Maliku 8:17-37

¹⁷Jezu adabva bzomwe iwo akhalewa. aciwabvundza kuti, “Thangwe ranyi muli kutsutsana kuti mulibe mkate? Kodi mukhanati kuzindikira ayai kubvesesa? Kodi misolo yanu njakuuma, nandi?

¹⁸Maso munayo, tsono muniwona lini? Ndipo makutu munayo, tsono mumbabvesesa lini? kodi imwe m'nkubukira lini?

¹⁹Pale ndidagwata-gwata mikate mixanu kuti ndidyese wanthu bzulu bzixanu, kodi mudadzaza bzitundu bzingasi bza bzakusala?” Wakupfundzira wale adati, “Bzitundu khumi na bziwiri.”

²⁰Jezu adawabvundza pomwe kuti, “Kodi pale ndidagwata-gwata mikate minomwe na kudyesa wanthu bzulu bzinai, mudakonkhobza bzitundu bzingasi bza bzakusala?” Iwo adati, “Bzitundu bzinomwe.”

²¹Pamwepo Jezu adati, “Kodi mukanati kubva basi?”

²²Jezu na wakupfundzira wace adafika ku Betsaida. Kumweko wanthu adabwera na zimola, wacimukumbira kuti amukhuye.

²³Jezu adam'phata boko, acicoka naye kunja kwa mui. Adaikha mata mmaso mwa munthu ule, acimuikha boko acimubvundza kuti, “Kodi uli kuwona cinthu?”

²⁴Munthu ule adakwiza maso acilewa, “Ndiri kuwona wanthu ali kufamba-famba, tsono wali kuwoneka ninga miti.”

²⁵Adamuikha pomwe boko mmaso mwace. ndipo adapenya acipora , aciyamba kuwona bwino-bwino

²⁶Jezu adamuuza kuti ayende kwawo, acimuwuza kuti, “Uleke kubwerera ku mui ule.”

²⁷Jezu na wakupfundzira wace adayenda ku mii ya ku Sesaleya-Filipi. mu njira adabvundza wakupfundzira wace kuti, “Kodi wanthu ambalewa Ine ndine yani?”

²⁸Iwo adatawira kuti, “Winango ambalewa ndimwe Juwau M'batizi, winango ndimwe Eliya, winangombo ambalewa ndimwe m'bodzi wa apolofita.”

²⁹Pamwepo Jezu adawabvundza kuti, “Kodi imwepo, mumbati ndine yani?” Pedru adamutawira kuti, “Imwe ndimwekirixtu Mpulumusi adalewedwa ule.”

³⁰Tsono Jezu adawalamula kuti waleke kuwuza munthu winango ali-yentse bza Iye.

³¹Jezu adayamba kupfundzisa wakupfundzira wace kuti, “Mwana-wa-Munthu bzin'dzafunika kuti aboneresedwe kwene-kwene. Akulu wa Ayuda, na akulu wa azibaba wa ntsembe na amisiri wa Mtemo wacidzamulamba. Iye an'dzaphedwa, tsono zingadzapita ntsiku zitatu an'dzamuka.”

³²Bzimwebzi adabzilewa padeca Na tenepo Pedru adamutenga aciyenda naye pambali, aciyamba kumutsimula.

³³Tsono Jezu adaceuka, acinyang'ana wakupfundzira wace winango wale, ndipo adatsimula Pedru. Adati, “Coka kwa ine, iwe Satana! Ndzeru yako ndiyo lini ndzeru ya Mulungu , ni ndzeru ya wanthu.”

³⁴Pambuyo pace Jezu adacemera mthithi wa wanthu pabodzi na wakupfundzira wale kuti abwere pafupi na iye, adawauza kuti, “Munthu an'funa kunditewera, abzilambe iye yekha, ndipo anyamule mtanda wace acinditewera.

³⁵Thangwe an'funa kupulumusa moyo wace, an'dzautaya, tsono wakutaya moyo wace thangwe ra Ine na Mafala Yabwino, an'dzaupulumusa.

³⁶Kodi ndiko kuti munthu ana phindu lanyi acikhala na bzentse bza pantsi pano, iye acitaya moyo wace?

³⁷Munthu kuti alombole moyo wace angapereke ciyani?