Marku 6:30-52

³⁰Te vaengah caeltueih rhoek te Jesuh taengah tingtun uh tih a saii neh a thuituen uh boeih te a taengah puen uh.

³¹Te vaengah amih te, “Nangmih tah namamih bueng mah khosoek hmuen la halo uh lamtah rhaih duem uh dae,” a ti nah. Aka voei rhoek neh aka bal rhoek te muep a om vaengah buh caak ham pataeng hoeng uh pawh.

³²Te dongah amamih bueng khosoek nah hmuen la lawng neh cet uh.

³³Amih a caeh uh te a hmuh uh tih muep a ming uh vaengah, kho tom lamloh kho neh capit uh tih ana lamhma uh coeng.

³⁴Tedae a caeh vaengah hlangping te muep a hmuh. Te vaengah tudawn aka om pawh tu rhoek bangla a om uh dongah amih soah a thinphat tih amih rhoek te muep pahoi a thuituen.

³⁵Kholaeh tue a pha coeng atah, a hnukbang rhoek loh amah te a paan tih, “Khosoek hmuen la om tih a tue khaw kholaeh coeng.

³⁶Amih he n'tueih daengah ni a taengvai kah lohma neh vangca la cet uh vetih amamih caak te khaw a lai uh eh,” a ti na uh.

³⁷Tedae Jesuh loh amih te a doo tih, “Amih te caak koi nangmih loh pae uh,” a ti nah. Te vaengah amah taengah, “Ka cet uh vetih denarii yahnih phu vaidam ka lai uh mako, te phoeiah amih caak te ka paek uh mako,” a ti uh.

³⁸Te vaengah Jesuh loh amih te, “Vaidam meyet na khueh uh? Cet uh lamtah so uh lah,” a ti nah. Te daengah a ming uh tih, “Vaidam hluem nga neh nga lung nit om,” a ti na uh

³⁹Te phoeiah amih te, khopol hing soah a boel boel la boeih ngolhlung sak, ham a tueih.

⁴⁰Te dongah sawmnga ah yakhat ah hloep hloep ngol uh.

⁴¹Te vaengah vaidam hluem nga neh nga lung nit te a doe. Vaan la oeloe tih a uem phoeiah vaidam te a aeh tih hlangping paek ham a hnukbang rhoek te a paek. Nga rhoi te khaw boeih a rhek.

⁴²Te vaengah boeih a caak uh tih hah uh.

⁴³Te phoeiah nga neh vaidam kah a nueipil te voh hlainit dongah a bae la a phueih uh.

⁴⁴Te vaengah vaidam aka ca rhoek te tongpa thawngnga lo uh.

⁴⁵Te Phoeiah hlangping te a tueih hlan ah a hnukbang rhoek te lawng khuiah a kun sak tih rhalvangan kah Bethsaida la lamhma phai ham tlek a tanolh.

⁴⁶Amih te a phih phoeiah thangthui ham tlang la cet.

⁴⁷Hlaem a pha vaengah lawng te tuili kah laklung ah om tih amah bueng lan ah om.

⁴⁸Hnukbang rhoek te khohli loh a kingkalh la a mang dongah lawng a kaih loh a ngawn a hmuh. Khoyin khonoek pali vaengah tuili soah cet tih amih taengla pawk. Tedae amih khum tak hamla a ngaih.

⁴⁹Tedae tuili soah a caeh te a hmuh uh vaengah mueihla ni tila a poek uh tih pang uh.

⁵⁰Amah te boeih a hmuh uh vaengah thuen uh. Tedae amih te tlek a voek tih, “Ngaimong sak uh, Kai ni, rhih uh boeh,” a ti nah.

⁵¹Te phoeiah amih taengah lawng dongla luei tih khohli khaw paa. Te dongah amamih khuiah a nah la mat limlum uh.

⁵²Vaidam kawng pataeng hmuhming uh pawt dae a thin te a ning sak uh.