Make 5:8-40

⁸Doko, Jisasame baa lamaiyoo, “Enjele koo, embame akali dake yakinatala kamanda ipu,” leamosa dopa lea-pyaa.

⁹Dokopa Jisasame baa pisoo, “Emba kenge apipi?” lea-pyaa. Dopa leamopa akali dokome yanu pyao, “Naima longo dokonya nambanya kenge Longo lengena,” lea-pyaa.

¹⁰Dopa latala Jisasame enjele koo dutupame yuu dake yakinatala pena laa naena lao baame kongo lea-pyaa.

¹¹Mena elyambu mende yuu manda kilikili dokonya nao kateami-pyaa.

¹²Dokopa enjele koo dupame Jisasa kandao, “Naima mena dupanya koko landa pyamana dupa kalyamino dokonya pupa lapoko,” leami-pyaa.

¹³Dopa leaminopa Jisasame pena kaya-pyaa. Dokopa enjele koo dupame akali doko yakinatala mena dupa-kisa pao landa piami-pyaa. Dopa peteaminopa mena elyambu doko alo pyao pao papatale mendenya pyakatala endaki pete dokonya tumbitambi napala kumiami-pyaa. Mena dupa taosene lapoma jowapi mende-pyaa.

¹⁴Dopa piamopa mena setao katenge akali dupa paka pupala yuu taono dokonyapi mee yuupi dupanya pao lamaiyami-pyaa. Dokopa endakali dupame piamo doko kanja epeami-pyaa.

¹⁵Dupa Jisasa kateamo dokonya ipupala kandeaminopa wamba enjele koo longo paleta katenge akali doko indupa yonge pee dupa pyoo mona paliuu peteamo kandatala paka kayami-pyaa.

¹⁶Piamo doko lengeme kandeamino endakali dupame enjele koo paleta akali doko-kisa piamo dokonya lawapi dee mena dupanya lawapi endakali epeamino dupa lamaiyami-pyaa.

¹⁷Dokopa dupame Jisasa baa nyakamanya yuu doko yakinatala pena lao kongo leami-pyaa.

¹⁸Dopa leaminopa baa sipi ongonya pyakalyiamopa wamba enjele koo paleta kateamo dokome baa apata buaako lea-pyaa.

¹⁹Dopa leamopa Jisasame ongonya ŋee nalea-pyaa. Nee nalenya baa lamaiyoo, “Embame embanya andaka emba palu dupa katatamisa puu. Pupala Kamongo dokome embanya pyakalamo dupapi dee emba kondo kayalamo dokopi dutupa dupa lamaipina,” lea-pyaa.

²⁰Dopa leamopa akali dokome pupala baa-kisa Jisasame piamo dupa pitaka Dekapolisa yuu dokonya panao lamaiya-pyaa. Dopa piamopa endakali dupa pitakame sepala mona andeami-pyaa.

²¹Jisasa baa sipi dokonya pituu endaki pete dokonya yangitena dee pilyia-pyaa. Endaki pete lemba dokonya endakali kambu andake mendeme ipao baa kateasa limbiami-pyaa.

²²Dokopa Jutamanya losuu anda isingi akali dupanya mende Jaitasa lenge doko epea-pyaa. Ipao Jisasa kandatala baanya moko kateamo dosa tombauli sepala, kyoto joo dapa lao Jisasa-kisa tee lea-pyaa: “Nambanya wanenge doko kumalanya pilyamona, baa mee jetala saka pena embame ipao baa kingimi watandatalena,” lea-pyaa.

²³Dopa leamopa Jisasa baa-pipa awapa peambi-pyaa.

²⁴Dopa piaminopa endakali longome baa watao pupala katao tambukiniami-pyaa.

²⁵Enda mende ee kana kingi ita mende-kisa dee lapoma dupanya andaka nao paliti-paliti singi mende katea-pyaa.

²⁶Enda dokome dokosaa longo dupa-kisa tanda longo nao muni akipi dupa pitaka nepeamoaka doko, kuki yaka nanjoo etete koyamopa petea-pyaa.

²⁷Enda dokome Jisasanya lao pii doko sepala endakali kambu dokonya Jisasanya maita-kaita ipupala baanya yonge pee dokonya kingimi watandea-pyaa.

²⁸Enda dokome, “Nambame baanya yonge peenya iki watandato kandao doko, nambanya yaina doko mee jakalapomona,” lao masetala dopa pia-pyaa.

²⁹Kinina dokopa lee mendai enda dokonya andaka nao paliti-paliti singi doko yatu lea-pyaa. Dopa piamopa enda dokome baanya yaina doko etalumu lao masia-pyaa.

³⁰Dokopa awapa Jisasame baanya pupu lapae mendapua puumu lao sepala endakali kambu kateamino dupa kandapilyetala, “Apimi nambanya yonge peenya kingimi watandelyape?” lea-pyaa.

³¹Baanya disaipele dupame yanu pyao, “Emba katao tambukinelyamino endakali kambu doko emba tangeme kandao pituu embame, ‘Apimi namba kingimi watandelyape?’ leepe?” leami-pyaa.

³²Dopa leaminopa apimi pyaape lao kanjanya Jisasame kandayoko lea-pyaa.

³³Dopa piamopa enda dokome baa-kisa piamo dutupa pitaka masetala paka kayao walu lao ipao Jisasanya moko kateamo dosa tombauli sepala baame piamo dupa pitaka panao baa lamaiya-pyaa.

³⁴Dokopa baame enda doko lamaiyoo, “Wanaku, embame masoo minapino dokome emba mee injisetelyamo. Embanya yaina doko mee jilyamona emba mona yaepatala puu,” lea-pyaa.

³⁵Dopa lao kateamopa Jutamanya losuu anda isingi akali dokonya andaka katao akali mendapuame ipupala, “Embanya wanaku doko kumatalamona, aipa lao Mana Lenge Akali doko minao dee kenda pisetepe?” leami-pyaa.

³⁶Dopa leamino doko Jisasame soo nasili petala losuu anda isingi akali doko lamaiyoo, “Embame paka nakaenya masoo minao katape,” lea-pyaa.

³⁷Dopa latala baame endakali pitaka baa watao naepena latala Pitapi, Jemesapi, Jemesa kaiminingi Jonepi dutupa-pipa iki peami-pyaa.

³⁸Pao losuu anda isingi akali dokonya andaka kolandeami-pyaa. Jisasame kandeamopa endakali dupame pii longo lao ee lao yako lao kateamino kandea-pyaa.

³⁹Dopa petala baame andaka kolandatala dokaita lamaiyoo, “Aipuma nyakama pii longo lao ee lao kalyamipi? Wanaku doko kumala nayalamo. Baa luu palelyamona,” lea-pyaa.

⁴⁰Dopa leamopa endakali dupame baa kilya kandao gii kayami-pyaa. Dopaka doko, baame dokaita pitaka watao kamanda pyalyetala wanaku dokonya endangi takangepapi dee baa-pipa tole payamino dutupapi dutupa-pipa iki wanaku kumapae doko siamo palo dokonya peami-pyaa.