Mak 6:30-52

³⁰Ema Yesu meni iyetinua ami Yesu nana ena auniro ge tugata inoise bua wewa awa dapikarago numore sewa awa.

³¹Ota erama saisai Yesu nana muro baro awinoiwa Yesu ata bua mai nusore nena naira be tepo wenua. Ago wenu giro Yesu meni bua mai nusore ego senua awa, “Mukai. Nakai imata baro so erama tepora ena zanatianekai.”

³²Ago sero nukare wara witiro so erama tepo amira bayamu susauwa

³³erama saisai nata serora ami nukare susauwa giro kora-kora ama ganero bamuwa awa.

³⁴Yesu wa doro witi ete niro ema diti bamubake awa giro nukare emo zo amunua. Nera kota, nukare pu mamai meni mia kau inoise nowera ago ine. Ago giro zo amuro nu nukare ge tugata-magata inoinu

³⁵tua zizinoinu giro bua mai nuso meni nuso nana zorage muro numore ego sewa awa, “So ewa so waya. Nena nai tepo. Tua zizinoya,

³⁶are ni ema bama duasa baro nena nai nusokare pumamu nata zora-zara itera amira bayare.”

³⁷Ago sewa nu ego senua awa, “Ninekare nena nai potiu nare.” Ago senu nukare numore ego sewa awa, “Nakare baro ame moyai 200 kina meni zuma gaero numorekare potanakare narise tosa?”

³⁸Ago sewa nu numorekare ego senua awa, “Ame moyai nikare nazo ni? Bamuu, gawe.” Ago senu nukare baro giro noko muro ego sewa awa, “Ame wana dare wo etore gege itera.”

³⁹Ago sewa nu eramare ego senua awa, “Nikare dubu sero dopero gras uwiwai tame arumuu.”

⁴⁰Ago senu nukare dubu sero arumuwa; dubu eni erama 100, dubu eni erama 50, ago wero arumuwa awa.

⁴¹Yesu meni ame wana dare wo etore puro iri utura niro Anuture kokopai asero ame awa eweweniro bua maire potinua awa. Awa bua mai meni eramare potarise sero ago wenua awa. Nu wo eto puro totoumuro kanowenu erama dapikarago ami pumuwa.

⁴²Nukare dapikarago niwa te wenua awa.

⁴³Ago wero nukare ame itatare wo itatare dara potiwa kana 12 te wenua.

⁴⁴Ema nena niwa amira namba nusokare awa 5,000.

⁴⁵Yesu meni bua mai nusore ego senua awa, “Nikare wara witiro ziriniro enibara Besaida nate gita bayamunowa. Na ema bama bozarise sero duamunona.”

⁴⁶Ago sero nu nukare gita iyetinu bamuwa nu isa samu sero dirumura witinua awa.

⁴⁷Are tua zinu wa ou ubu soe tiara noinu Yesu imata ete itinua.

⁴⁸Ago itimite bisi meni nukare dero pumunu nukare wa dawaira yaya tapinoiwa awa ginua. Ago giro pina atamu inoinu amire nu ou ubu tame aita wero nusokare nana bayamu sero bamunua. Nu nukare dainamu sero inoinu

⁴⁹nukare nu ou tame aita inoinua awa giro nu ititi zota asero zawa gatewa.

⁵⁰Nukare zawa gatewa. Awa nera kota, nukare nu giro azu wero wetu wana zipewa. Ago wewa giro nu numorekare eya ego senua awa, “Nikare zewai wewo. Nama awa. Azu oko wawe.”

⁵¹Ago sero nu wara witinu so bisi denua. Ago wenu nukare yaka asewa.

⁵²Nera kota, nukare tani Yesu meni ame eramare potinua amira susu kaka gamu. Giti munu nusokare omata me omata ine.