SAN MARCOS 8:17-37

¹⁷Aj Jesúsba yuwi chich cua' mu' u yäle'ob y u yälbi ca'da: ―¿Cua' uc'a a wäle'la que mach a täsi wajla? ¿Mach to quira uyoch ta' c'ajalinla y mach to a che entendela? Tä' tzätz a pamla.

¹⁸¿Mach quira a chäne t'oc a jutla? ¿Y mach quira a ubi t'oc a chiquinla? ¿Mach quira a ni' c'ajti'ila täcä?

¹⁹Jinq'uin cä puqui cinco waj tuba c'uxnacob cinco mil winicob, ¿jäyp'e chach a ch'uch'ila de u colob? Unejob u p'ali: ―Doce chach.

²⁰―Jinq'uin cä puqui siete waj tuba cuatro milobba, ¿jäyp'e chach a ch'uch'ila de u colob? Unejob u p'ali: ―Siete chach.

²¹De ya'i u yälbijob: ―¿Mach to quira a laj che entendela cache' ayan cä poder?

²²Ji'pat de jini bixijob tä Betsaida. Jinq'uin c'otijob u bisijob untu ajchoc' bajca an aj Jesús, y u yälbijob que u täle' tuba u pojlen uba.

²³De ya'i u q'uechbi tu c'äb ni ajchoc', u pa'si tama caj. U ch'i u tub u tatz'bi tu jut, y u yäc'bi u c'äb tu jut, y u c'atbi si u chänen tz'ita'.

²⁴Jini ajchoc' cayi u jiran si u ch'e' u chen chanä, y u yäli: ―Mu' cä chänen winicob, ca' a wälä te', pero u chen xämba.

²⁵De ya'i aj Jesús u yäc'bi u c'äb cha'num tu jut. Jini winic u chi chanä y u pojli uba u jut. Upete u chänen utz.

²⁶De ya'i aj Jesús u täsqui tu yotot, y u yälbi: ―Mach ochiquet tama caj, y mach a tz'aycäben niuntu cua' u chet pasa.

²⁷Ji'pat de ni jini aj Jesús bixi t'oc u yajcänt'anob tama ni cajob tä Cesarea tä Filipo. Bixe to u chen tä bij u c'atbi u yajcänt'anob ca'da: ―¿Caxcajon u yäle' ni gente?

²⁸Unejob u p'ali: ―Ayan machca u yäle' cache' aneba aj Juan ajc'ablesialet. Otrosjob u yäle' cache' aj Elíaset. Y otrosjob u yäle' cache' ajt'anet tuba Dios.

²⁹De ya'i u c'atbijob tä cha'num ca'da: ―¿Anelaba, caxcajon a wäle'la? Aj Pedro u p'ali: ―Aneba aj Cristojet, que u täsquet Diosba.

³⁰Aj Jesús u yälbijob que mach xic u tz'aycäbenob niuntu.

³¹De ya'i u täq'ui u yälbenob cache' une que sutwäni de winic c'änä c'ac'a' tz'ibajtescac, y che' chich täcä ajt'äbälajob ta ni caj y ajnojajob ta palejob y machcatac u ye'e' ni ley taj Moisés mach uxin u sapänob. U yälbijob täcä que u xe tä tzämsinte, pero u yuxp'elib q'uin u xe tä cuxpan.

³²Jintacda u laj älbijob. De ya'i aj Pedro u tz'eji uba nämte' t'oc tz'ita', y u täq'ui u yälben que mach yo que u chen pasa ca' u yäli.

³³De ya'i aj Jesús u suti uba u chänen bajca an u yajcänt'anob y cayi u q'uejpan aj Pedro, u yäle' ca'da: ―¡Tz'eje aba, Satanás, t'oc no'on! Uc'a ane mach'an ta' c'ajalin lo que yo Dios utic. Ni ya'an ta' c'ajalinba, sec' ni yo winic uticba.

³⁴De ya'i aj Jesús u pequi u yajcänt'anob y ni gente, u yälbijob ca'da: ―Machca chichca yo ochic de cajcänt'anba c'änä u yäctan u chen uba manda u juntuma. C'änä u c'älen cua' chichca tz'ibajtesia ca' chich cä c'älen no'on y u chen ca' chich cäle' no'onba.

³⁵Uc'a machca chichca u sacän cache' cuxlec utz pancab, u xe u säte' upete ni jini. Upete machca mach u sacä tuba cuxlec utz pancab uc'a u tz'ombon cä t'an y uc'a u tz'aycun u t'an Dios täcä, u xe chich tä äc'binte paq'uin cuxlec más utz.

³⁶¿Cua' u pa'se untu winic si u c'ac'a' mote' pancab q'uen cua' chichca tuba cuxlec utz, y de ya'i sätic u pixan?

³⁷¿Jäyp'e u ch'e' u toje' untu winic tuba u japän u pixan?