Marku 5:8-40

⁸Ni khweeli, Yesu anamwiirela: Ukhume mwantthuni mu, nnepa woohiloka.

⁹Wahoolo ahonkoha: Ncina naa tipani? Ahaakhula: Mphwinko phi ncina naka, nlattu niri enci.

¹⁰Ni yahonlepela ankhanyererihaka wiira ahomoliye nttetthe ule.

¹¹Caanalya vano ikuluwe nceresere mwaako,

¹²ni minepa coonanara cahonlepela Yesu: Nnilamulele nakele nkuluweni mmwe.

¹³Yesu ahorumelela, ni nenna nna minepa coonanara cahokhuma wantthuni ni cahokela nkuluweni, ni nikhoto nne nari toko ikuluwe elufu piili (2000) naheevonyera muntthiyani ni nahottittha.

¹⁴Ahakheli yahotthawa ni yahovira alattulaka mmawaani; na atthu enci yahowa woona itthu yeeranele.

¹⁵Waphiyaya nipuro naryawe Yesu, yahomoona ntthu avariye ni minepa coonanara noonkomile, nawanre ni nakhalanne ankhili, ni yahoova.

¹⁶Asaahiti a ntthu oovariya ni minepa coonanara ni itthu yeranele ni ikuluwe yahottonka itthu yeranele.

¹⁷Vano yahoonlepela Yesu wiira athame ilapo aya.

¹⁸Yesu ahoturuwela okalawani; ni ntthu avariye ni minepa

¹⁹Yesu khantthunihenre, nanso ahomwiirela: Urwee uwaanyaa, wamawaa ni wattonkacere citthu cothene cupankenlyaya Apwiya, ni toko ciwoonenlyaya ikiriri.

²⁰Ahokhuma wonwo, ni ahopacera uTekapoli itthu yampankenlyawe Yesu, na atthu othene yahotikhinaca.

²¹Yesu nalapuwile ntthiya ni ikalawa, ni neemenle nceresere ntthiya wahothukumana mphwinko muulupale wa atthu.

²²Ahophiya vano muulupale o nsinakoka, eehaninya Cayro, ni umoona wawe Yesu, ahonkhoromela,

²³ni ahonlepela ankhanyererihaka: Mwanaka mwanthiyana hanle vakani ukhwa; uwe unthatele matata akhale nkumi.

²⁴Yesu ahommeleela phutthariyaka ni mphwinko muulupale wamphunyereriha.

²⁵Vano, nthiyana mmoca awuva iphome iyakha khumi na piili,

²⁶ni anaweettihiya venci mmatatani mwaya mayoovoniha enci, ni arihile mihakhu cawe cothene, nanso woohiphwanya nafasi, hata iretta awe yaanavira etepacaka.

²⁷Neewile ca Yesu, ahotakaneela ni mphwinko, ni awaaka uttuli wawe ahonkwanya nihancu nawe;

²⁸aheecirela mweeco: Mena kakwanyaru cowara cawe, kimmovona.

²⁹Nananoru iphome yaheemela, ni ahoona mwirutthuni mwawe wiira ikwerere awe ihovona.

³⁰Nenna nna, Yesu, oonaka wiira ikuru awe yahokhuma mwirutthuni mwawe, ahorukunuwela mphwinko akohaka: Kikwanyile tipani?

³¹Owiitthuca awe yahomwiirela: Unawoona wiira miphwinko cinawuphunyereriha miphantte cothene, ni unakoha: Akikwanyile tipani?

³²Nanso Yesu ahoweha nceresere aphavelaka umoona ntthu apankile itthu ile.

³³Vano nthiyana ahocuwela ciheeranya mwirutthuni mwawe oovaka ni athukumelaka ahokhuma ahonkhoromela Yesu ni ahonhimerya citthu cothene.

³⁴Ni ule ahomwiirela: Mwanaka, ukupali waa uhowoopola. Urwee ni nnema ni uvone ikwerere aa.

³⁵Yesu uulumacaka ninlelo yahowa atthu akina akhumaka inupa awe muulupale o nsinakoka phwiiraka: Mwana aa hokhwa.

³⁶Yesu, nanso, neewile moolumo ale, ahomwiirela muulupale o nsinakoka: Uhituthuwe, ukupaliki paahi.

³⁷Ahaateliha othene wiira: Hikivelele ntthu, hikhanle Peturu, Yakopu ni Yohani, nhimaawe Yakopu.

³⁸Uphiya waya uwaanyawe muulupale o nsinakoka, Yesu aheewa ikuttho yuulupale ya atthu enci yunlaka mpani.

³⁹Ni akelaka, ahaahimerya: Ikuttho ila wunla nwe isiyani? Mwana uyo kakhwile, narupa paahi.

⁴⁰Nanso atthu ale yaananthyaa, Yesu ahaakumihera utaa atthu ale othene ni aakusaka athumwane na anumwane, na ale yammelenle, yahokela mpani mwataleliye mwanamwane.