.

³¹Hir waliyedi ne, ri nammori mai mamani, de kar lernala leken ra'ak romun. Ende Yesus naka'uk hi, “Pap mie, mai kala'a onno ma namlina namkai, warnala tarana.”

³²Ende hir ha'a laa korkoro wawan hopol laa onnida man ri kan holie.

³³Enimaa ri nammori po'on hi rala'a. Enime'ede ida man konohi ida na'ahenia, “Yesus hopoledi me'e. Mai ik lolo kalla ro kala'a halhala leke ik koluwedi Yesus la onno man hir lalaa eni.”

³⁴Yesus rakanedi ro, An do'on heri rahu onneni ne, Ai raram penu rehi ono hi raisa pipduma ma na'alehe man hurie. Ende An min lolo onne, An wakuku Makromod Lalap Lirna Wawan nammori hi.

³⁵Rakan lere na'akeki helem me'e, Yesus Nina man lernohi pakunohi mai ra'ahenia, “Pape, lere helem me'e. Mai eni noho mamun,

³⁶de wa'an rehi hopon heri rala'a here, leke lar weli hanana'an leke-leke man ranrani eni, ra'an.”

³⁷Enimaa Yesus na'aheni, “Mi mehe mala hanana'an, hi ra'ane.” Hir polletilu ra'ahenia, “Idei! Ainim kupan kan nokor lam weli roti hi na'akeme ra'an! Lo'o ik na'akeme howok rakan wollo ida mene ik lernala kupan man nokor laa weli roti heri rahu eni ra'ane.”

³⁸Ai na'ukani hi na'ahenia, “Roti aile, ka? Mim lam tolle ke'e.” Ende hi lar tolle, wali mai konohi Yesus, “Roti kem wolima noro i'in kem woro'o mehe.”

³⁹Kame'ede Yesus hopon heri onnenihe raikoro penek wawanne, hi'i lopun-lopun.

⁴⁰Lopun heruwali muku ri wellima, lopun heruwali ri rahu ida.

⁴¹Enime'ede Yesus nala roti kem wolima noro i'in kem woro'o onne, niliha'a laa wawan napanak trimkasi Makromod Lalap. Horu, An a'un roti nala kanile Nin man lernohi pakunohi enihe leke ha'ar heri ra'an. An uku i'in kem woro'o heri na'akeme ra'an haenhi.

⁴²Ende heri na'akeme ra'an hehen nanumene pehur mouwedi.

⁴³Horu ne, man lernohi pakunohi ra'ukwuku roti noro i'in ma narehi lunu idaweli woro'o penpenu.

⁴⁴Lere onne aki mo'oni ma na'ak enihe mehe riwan wolima (maeke noro tatan'ukun kar aki makun).

⁴⁵Hi ra'ak horu ne, An hopon Nin man lernohi pakunohi ha'a laa korkore hopol rolu laa leke Betsaida ma aile oir lapa wali. Enla An hopon heri onneni wali wali'ur laa rir lekloie.

⁴⁶Hi rala'edi mene Yesus wakiha'a laa wo'or ida leke hi'i lir napanak Makromod Lalap.

⁴⁷Alamedi me'e, korkoro man lernohi pakunohi haha'ale aiyedi oir lapa toro me'e, la Yesus memehedi lolo ro makun.

⁴⁸An po'onala hi kar wainnala korkoro me'e onno kahi anne nammori rehi kukuwala hi. Ende rakan noho roropeni, Yesus nala'ala'a lolo oir ulikne mai wakuraniyedi rir korkoro eni me'e.

⁴⁹Ai na'akeki lewenedi rir korkoro mene hir do'on Ai nala'ala'a lolo oir ulikne. Hir do'on ne, hi ramka'uk rehi ono hir pene'ek hir do'on maki hamarane. Ai ne'el hi, “Karkaramedi! E'eni Maya'u. Yono mamka'uk!”

⁵¹An ha'a laa korkoro wawan, ideweni kahi anne namlinedi. Hir polletilu ra'aheni, “E'eni inhoi pe?”

⁵²Kade eni nanumene hir do'on Yesus nala roti tarana hi'i namwali nammori, maa hi ka rahinoroknala panaeku onne wake'e ono hi akin kerhe.