Mark 5:8-40

⁸Kata Iesu nikasike i wona, “Kanuma goyona, niko sebare ke kasibau taveyei!”

⁹Damanina ba Iesu i toirubai, “Kom kam waba kotoi?” Ba sebarena i kaobeyei, “Kau waba Legion, kairavina yakai pesarikai niko sebare kamonai.”

¹⁰Ba Iesu i baba tupetupeni kata kega iti poraisi nao kupura sita kasibau taveyei.

¹¹Ba namai koya baranai poro yabosi si kamkam.

¹²Kata kanuma goyogoyosi Iesu si babai si wona, “Ki poraikai nokosi poro kurisi, kata kana riu ku kamosi.”

¹³Ba Iesu i damanina wai, kanuma goyogoyosi sebarena si kasibau taveyei ba si nae poro ku kamosi si riu. Ba porosi ereonowasi asi 2,000 rubana, si vera si gakira ku okowa tokana ba si toma bunuwa.

¹⁴Iyabosi poro si potapotaisi wai si vera si nae ku meyaga kaikapona ba sisiyina si sisiyei. Ba pipiya si nae awaika i tupuwa wai sita kitai.

¹⁵Saba maranai si botu Iesu kurina wai, sebare kanuma goyogoyosi kamonai wai ana nota wai gairenai, i gara ba i mamana wai si kitai, wai si nagara.

¹⁶Iyabosi, awaika sebarena kanuma goyona wai kurina ba yebo poro kurisi i tupuwa si kinani wai pipiya si wonisi.

¹⁷Damanina ba pipiya Iesu si babai kata asi kupura ita kasibau taveyei.

¹⁸Ba maranai Iesu i gerugeru ku waka wai kanuma goyona sebarena i riuni wai i yawasa ba i babai kata yabata sita nae.

¹⁹Saba Iesu kega i damanina, ba i wonei, “Ke veramaga ku yove, ba Bada awaika kurim i wosei ba mekabage i nuwanuwanim wai am rakaraka ke wonisi.”

²⁰Ba sebarena i nae meyaga kaikaposi asi 10 kupurina kamonai, awaika Iesu i wosei kurina wai i sisiyei, ba pipiya si nonori wai si wareyei.

²¹Maranai Iesu wakai i garubona mena ku sepina wai tore yai i bimsiri ba koroto kaikapona si notuwei.

²²Jew biyisi asi dugu yove badana kesana kana waba Jairus i botu ba, Iesu i kinakinani wai i maere sogasoga.

²³Ba i babai i wona, “Natuku wasike ikei i gubaga saki, ba yogina ikei ina rabobo. Ke botu yarom tepanai kuna terei ba kuni yawasi kata ina mana.”

²⁴Kata Iesu yabata si nae ba koroto kaikapona si kibi ba si una raturatuiu.

²⁵Ba namai wasike kesana ana tara i vera yepo karaku bodu 12 si kakaba.

²⁶Kata bai yawasa biyisi pesarisi kurisi i nae, kairavinai i paiwara saki ba ana mane ereonowana i garu roboi saba kega i yawasa ba kana gubaga i nonowi.

²⁷Maranai wasikena Iesu warana i nonori wai, koroto kamosi yai wata murinai i botu ba kana gara i borubai.

²⁸Kairavina i nuwasuya i wona, “Kana gara wata ana borubai wai ana yawasa.”

²⁹Ba maranai Iesu kana gara i borubai wai, yagiyagina wata ana tara vera i kakaba. Ba damina i yauni, kata kona wai i yawasa.

³⁰Ba Iesu damina i yauni kata maragata i kasibau taveyei, wai koroto kamosi yai i rusinimura ba i toiruba i wona, “Kotoi kau gara i borubai?”

³¹Ba ana nonorayauna si kaobeyei si wona, “Koroto si gwagwarim ku kinanisi ba ke bitoirubu kata kotoi i borubaim.”

³²Saba Iesu i kita nanaga tupetupena, ana waina ita kuiri kotoi niko wose i wosei.

³³Ba wasikena i kuiri kata awaika i tupuwa kurina wai ere naganagarina ba ere kirokirorona i botu Iesu naonai i maere sogasoga ba awaika i wosei wai i suwonei.

³⁴Ba Iesu i wonei, “Natuku am bigeruwana i yawasim, nuwanubai ke nae ba kam gubaga i kakaba.”

³⁵Iesu karaku wata i bisisiya, ba wasaga Jairus ana yove yai si botu ba si wonei, “Natum i rabobo. Awaika kairavina bibeyebeyena biyina ke bisinikaini?”

³⁶Ba awaika si bisisiyei wai, Iesu i nonora bigarui ba Jairus i wonei, “Kega kuna nagara ki geruwana mom.”

³⁷Kega pipiya mutusi i urabaisi Peter ba James ba tuwateina John wata.

³⁸Ba maranai si botu Jairus ana ku yove wai, pipiya si tutou ba si rasarasa wai Iesu i nonorisi.

³⁹I riu ku yove kamona, ba i wonisi, “Awaika kairavina ko tutou ba ko binuwamotom. Pipiyaikei kega i rabobo; kona wai e dudauwa mom.”

⁴⁰Saba kosi si bomanibei. Pipiya i wonisi si kasibau ku matara murinai wai, pipiyaikei tamana ba sinana ba ana nonorayauna si kibi wai yabata si riu i dudauwa wai kurina.