MAREKO 5:8-40

⁸Badina be Iesu ese vada e hereva henia, eto, Lauma dika e, ena tau ena amo a raka lasi.

⁹Bena Iesu ese e nanadaia, eto, Oi ladamu be daika? Ia na e haere, eto, Ladagu na Tuari Oreana; badina be ai na hutuma.

¹⁰Bena e noia goadagoada, una tano amo basine luludia lasi.

¹¹Una ororo ḡabana ai, boroma seri badana ta e nuanuava.

¹²Bena idia ese e noia, eto, Ba siaimai, boroma lalodiai baia vareai.

¹³Bena e siaidia. Taunabunai, lauma dikadia na e lasi, boroma lalodiai e vareai; bena seri idoinai hagahaga amo e rourou hekei gohu ai, iboudiai na daha-rua sisivana; bena gohu ai e maloa bou.

¹⁴A ireḡudia taudia na e heau, hanua lalonai bona uma gabudia ai harina e piua. Bena taunimanima e aru ela, e vara ḡauna bae itaia eto.

¹⁵Bena Iesu enai e kau, hari lauma dikadia ese e boloa tauna e itaia, e helai mai dabuana bona mai darana; bena idia na e gari.

¹⁶A kara e itaia taudia ese kava tauna sivaraina bona boroma sivaraidia e hamaorolaidia;

¹⁷bena idia ese Iesu e noia, edia tano amo baine raka oho eto.

¹⁸Ia na vanaḡi ai e guiva ai, lauma dikadia ese e rakatania tauna ese ia e noia, baine bamoa eto.

¹⁹To e gwaua tao, eto, Emu ruma taudia ba lou henidia, Dirava ena kara bona ena hebogahisi emu ai ba hamaorolaidia.

²⁰Bena ia na ela, Hanua Gwauta tanona idoinai Iesu ena kara ienai e harorolai; taunabunai taunimanima iboudiai e hoa.

²¹Iesu vanaḡi ai ma e gui, e heau hanai, gohu kahana ai ma eha kau, bena hutuma bada ia dekenai ma e hebou kone ai.

²²Dubu biaguna ta, ladana lairo, ela, Iesu e itaia, bena aena badinai e goru diho,

²³e noia goadagoada, eto, Natugu kekenina vada be masemu: mani aitala, enai ba dau kau, bena baine mauri.

²⁴Raruosi ela, bena hutuma bada ese ia murinai e raka, e rakaia biribiri.

²⁵Hahine ta, ena gorere na rara moru, laḡani gwauta-rua unu e goreretomava:

²⁶muramura taudia ese e hahisihisiava bona idume ai ena kohu vada e ore, a ia na se namova, ena gorere na e bada e laova.

²⁷Ia ese Iesu sivaraina e kamonai, bena hutuma bogaragidiai ia murinai e raka, ena dabua ai e dau kau.

²⁸Badina be ia eto, Ena dabua ai mo bama dau kau bena bama mauri.

²⁹Bena ena rara moru vada e doko, bona tauna ai mamina e abia ena gorere vada e namo.

³⁰A Iesu be dibana hahemauri siahuna na iena amo vada e lasi, bena hutuma bogaragidiai e gini kerehai, e henanadai, eto, Daika ese e daugu toho?

³¹Ena hahediba e haere, eto, Hutuma e raka hesedehesedemu o itadiamu, matona o henanadaimu, o tomu “Daika ese e daugu toho?”

³²A ia na e roharoha, enai e dau kau tauna e tahua.

³³Hahine na enai e vara karana dibana, bena mai garina bona mai heudeheudena ida ia vairanai e goru diho, ena kara e hamaorolaia.

³⁴Iesu ese e hamaoroa, eto, Natugu e, emu abidadama ese e hamaurimu; mai mainomu ida aola, emu gorere vada eme doko vaitani.

³⁵Ia dounu e herevava ai, dubu biaguna ena ruma amo hereva ta e mailaia, eto, Natumu vada eha mase; dahaka dainai hahediba tauna doini o haturiaiamu?

³⁶A Iesu ese una hereva e dadaraia, bona dubu biaguna e hereva henia, eto, Asio gari, bavabidadama henigu.

³⁷Bena ia ese e gwaudia tao, basie bamoa, a Petro bona lakobo bona Ioane, Iakobo tadina, idia tatoiosi mo.

³⁸Dubu biaguna ena ruma ai e kau, taunimanima e itadia, e helogoheloḡova, e tai lolova.

³⁹Bena ruma lalonai e raka vareai, e hamaorodia, eto, Dahaka dainai o heloḡoheloḡomu bona o taitaimu? Kekeni na se mase, ia na mahuta.

⁴⁰Idia ese e kirikirilaia. A ia ese e doridia lasi, bena kekeni tamana bona sinana bona ia mai barnona tatoiosi ida kekeni ena hekure gabuna ai e raka vareai.