Mareko 6:30-52

³⁰Aposolo jaŋe hae mâreŋ jufârerâ risierâ Jesurao tumaŋnehuc wiac embiŋ bambiŋ â miti mumbiŋ irec binaŋ sasawa bacnembiŋ.

³¹Bacne‐fârepie ʒiŋuc jazawec: “Warepie tuhuo ranaŋ, ira piticne juhuc âke mâteŋ‐ŋopaoc.” Ŋic wemo afecne ʒuʒuhuczi ʒuʒuhuc fisihuc ra, fisihuc ra, iŋuc ehuc domapie wemocko ŋemanahuc nânâ opâ nanʒapiŋ.

³²Eme jaŋe bucjeŋic wokeo ferâ tuhuo rambiŋ.

³³Rahapie bocjahazi hone tarac‐joparâ haene haene qaja fuserâ tiŋko biac gasackerâ bâbâni ra fisimbiŋ.

³⁴Eme Jesuzi wokeonec waharâ ŋic ŋokac guru sâko honec‐joparâ, lama soŋaŋ tâmiric tinac jumbiŋte busâqoc mana‐jarewec. Iŋuc honec‐joparâ izia fuŋkerâ mitire dâŋ bocjaha jazawec.

³⁵Ehame qâqâtâc âkesue rame honerâ motecfâcne jaŋe erao rarâ mumbiŋ, “Ʒi tuhuo juhapene qâqâtâc biac âkesue rakacte

³⁶ŋic râec‐jopatec hae ŋerakac ira rarâ nânâ furine ba nâc enʒepieŋ.”

³⁷Mupie ʒiŋuc jazawec: “Ŋoŋe ŋaŋac moc gumec‐jopaniŋ me.” Jazame mumbiŋ, “Nâŋe rarâ 20 kina nânâ furine barâ ware gumec‐jopanaŋte mukomec me?”

³⁸Eme eki jazawec, “Ŋaŋacne nânâ wezimuc fokac, ra honeniŋ.” Mume jaŋe ra honerâ âzâcnembiŋ, “Poroŋ memoc â opâ qowi jajahec.”

³⁹Eme mume ŋic jaŋe birickerâ kecɋaŋko hatane hatane ŋerambiŋ.

⁴⁰Biri moc 100, biri moc 50 iŋuc ŋerambiŋ.

⁴¹Ŋefârepie poroŋ memoc â opâ qowi jajahec rorâ sambâŋko fime feha jambuŋkerâ bazurâ motecfâcne jareme jaŋe bârâwiŋnerâ ŋic jarembiŋ. Eme qowi bâtâc barâ jareme rorâ iŋuc jaha embiŋ.

⁴²Eme jaŋe mâmâc sasawa nâ gapec embiŋ.

⁴³Ehame poroŋ â qowi tiwâne ŋerawec i ropie hurâ sasac 12 fusewec.

⁴⁴Nânâ nâmbiŋ ŋic i jaŋe 5 tauseŋ.

⁴⁵Eme izia Jesuzi motecfâcne esoc‐jopame wokeo ferâ ocniŋucpec Besaida haeopec bânierâ rambiŋ, e jahacne ine ŋic ŋokac râec‐jopaocte ŋewec.

⁴⁶Ehuc mâzoc‐joparâ nunumu gie baocte tikio fewec.

⁴⁷Eme hae ŋafeme woke riqic ʒâʒâŋiŋko ra fisihame e gâmbuŋ‐ticne tiŋko juwec.

⁴⁸Eme mâŋâŋ rambiŋkonec warewecte woke foicke‐bipiepie honec‐joparâ ŋafe furec hehec‐jekicko riqic âte âte raku jaŋerao fisirâ jowaruzo ewec.

⁴⁹Eme jaŋe riqic faio rame honerâ bawe warekac muhuc owackembiŋ.

⁵⁰Jaŋe mâmâc sasawa honerâ hâbi‐jeŋic goroŋkewec. Iŋuc epie dâŋ bacjopahuc jazawec, “Buŋeŋic mâteŋkeoc, no nahac fâkopac, mi hâwic‐ŋopaoc.”

⁵¹Iŋuc murâ woke‐jeŋicko feme mâŋâŋ niniŋkewec. Eme jaŋe maŋjeŋic omaeme niniŋkerâ ŋembiŋ.

⁵²Ine nânâ gumec‐jopawec irec fuŋne kâuc bambiŋzi maŋbâzic jaha jumbiŋ.