Maga 6:30-52

³⁰Abosolo dolö amoli Yesu neebea obëgëlahilä ilia hamoi amoge mala olelei amoge sulubadela ema säla ïaha nelo.

³¹Udia dolö afu mafusalea ili molö molö fu made beasebegi, Yesuea ilima sähalea, Udia dolö madeido dihilido hele namolö mofiamalola säi.

³²Amala säsebegi, hilido ödä dudaia filahilä udia dolö madeido afiai.

³³Ili awäha nebegi, udia dolö yafiea bealahilä ili awäha gabula helësëi. Amala awäha gabula helësëlahilä ili gaamu elögi elögila nagadabodo baluluia awälahilä ili moholö awäsebea ami ilidale dafidi awäla beselagalai.

³⁴Ili awäla e ödä agesua aliga alogolahilä beahamelebe udia dolö yafie nefolalebe melï. Ili sugua sibi sigi aligilo madesalea hilido aligilo amo gadola neebe amo bealahilä ili bobasëi. Amalebe ea ado mala yafie ilima olelesa nelo.

³⁵Segeyo amo gala deadisebegi, ïe bëgëla aulo amolia e neebea maalahilä ema sähalea, Sege udia dolö maadeiawi nebegimu hä deadifalï gabumelë.

³⁶Udia dolö nefolalebe goli afialahilä hili molö bidia nimolö sagai mosö dibea amige gaamu holöfalï dibea amige hogola afiamalamola säi.

³⁷Amala säsebegi, ea ilima säla obëgësalea, Ili molö muäia dilia ïmalola säi. Amala säsebegi, ilia ema säla obëgësalea, Muni gina hädali äudäea beledi ili muäia neala ïmolö afiadulela nabi.

³⁸Ea ilima sähalea, Beledi aboläia ägüi walebelela bea mosöla säi. Bea awälahilä ilia ema sähalea, Beledi bia seme äudäla amomu ägülubela säi.

³⁹Amala säsebegi, ea ilima sähalea, Udia dolö giisidaia gegedola fifigimalamalola säi.

⁴⁰Ili odoada hädali afädë, amase, odoada nabülasi bia amoli gegedola fifigisa maadei.

⁴¹Amala fifigi dibegi ea beledi bia amoge seme äudä amoge naaboea gaula nea selesaia mosöa sida adogola nea Godema nesegelahilä ïe bëgëla aulo amolia udia dolögali sogomäia beledi dagabodasila ï. Amala hamolahilä ea seme äudä amo dagabodasilahilä ili sulubadelagali mogela ï.

⁴²Udia dolö sefolalo amoli dofea naha maadei.

⁴³Amala hamolahilä ilia beledi semege nahalea fea digai amo neala adu giwilasi amogi salala nobala negei.

⁴⁴Dolö ami beledi mai amolimuda dausini bia.

⁴⁵Fodolofalï Yesuea ïe bëgëla aulo amolima sähalea, Dilidale dafidi ödä dudaia fila oeabo dëgëla alogodi sege ëi Bedesaida mosöla säi. Amala sälahilä udia dolö gegedoi amolima sähalea, Dili mosöa dusula afiamalola säi.

⁴⁶Dili hawio afiamalolahilä eda segebidaia ami Godebalä adomolö asi.

⁴⁷Ïe bëgëla aulo amolimu ödä dudaia fila asi oeabo mogogi gasise amo gaalu, Yesu e hïdo segea ami nelo.

⁴⁸Yesuea ami nea beahamelebe fo du busamadila maase amea ödä adelo i amea gelola adimolö ïliawasebe melï. Haea gämolö amo gaalu, e ödädabodo ili neebea moholö asi. Ili amilahilä baagila äudulä awäsebe

⁴⁹amo gaalu, ilia beahamelebe e ödädabodo maasebe amo melï. Bealahilä mugabeledula helësëlahilä üalai.

⁵⁰Ili sulubadelaea bealahilä edefademalä bedäsebegi, ea ilima fodolofalï sähalea, Asigi gelomalo. Nemelë. Bedämabiola säi.

⁵¹E maala ilibalä ödä dudaia fii amole fo made maala damula negei. Amala hamosebegi, ilile asigigi edefademalä fudugi.

⁵²Iliada beledi ï amoïe mida fädäla made helësëi nelo amea fudugi. Ilile iso asigi galadigi nelo.