San Marcos 5:8-40

⁸Cuatjin cachja cha ta tsëhë xi ha tichja Jesús xi cuetjuxin xitsehen jan tsëhë xahasen rë cha.

⁹Sehe cavinenguise me ñihi rë cha. Hane cafayangui cha tsëhë me cuitjin: ―‍Ñihi naha ne, Sindadu Cjín, tsëhë xi jemu cjín ngayin.

¹⁰Sehe jercu cafehya cha cojo Jesús xi hacuiin cjín camaha tsingatju me xitsehen jan tsëhë cahndë́ vëhë.

¹¹Jinguyëjë rë xi cuatjin tijima ne, ngajan tiñataha ne, tacun ngu cahndë́ hiscan chu chinga hinchataha chu tijinë chu.

¹²Hane xitsehen jan ne, ña yuma chja cojo Jesús cachja cuitjin: ―‍Ningatjun niji hiscan siutaha chinga, xi cuisihin cahntsua xahasen rë chu.

¹³Hane Jesús ne, joho cachja me. Hane hora xi cavetju xitsehen xahasen rë xihin jan ne, quiji cavisehen cahntsua xahasen rë chinga jan. Sehe yëjë ni chinga jan, xi meje jo mil jan ne, cavanga chu quiji cavetje chu ngu ndetjun tsëhë rcu naxi hane ngajan cavixuya chu ngajñi laguna. Ngajan camiji rë chu, hane cahme chu.

¹⁴Hane cha xi titsicjén rë chinga jan ne, cavanga cha quiji cha. Casua cha camachaya rë xuta xi siutaha nguijña, cavechu hisca nandya cachja cha. Ngajan xi xuta xi cahndë cjua jan ne, quiji cavutsejen me mé xi camá jan.

¹⁵Cafehe me hisca tacun Jesús, hane cavëë me cha xi jemu cjín xitsehen caxincha xahasen rë, tacun cha, yaja cha tsjian rë cha, hacuaha ha quihndë tsajin mé má rë cjuatacun rë cha. Hane xuta jan ne, jemu catsacjun me camá.

¹⁶Hacuaha xuta xi cavëë hacutjin cavatju cha camá hacuaha hacutjin cavatju chinga camá ne, cachja me cojo xuta xi yahnga.

¹⁷Sehe cavetsihin cachja me cojo Jesús xi catje me tsëhë ladu rë me xi cuicun vi.

¹⁸Hya xi camá ne, hora xi tivisehen Jesús barcu ne, jercu cafehya cha xi caxincha xitsehen xahasen rë jan xi cjue cha cojo me.

¹⁹Peru Jesús ne casuaain me cahndë́ xi cjue cha. Hane cuitjin cachja me cojo cha: ―‍Tjihin ndya riji. Tjihin tjengui xuta riji, hane tinoje cojo rë me xi Nina ne, camayuma rë me ngaye. Hacuaha tinoje tsëhë cjuandaja xi casahmi me cojo ri.

²⁰Ha xcun xi cafë cahndë cha cjua xi cachja Jesús ne, sehe cavetju cha quiji cha ladu hiscan xi hmí rë Të Nandya. Hane cavetsihin cha casuacuenda cha cjuandaja xi casahmi Jesús cojo cha. Sehe xuta xi siu cahndë́ jan ne, jemu quijircun rë me.

²¹Xi tu cavuya nga Jesús cojo barcu ladu vihi tsëhë laguna ne, jercu catsë nga xuta hiscan cafehe me tjehen laguna.

²²Hacuaha cafehe ngu xutaxa rë yungun rë ngu nandya. Cha vëhë ne, Jairo hmí rë cha. Hya xi cavëë cha Jesús ne, quiji cavixcuhnchi cha xcun me.

²³Sehe jercu cafehya cha favor cojo me. Cuatjin cachja cha: ―‍Quihndi naha ne, ha tu hora sa xi cueya na. Cuanguen ne, cuisanu ntsun na ne, cojo sa xi cumandaja na, hane cuejña sa na cjuahñu.

²⁴Xi tu cahndë Jesús cjua rë cha ne, sehe quiji me cojo cha. Hacuaha jemu cjín camahani xuta quiji me hacutjin quiji Jesús. Quiji hnchun hnchun me cojo me.

²⁵Hane ngajñi rë xuta jan ne, jiyajñi ngu chjuun xi ha nduva tejó nu xi hmu rë na tsëhë chíhin xahmajni.

²⁶Hane jemu jyë cjuañihi cavatju na camá ta ha ndasa jemu cjín doctor catsirqui me na, tu mahya catsicjë na tujún rë na ta tsajin mé cavetjucaa. Tu hitsë sa jyë camá chíhin rë na.

²⁷Xi tu cahndë na cjua tsëhë xcusun xi casahmi Jesús ne, quiji tiña na taha ngaxtun me, cavetahatsja na tsjian rë me.

²⁸Cuatjin casahmi na ta catsingatahacacun na cuitjin: “Sá xi cuetaha ntsa ndastu tsjian rë me ne, cumandaja ngahan.”

²⁹Hane ngutjen ni caxiya jni xi vixu rë na. Hane hacuaha camachaya rë na ta camandaja na tsëhë chíhin xi má rë na.

³⁰Jesús ne, camachaya rë me xi tjin xa xi casahmi ngahñu rë me. Cavuya me taha ngaxtun me ne, cavutsejen me xuta jan ne, sehe cavinenguise me cuitjin: ―‍¿Yo xi casatëtsja tsjian naha?

³¹Sehe ngajan xi cha ladu rë me jan ne, cachja cha cojo me cuitjin: ―‍¿Hacutjin meje nuju xi cuinújin yo xi casahmi? ta ha chutsujun xutacjín xi ña tisatëtaha me ngayun ndya jan.

³²Sehe cavutsejen nga me xuta tahndee rë me ne, ¿yo xi cuatjin casahmi?

³³Sehe chjuun xi casahmi jan ne ta ha vëë na hacutjin cavatju na camá ne, ña fatsë na xi catsacjun na camá. Sehe quiji cavixcuhnchi na xcun Jesús, hane cachja na yëjë ni hacutjin xi cjuaquixi.

³⁴Sehe ngajan xi Jesús ne, cachja me cojo na cuitjin: ―‍Ha camandaja ngayun ta camacjain nuju. Tjangun cojo cjuasua ta chíhin vë ne, ha quihndë cuyaain suaxti nuju.

³⁵Jinguyëjë rë xi Jesús tichja cuaha me ne, canduva ngujo me tsëhë ndava xutaxa rë yungun jan. Hane cuitjin cachja me: ―‍Ha cahme quihndi nuju. Tahanndyaan sa rë maestru.

³⁶Peru Jesús ne, handasa cahndë me cjua xi cachja me xi cafehe jan ne, sehe cachja me cojo xutaxa rë yungun jan ta: ―‍Xi camacjiintacun. Ningatuhuntacun ni xi cumandaja na. ―‍Cuatjin cachja Jesús.

³⁷Sehe casuaain me cahndë́ xi cjue yëjë xuta jan. Suva ni cha Pedru, cha Jacobo cojo cha Juan hntsë cha Jacobo, cha vëhë quiji cha cojo me.

³⁸Xi cafehe me ndava xutaxa rë yungun jan ne, ngajan siu xutacjín xi jihnda me jindaya me ngatsë rë cjuandusin.

³⁹Hane xi cavisehen Jesús ndihya ne, sehe cachja me cojo xuta jan cuitjin: ―‍¿Mé má cuatjin va má ngayun chjihndun? Na lihndi vë ne, hacuiin cahme na ta jiñafë na. ―‍Cuatjin cachja me.

⁴⁰Sehe ngajan xi xuta xi siu jan ne, tu vejnucjëë me tsëhë cjua xi cachja Jesús. Sehe ngajan xi Jesús ne, catsitëë me xuta xi siu jan candatsen. Hane suva ni nahmi rë nima quihndi cojo naa rë cojo cha xi ticojo me cavisehen me cojo hiscan jiña.