San Marcos 6:30-52

³⁰Jesús pitorobivi, apóstolevi, naviabanajetarubena Jesúsjavaberena. Nexata bajarapamonae Jesúsjavabelia navajunupaeba daxita pacuene exanavanapa, pacuenia ata jivi livaisi tsipaebavanapa.

³¹Nexata Jesús jumaitsi bajarapamonaejavabelia: —Naxanitsia. Ponatsi pesajinaejavabelia. Nacueraevetsianatsi caeepatoyo, jai Jesús. Bajarapacuenia Jesús jumaitsi pijajivijavabelia tsipaji jivibitsaëtoxanetonë topatabiabatsi. Itsamonae naviabaponabiaba. Itsamonae juya patabiaba. Nexata Jesús pijajivi pebarënabaninexa, apo cuenecaëjëpabiabitsi.

³²Nexata Jesús ëpijajivi jerata yajavapona itsabelia jivi ajibi.

³³Itsiata jivi ayaibitsaëtoxaneto pëtanetsi Jesús peponaejava. Nexata itsabelia Jesús pona, matatsënëa pënacujinaerubenatsi daxita tomaranëpijivi. Caranata Jesús pevajënaeyabelia pata bajarapamonae.

³⁴Itsa baja Jesúsbana nonobajunaya jeravecua, Jesús tane jivibitsaëtoxaneto. Nexata Jesús bajarapamonae itaxutobejiobiatane. Nexata Jesús bajarapamonae sivajamatabëjumaitsi mapacueniaje: —Pacuenia baitsi ovejabitsaëtoxaneto itsa toajibitsi pevetsinëtsi, bajara itsi mapamonaeje, sivajamatabëjai Jesús. Nexata Jesús ayaicuenia livaisi tsipaeba bajarapamonaejavabelia.

³⁵Itsa baja bitso caniviyotsia, Jesús pijajivi cujibarenatsi. Jumaitsitsi: —Caniviyo rabaja bitso. Majota ajibi pexaejava. Tsipaji itsajivi ata pijabo apo xainae.

³⁶Itorobare baja jivi peponaenexa imoxoyo penaetomaranëjavabelia pecomuacaenexa pexaejava, jaitsi Jesús pijajivi.

³⁷Jesús nexata jumaitsi pijajivijavabelia: —Paxamë parajure pexaejava, jai. Nexata Jesús pijajivi jumaitsi: —¿Paponaenajë tsaja tomarabelia patacomuatsinexa pan doscientos denariota bajarapamonae pexaenexa? jai Jesús pijajivi.

³⁸Jesús icatsia jumaitsi pijajivijavabelia: —¿Detsa papanbëbeje paxainame paxamë? Pataema copiata, jai Jesús. Jesús pijajivi petaecujinae tsipaeba Jesúsjavabelia. Jumaitsi: —Paxainajë saya cinco papanbëbeje, anijanëyobeje dujuainëyobeje yajava, jai Jesús pijajivi.

³⁹Nexata Jesús itoroba daxitajivi penaenexa ponajavata.

⁴⁰Nexata bajarapamonae pepobitsaëtonë natsanaeya ena. Caebitsaëtota enapona cien pajivibeje. Itsabitsaëtota enapona cincuenta pajivibeje. Bajarapacuenia caebitsaëto canacujitsia enapona.

⁴¹Nexata Jesús pita cinco papanbëbeje, anijanëyobeje dujuainëyobeje yajava. Athëbëa benaëcotsia. Jumaitsi Diosojavabelia: —Pexaniacuene panetoexaname. Panerajutame pataxaejava, jai Jesús. Bajaraxuacujinae Jesús pan epatsicacapona. Pijajivijavabelia rajutapona pepatsicacaejava. Nexata juya Jesús pijajivi pan tsicobetsana jivijavabelia. Dujuaijavaxi ata tsicobetsana jivijavabelia.

⁴²Daxita xaniavaetsia nabane.

⁴³Bajaraxuacujinae Jesús pijajivi caetuata pan, dujuai yajava, jivi peyajuvënëcopabejebijavanë. Nexata vënëba doce xuabeje bemapirecuenia pexanaejavanë.

⁴⁴Pamonae pexaejava xane, ayaibitsaëtoxaneto. Itsiata ëpebijivi namataëjëtatsi cinco mil ponëbeje.

⁴⁵Jesús jivi ayaibitsaëtoxaneto pexaejava perajutsicujinae, Jesús pijajivi bepijia runaeyaexanareca jera ënëabereca. Jesús pijajivi copiata itoroba penicabinexa puca itsapanabelia, Betsaida tomarabelia. Jesús baja jivi naviabiaexana. Bajaraxuata abaxë caenë nacopatanuca bajarajota.

⁴⁶Itsa baja jivi napëvereta penaviabijava, Jesús junaya petsutojumabetsia pevajëtsinexa Diosojavabelia.

⁴⁷Itsa baja bitso meravi, Jesús pijajivi pucaxaneto itapavecua tajë baja yanajetarubenalia. Jesús abaxë bajarapaepatota caenë nacopatanucarena pucaxanetoitapatarena.

⁴⁸Nexata Jesús tane pijajivi petoayapëbejejavatsi pevaetsijava. Tsipaji bitso joviboxaneto ayai pevajënaeverena. Bajaraxuacujinae bajayacunua, ajena matacabijitsia, Jesús pijajivi pecovëvelia imoxoyotanajetaruca. Jesús najetaruca mene itaboxoya. Rovia picani xenetsijitsia.

⁴⁹Jesús pijajivi itsa tanetsi mene itaboxoya penajetarucaejava, Jesús pijajivi jamatabëjumaitsi: —¡Petëpaenëmi raeta pejumape najetaruca! jamatabëjai. Nexata Jesús pijajivi vavajai tsaxuabi ayaijumeta.

⁵⁰Tsipaji daxita Jesús pijajivi tane bajarapacuenia penajetarucaejava. Nexata Jesús pijajivi jamatabëcuenenajunaviaca. Nexata Jesús bepijiayo jumaitsi pijajivijavabelia: —Xanë raja. Pëtsa panecujunavame. Pajamatejemamëre saya, jai Jesús pijajivijavabelia.

⁵¹Nexata baja Jesús nonolia bajarapajera ënëabelia. Ajibi baja tsaxuabi jovibo. Nexata Jesús pijajivi pinijicuenia jamatabëcuenenajunaviaca. Tsipaji tane jovibo, malataca yajava, Jesús piajibiaexanaejava.

⁵²Jesús baja picani pijajivi copiaya tane, pan tsiquirijavayomi ata, jivibitsaëtoxanetojavabelia Jesús perajutsijava. Itsiata Jesús pijajivi apo jamatabëcueneyapëtae Jesús pecaëjëpaenëcuenetsi pinijicuene pexanaenexa. Abaxë bajarapamonae ajamatabëcuenetaja.