Marcos 6:30-52

³⁰Despues el maga dicipulo ya bira con Jesus, y ya habla sila todo el que ya hace y enseña sila.

³¹Entonces ya habla le canila, “Anda ya lang anay kita na lugar donde nuay otro gente, para puede descansa un rato.” Ya habla le ese cay mucho gayot gente ta man anda y viene, y si Jesus pati su maga dicipulo nuay mas tiempo masquin para come.

³²Entonces ya embarca sila na vinta para anda na lugar donde nuay gente, y sila sila lang talla.

³³Pero cuando ya sale sila mucho gente ya mira canila y ya conoce tamen. Poreso aquellos maga gente de donde donde pueblo, ya corre gayot. Y ya llega pa sila una que con Jesus y con su maga dicipulo.

³⁴Cuando ya desembarca si Jesus ya mira le con el manada de gente, y ya tene le grande lastima canila cay igual sila como el maga carnero que nuay pastor. Y despues ya principia le enseña canila muchas cosas.

³⁵Cuando tarde ya gayot, el di suyo maga dicipulo ya atraca con ele y ya habla, “Señor, bien tarde ya gayot, y este lugar lejos na pueblo.

³⁶Manda ya lang anay con el maga gente anda na maga barrio y na maga lugar donde ay puede sila compra alguna cosa para puede sila come.”

³⁷Pero ya contesta si Jesus canila, “Ustedes ya lang dale come canila.” Ya contesta tamen el maga dicipulo, “Masquin ay compra pa kita el valor de dos cientos pesos de pan, hende pa kita ay puede dale come canila.”

³⁸Y ya habla si Jesus canila, “Anda dao mira si cuanto bilug de pan tiene ustedes.” Cuando ya sabe sila cuanto bilug de pan lang tiene alla, ya habla sila con Jesus, “Tiene lang came cinco bilug de pan y dos bilug de pescao.”

³⁹Despues ya manda le con el manada de gente senta man grupo na zacate.

⁴⁰Entonces ya senta sila y ya forma mucho grupo tiene de cincuenta y tiene de ciento.

⁴¹Despues ya saca si Jesus el cinco bilug de pan y el dos bilug de pescao, y ya alsa le su cara na cielo, y ya dale gracias con Dios por el comida. Despues ya hace le pedaso pedaso con el pan y con el pescao. Y ya dale ese comida con el maga dicipulo para distribui con el maga gente.

⁴²Todo el maga gente ya puede come hasta ya man busuk gayot.

⁴³Despues el maga dicipulo ya puede pa recoje doce alat lleno del maga pedaso pedaso de pan y de pescao.

⁴⁴Aquellos quien ya come el pan tiene cinco mil hombre.

⁴⁵Mientras si Jesus ta manda volve con el maga gente, ya manda tamen le embarca na vinta con el di suyo maga dicipulo, para man una ya na Betsaida, aquel pueblo na otro lao del mar.

⁴⁶Despues de dispidir le con el maga gente, ya anda ya le na un monte para reza.

⁴⁷Y cuando ta cerra ya el noche, el maga dicipulo talla na mar na di ila vinta, y si Jesus solo solo lang na aplaya.

⁴⁸Despues si Jesus ya mira que ta pasa sila tormento para man saguan, cay el viento contra canila. Y cuando madrogada ya, si Jesus ya anda para canila caminando encima del agua, y ya pasa ya lang era le de lo largo,

⁴⁹pero cuando ya mira sila con ele ta camina encima del agua, pensaba sila un vision ele, y ta grita gayot,

⁵⁰cay bien tiene gayot sila miedo. Pero ya grita le dayun canila, “Tene animo, no tene miedo! Si Jesus lang yo!”

⁵¹Despues ya entra le na vinta junto canila, y ya perde lang el viento. Y el maga dicipulo bien asustao pa gayot,

⁵²cay nuay sila acorda el poder que ya dale mira si Jesus cuando ya hace le el milagro con el pan, cay nuay ese entra na di ila entendimiento.