MARCOS 5:8-40

⁸Re men zenga porke re Jesus lo men: ―¡Menzab, guruu lextoo ménree!

⁹Lex wnabdiiz Jesus lo men, re Ne: ―¿Txu la de? Wke men re men: ―Le noo la Legión, porke ndal nak noo.

¹⁰Orguin kesentyent wnab men lo Jesus ne yxaaldet Ne men stebkoo.

¹¹Kom ndal kuch ka gwdu guex gyeey guin ledne zu Jesus,

¹²lex wnab menzab guin lo Ne, re men: ―Lextoo kuchro guxaal noo; gudee si tee noo lextoo maa.

¹³Orguin wdee Jesus si. Lex wruu menzab lextoo mgyeey guin, watee menzab lextoo yra kuch guin. Zeg txupmil nak ma yra ma. Zegne wdee menzab lextoo maa, wzelo ma wzhoon maa wxenxtoo ma te ruyúú, wyab ma axtegue lo nis. Nga wobkyiky ma nis, wet maa.

¹⁴Orguin wzhoon yra mén ne rapkwent kuch guin, lex wa men waluu men diiz lenlgyëz no le ledne ka mén den. Lex wruu mén za men wii neguin ne wak.

¹⁵Chene wdxiin men lo Jesus, wii men le mgyeey guin ne wuu menzab lextoo che zobchee lo Jesus, che nak men xab men no che nde bnii xgyeryen men. Ne wii yra mén guin neguin, wdxe men.

¹⁶Yra mén ne wii neguin ne wak, laa men wuu diiz gan pezee wzak mgyeey guin ne nuu menzab lextoo no gan pezee wzak yra kuch guin.

¹⁷Orguin wzelo yra mén guin wnab men lo Ne ne yruu Ne xden men.

¹⁸Chene le Jesus wdee lenbark, wzelo mgyeey guin ne wruu menzab lextoo wnab men lo Jesus ne ydee Ne si tsanal men Ne.

¹⁹Per wdeedet Ne si, sinke re Ne lo men: ―Gugya ruxyuu de, gu de diiz lo yra xparyent de yra ne wlaa Dëdyuzh de no gan pezee wles lextoo Ne de.

²⁰Lex sya mgyeey guin wzelo men wuu men diiz lo mén yra gyëz ne ngab Decápolis ne nzoon guin ne wlaa Jesus men. Yrandxee mén wzee wzak.

²¹Chene wberee Jesus kon bark ke stebkoo nis ste, kesentyent ndal mén wdop lo Ne. Nga runis guin wzu Ne.

²²Zhich guin wdxiin te men ne la Jairo ne rnebééy lenydoo. Zegne wii men Ne, wzuzhib men lo Ne.

²³Kesentyent wnab men lo Ne, re men: ―Le xsaap noo che kaluzhlo. Yoo tsa be yxob nya de led nzeb chen gyaken nzeb no chen ybánre nzeb.

²⁴Orguin zanal Jesus men. Ndalyaa mén zanal Ne, noze reen men Ne.

²⁵Nga zu te wnaa ne rzhuun, che wzaa chibtxup iz ryab men ren.

²⁶Che kesentyent wak men sufrir porke noze ndal lo doctor wa men, no che wdenya yra xmed men, per bat wkyiindeto, lel mazre wak xgyelgyiz men.

²⁷Chene won men ne ruu mén xdiiz Jesus, noze lad yra mén guin wdee men, wbig men nes zhich Ne, wtee nya men led xab Ne.

²⁸Porke nuu lextoo men: “Naal pezee maske nonchee ytee nya noo led xab mén gwa, laa ne gyaken noo nga.”

²⁹No orgueguin wyaag men ren, wyenengue men ne le men che wyaken.

³⁰Orgueguin wyenen Jesus ne wneseyaken Ne te mén kon xpoder Ne. Wcheree lo Ne wii Ne lo yra mén ne zanal zhich Ne, lex wnabdiiz Ne lo men, re Ne: ―¿Txuzh wtee nya led xab noo?

³¹Orguin re yra xpén Ne lo Ne: ―Rwii de noze reen mén de, no le de rnabdiiz gan txuzh wtee nya led xab de.

³²Per zazëëdtee lo Ne noze kbii Ne chen kwii Ne gan txuzh wtee nya led xab Ne.

³³Orguin noze rzhiz wnaa guin tant rdxe men kom nan men ne laa men wtee nya led xab Ne. Wa men wzuzhib men lo Ne, lex wzëët meno zegne nak nakendxoo.

³⁴Orguin re Jesus lo men: ―Zhiina, por ne wlaleedx de noo, wyaken de. Zhaas gugya, che wbë́z xgyelgyiz de.

³⁵Benak kanii Jesus, chene wdxiin tebëd mén ne wruu ruxyuu mén guin ne rnebééy lenydoo, re men lo men guin: ―Le xsaap de che wet. Gunendetre de lo Maxter.

³⁶Per wukasdet Jesus neguin ne re men, lex re Ne lo mén guin ne rnebééy lenydoo: ―Ydxedet de; noze gulaleedx noo.

³⁷No wdeedet Ne si nyanal ndal mén Ne, nonchee Bëd no le Jacob no le Xwa bech Jacob.

³⁸Chene wdxiin Ne ruxyuu mén guin ne rnebééy lenydoo, wii Ne le yra mén ndxin roon robtsaatee.

³⁹Orguin wdee Ne, re Ne lo men: ―¿Penak noze rakrëz de no penak roon de? Wetet xsaap ménree, noze nexguees nzeb.

⁴⁰Per lel wzhidxno men Ne. Orguin wboo Ne men yrandxee men fwer. Lex wzano Ne xnaa nzaap guin no le xuz nzeb no le men ne zano Ne, wdee Ne ledne nex nzeb.