Marku 6:30-52

³⁰Amitthenka yahothukumana wa Yesu ni yahonttonkacera citthu cothene capankilyaya ni citthu cihilyaya.

³¹Ni Yesu ahaahimerya: Mmweeke, nirwe nipuro nowiipithyaa ni mmumule vakani, nlattu yaari enci yaarwa ni yaawa mpaka uhikhalana ukati woolya.

³²Vano yahorwaa ni ikalawa nipuro nowiipithyaa nahaariwo hata ntthu.

³³Yoonaka arwaka, enci yahocuwela ukitthu unkelaya. Ni mmatthokoni mothene yahorwaa, yeetaka vathi, nipuro nne, ni yahophiya nraci.

³⁴Wakhuruwawe nkalawani, Yesu ahoona mphwinko muulupale ni ahoonela ikiriri, nlattu yaari toko ikhontwaa cohikhalana nhaakheli. Vano ahopacera weetthuciha ukati mwinci.

³⁵Ncuwa wakelaya utthekuwa, owiitthuca awe yahomwattamerya nuunhimerya: Nipuro nna niri toko mwini, ni ncuwa notthekuwa.

³⁶Walamulele urwaa mmawaani ni mmatthokoni cowattamana wiira yathume yoolya.

³⁷Ahaakhula: Mwaavahe nyenyu wa yoolya. Na ale yahonhimerya: Wothuma mikatthe cowavaha atthu ale othene, nimphavela ncurukhu iminya piili.

³⁸Yesu ahopwahera: Nhaana mikatthe mikavi? Nrwee moone. Anakohile atthu, yahaakhula: Mikatthe mithanu ni ihopa piili.

³⁹Ahaalamulela wonkomiha atthu vakani khila nipuro mmalasini makithi.

⁴⁰Ni yaanawunkoma khila ipuwa atthu iminya ni ipuwa ikhwawe atthu hansini.

⁴¹Vano ahokusa mikatthe mithanu ni ihopa piili ni, aweehaka wirimu, ahosukurela. Ahomyaniha mikatthe ni ahaavaha owiitthuca awe wiira yakawele atthu. Ni ahaakawela ihopa piili,

⁴²na atthu ale yaholya mpaka uvona.

⁴³Ni ahocariha tho itthuttu khumi na piili ikalakathela cahanle co mikatthe ni co ihopa.

⁴⁴Vano yalilyayo mikatthe nye yaari atthu elufu thanu.

⁴⁵Nananoru ahaakhanyereriha owiitthuca awe ukela nkalawani nuulapuwela nikhopela nikhwawe no Petsayita; mwaneene alaseraka mphwinko.

⁴⁶Analasenre mphwinko ule, ahowela umwakoni, uswali.

⁴⁷Wiila waya, ikalawa yari iriyari ntthiya, ni Yesu aheemela nceresere veekhawe.

⁴⁸Woona wawe wiira yahoocya weettiha ikalawa nlattu iphyoo yanavirikana, aheekamela weeraka mapikoosa, eettaka wamaasini mpaka utthuna uhapuwa.

⁴⁹Nanso owiitthuca yamoonaka weetta wamaasini yahopuwela wiira nnepa, ni yahokhuwa.

⁵⁰Othene mweeco yahomoona ni yahotuthuwa. Mwaneene nanso aholumacera, eeraka: Mpise nrima, phi mi, nhoove!

⁵¹Wahoolo, ahokela nkalawani mwariyaya, ni iphyoo yahowukuwa. Othene yanawoova venci.

⁵²Khayeewehile ni nlelo itthu yeranele ni mikatthe nye nlattu woolipa mirima caya.