Mark 5:8-40

⁸(I yog e re bugithin ney ni bochan e be ga’ar Jesus ngak,” Mo’onyan’, moy nga wuru’ i downgin e cha’ney!”)

⁹Me fith Jesus ngak ni ga’ar, “I mini’ fithingam?” Me fulweg fare mo’on ni ga’ar, “I Bu’ulung fithingag, ya gamad pire’!”

¹⁰Me par ngi i wenig ngak Jesus ni dabi chuweg fapi mo’onyan’ ko gi nug nem.

¹¹Ma bay ba ran’ i babiy ni pire’ ni yad ba chugur ngorad, ni yad be abich u daken sigre’en e burey.

¹²Me wenig fapi mo’onyan’ ngak Jesus ni be lungurad ngak, “Mu pagmad nggu warod ko pi babiy nem nggu yinggad ngorad.”

¹³Ma aram me pagrad. Me chuw fapi mo’onyan’ u fithik’ i downgin fa’anem mranod ra yinggad ngak fapi babiy. Ma fare ran’ i babiy ni gonap’an e yad l’agruw i biyu’ e ra milgad ngranod ra mulgad u taban bangi war ngalan fare lipath ngar limochgad.

¹⁴Me ere mil fa picha’ ni yad e ur gafaliyed fapi babiy, ngar wereged murung’agen u lan e binaw i yan nge yungi n’en ni yibe par riy yibe woldug. Me yan e girdi’ ngranod ra guyed e n’en nike buch.

¹⁵Ma fa’anra bad ngak Jesus miyad guy fa’anem ni fa’ani immoy ni ying fare ulung i mo’onyan’ ngak nike par nga but’, nike yin’ e mad ma ke sul laniyan’ ngak, ma aram e yib e tamdag ngorad ni yad gubin.

¹⁶Ma pi’in nra guyed e n’en ni rin’ fa’anem ni ying e mo’onyan’ ngak nge n’en ni rin’ fapi babiy e go’ ra weliyed e tin nra guyed.

¹⁷Ma aram miyad wenig ngak Jesus ni nge chuw ko nug rorad.

¹⁸Ma nap’an ni af Jesus ngalan e bowoch me wenig fare mo’on ngak, ni fa’ani immoy ni ying fapi mo’onyan’ ngak ni be ga’ar, “Nggu un ngom!”

¹⁹Ma de pag Jesus fa’anem ni nge un ngak. Machane me yog Jesus ngak ni ga’ar, “Mu sul ngak girdi’en e tabinaw rom ngam weliy ngorad urngin e n’en ke rin’ Somol ngom, nge gelngin e runguy nike tay ngom!”

²⁰Ma aram me yan fa’anem nge yan ngalan bangi nug ni Ragag e Binaw fithingan, ni be weliy murung’agen e n’en nike rin’ Jesus ngak; ma urngin e pi’in rung’ag e go’ ra gin gad ngay.

²¹Me sul Jesus u bowoch nga baraba’ fare lipath. Me mu’ulung e girdi’ ni pire’ ni pire’ ngak u rom u to’oben e lipath.

²²Me yib Jairus ni ir reb e tolang u tafen e mu’ulung ko gin’em, ma nap’an ni guy Jairus Jesus, me paraw nga but’ u to’oben i ay,

²³me wenig i wenig ngak Jesus ni be ga’ar, “Bay bochi pin ni fakag, ni kari ubchiya’. Wenig ngom, moy ngam tay pa’am nga daken nge gol, me siy ki yim’!”

²⁴Me un Jesus ngak ngranow. Me un e girdi’ ngak Jesus ni pire’ ni pire’ ni yad be apinpin ngak u gubin yang.

²⁵Ma bay be’ ni bpin u rom nrib gel e gafgow ni be tay, ya nga ragag nge l’agruw e duw nib m’ar nib molul,

²⁶ma ke yo’or e togta ni be yan ngorad ma der gol. Ke pi’ urngin e salpiy rok nga puluwon e taflay ni yibe tay ngak ke m’ay, machane der yodor boch ko liliy rok, ya fini aram e be ubchiya’.

²⁷Ma ke rung’ag murung’agen Jesus, ma aram me yib u fithik’ e girdi’ u keru’ Jesus,

²⁸ni be ga’ar u wan’, “Yugu ra gu math ko mad rok, ma ke muturug ni ngug gol.”

²⁹Me math ko mad rok Jesus, ma ka chingiyal’ nem me tal racha’en; me thamiy rok nike gol ko m’ar rok.

³⁰Ma ka chingiyal’ nem me thamiy Jesus nike yan gelngin nma golnigey nga wuru’ i downgin. Ma aram me cheal u luwan u fithik’ e girdi’ me fith ni ga’ar, “Mini’ e ke math ko mad rog?”

³¹Me fulweg pi gachalpen ngak ni lungurad, “Ga be guy e pi girdi’ ney ni yad be apinpin ngom; ere mang ni ga be fith ko mini’ e ke math ngom?”

³²Yugu aram rogon, machane de tal Jesus ni yigi i chachangar u to’oben ni nge guy e en nike math ngak.

³³Me thamiy fare pin rok nike gol; me yib ni be da’da’ ko marus, me paraw nga but’ u to’oben i ay Jesus me weliy salpen ngak nge n’en ke rin’ ma ke gol.

³⁴Me ga’ar Jesus ngak, “Fakag, michan’ rom ngak Got e ke gol nigem. Mman nike pagan’um, ya kam gol ko m’ar rom.”

³⁵Ma nap’an ni ka be yog Jesus e re bugithin ney, me yib boch e girdi’ u tafen Jairus me lungurad ngak Jairus, “Fachi pin ni fakam e ke aw e fan rok. Ere dakuriy fan ni ngam magawonnag e re tamchib nir.”

³⁶Ma Jesus e de mateal ko n’en ni yad be yog, me ga’ar ngak Jairus, “Dab mu rus, kemus ni nge michan’um ngak Got.”

³⁷Ma de pag Jesus be’ ni nge un ngak, kemus ni yigo’o Peter, nge James, nge walagen James ni John.

³⁸Marbad nga tafen Jairus ni ir reb e pilung u tafen e mu’ulung, me guy Jesus e girdi’ me rung’ag lamrad nike mada’ ngalang ni yad be yor ma yad be dololoy’.

³⁹Ma nap’an ni chuw Jesus nga naun me ga’ar ngorad, “Mangfan nike mada’ lammed ngalang ma gimed be yor? Ya cha’nir e dawori aw e fan rok, ya be mot!”

⁴⁰Ma aram miyad moningnag ni yad gubin, me yog Jesus ngorad ni ngranod nga wean ni yad urngin, me fek e chitamngin nge chitiningin fachi pin, nge fa dalip i cha’ ni gachalpen ngranod ngalan fare senggil ni kan moleg fachi pin riy nga but’.