Mak 5:8-40

⁸I wasiso lenri, uni o Iesu i sa watung tari lena, “A laulau na nion, un pirso gusun a musano ri.”

⁹Numur o Iesu i tingi lena, “A risam osi?” Ma i balu i lena, “A risang A Kabo Liur, uni a susut met.”

¹⁰Ra i saring liklik o Iesu sur gong i lakro ru tar det gusun a nubual ra.

¹¹A kabo liur na boro kura det wangon tiro milau kut una tangai.

¹²Ra a kum laulau na nion det saring o Iesu lena, “Un tulu met utiro una kabo liur na boro, sur met in ruk utiro un det.”

¹³O Iesu i mulaot ru det. A kum laulau na nion det pirso gusun a musano, ma det ruk taru una kum boro. A kum boro det kalabor pirso una palis sur a du tasi, ra det kongo rop. Det rop det elar nama ru arip.

¹⁴A taro ra det ser tabor a kabo liur na boro ra, det kalabor ma det inanos tiro utamon ma tiro utkai una kum natnat na tamon. Ra numur a taro det wan sur det in tama asau ra i wanpat.

¹⁵Ra det wanpat torom o Iesu, det tama a musano ra a kabo liur na laulau na nion numugu det sisiop taru uni. Kura mukut i kis taru, i sa pipis pas ma a nuknukino i sa talapor melet. Ma a taro ra det ngara doko.

¹⁶Det ra det sa tama tari, det inanos a taro una kum utna ra i wanpat una musano ra a kum laulau na nion kura uni, ma una kum boro kai.

¹⁷Numur a taro det saring o Iesu sur in nan gisen gusun anundet a papor.

¹⁸O Iesu i kas melet una pot, ra a musano ra numugu a kum laulau na nion kura uni, i saring o Iesu sur in nan tomo nami.

¹⁹O Iesu ke mulaoti, ikut i lena, “Un nan utiro una num a tamon torom a kum kukum, ma un inanos det una labino utna ra a Labino i sa pam tari un ui, ma una nun a marmaris torom ui.”

²⁰Ra a musano ra i wan, ma i inanos a taro tiro o Dekapolis, una labino utna ra o Iesu i sa pam tari uni. Ra a taro rop det kisin.

²¹O Iesu i kas una pot ma i wan melet utiro una ara papor du tasi. A kunur na taro det wan tomo ma det tur talilis pasi tiro una usalin.

²²Ara mugumugu tagun a rumu na lotu, a risano o Jairus, i wanpat tiro. I tama o Iesu, ra i kis butkeke sa numugu tano,

²³ma i saring dekdeki lena, “A nutunglik, a ino, i sa ling na mat. Aiap, dar in nan ma un ubek a lamam sapat netes uni, sur in langolango ma in laun.”

²⁴Ra o Iesu i wan tomo nami, a kunur na taro det muri, ma det bukus talilis pasi.

²⁵Ma ara ino kura, i misait nama gap elar nama noino ma aru kilalo.

²⁶I taramo a labino ngunungut ulaman a kum dokta, ma i urop tar anun a kum utna ra i ulengi un det. Ikut ke langolango, a misait i labo nanan kut.

²⁷I longoro a saksakutna un o Iesu, ra i wan tiro ubalan a kunur na taro, numur tan o Iesu, ma i tulan tar anun a saket.

²⁸I pami lenra, uni i nuki lena, “Ra an tulani kut anun a saket, an langolango.”

²⁹Uniutra a gap i tuk, ra a ino i taramo a pinino i langolango ma ke taramo melet a ngunungut.

³⁰Uniutra, o Iesu i taramo a dekdek i wan gusuni, i tupukus torom a kunur na taro ra i iting lena, “Osi ra i tulan anung a saket?”

³¹Anun a kum nat na ususer det balu i lena, “U tama a kunur na taro ri det talilis bat pas ui, ra u iting pepetlai, lena, ‘Osi ra i tulan iau?’”

³²Ikut o Iesu i tamtama utmakai sur osi ra i tulan tari.

³³A ino ra, i tasman a misait i sa rop gusuni, i wan ra i puku sa numugu tan o Iesu. I ngara ma i neneder, ra i inanosi nama sau ra i sa pam tari.

³⁴O Iesu i watungi tano lena, “Nutunglik, anum a nurnur i sa ulangolango pas ui. Un nan nama malmal. Anum a misait i sa rop gusun ui.”

³⁵Ra o Iesu i wasiso utmakai, a ramano kum musano ra det wan tagitiro una rumu anun o Jairus, a mugumugu tagun a rumu na lotu, det wanpat. Det watungi lena, “O nutumlik i sa mat. Gong mo u ubalon a tene ususer.”

³⁶O Iesu ke nuk pas asau ra det watungi, ikut i inanos a mugumugu tagun a rumu na lotu lena, “Gong u ngara. Un nurnur kut.”

³⁷Ke madek taio sur in muri, ikut i mulaot sur o Pita, ma o Jems dersino nam o Jon detul in muri.

³⁸Ra det wanpat tiro una rumu anun a mugumugu ra, o Iesu i tama det ra det tala, det ugaia ma det domos.

³⁹I ruk ra i watungi tandet lena, “Ilai ra mot tala ma mot ugaia nama tinangis? A inolik ri awu sur i mat, i inep dumun kut.”

⁴⁰Ra det urongon kut uni. I tulu pirso ru det rop, ikut i ben pas a taman a inolik ma o nano ma anun a tulu nat na ususer, ra detul wan tomo nami. Ra det ruk torom a inolik.