Markungundru 8:17-37

¹⁷Ja Jesujeli jenia ngujamana, Nau tanangu jatana wonti: “Minandru jura ngankamaliai ngangau jura buka pani ngamalkai? Jura wata ngundrai ja bakana wata ngujamai? Jura kararilu ngara ngurunguru nganai?

¹⁸Jura milki ngamalkai ja wata najiai? Jura talpa ngamalkai ja wata ngarai? Ja jura wata mangatandra wilpariai?

¹⁹Ngato buka ngunku mara wora 5,000 materani matja wokaribana, worderuntja billi buka worduwordujeli manamiri jura kampana paraia?” Tana nunkangu jatana wonti: “Marapratjana ja mandrumata.”

²⁰Ngato buka ngunku mara wora ja mandru 4,000 materani matja wokaribana, worderuntja billi buka worduwordujeli manamiri jura kampala wiri? Ja tana jatana wonti: “Mara wora ja mandrumata.”

²¹Ja Nau tanangu jatana wonti: “Worderu jura wata ngujamai?”

²²Ja Nau Bethsaida wokarana wonti; ja tanali nunkangu butju kulno wokaralkana wonti ja nunkangu ngatjina wonti, Nulu nina karakarananto.

²³Ja Nulu kana butju mara patana wonti, ja nina ngurandru tjirimalkingana wonti; ja Nulu nunkangu milkini ngaltja worana wonti, ja Nau nunkangu mara kuraterina wonti ja nina jakalkana wonti: “Jundru palpa najiai?”

²⁴Ja Nulu najina tarana wonti ja jatana wonti: “Ngato kana worana najiai, ngangau pita jeribaka ngato tana najiai, tana wapanani.”

²⁵Ngadani Nau nakaldra mara nunkangu milkini kuraterina wonti ja nunkangu jirijiribana wonti, nulu najina tarananto: ja nau nakaldra tepi pantjina wonti, ja worita pratjana talku najina wonti.

²⁶Ja Nulu nina pungaia nunkanaia jinpana wonti ja jatana wonti: “Wata ngurani wiriau, ja wata kulnuni jenia jatau ngurani.”

²⁷Ja Jesus ja mili nunkani wapana wonti ngura wakaia Cäsarea Philipphini karakara. Ja paltuni Nulu mili nunkani jakalkingana wonti ja tanangu jatana wonti: “Mina kana jatai worana ngani nganai?”

²⁸Tanali kalabana wonti: “Johannes multibanietja; ja palpa: Elias; ja palpa: Propheta kulno.”

²⁹Ja Nau tanangu jatana wonti: “Mina jura jatai, worana ngani nganai?” Petrulu kalabana wonti ja nunkangu jatana wonti: “Jidni Christus nganai.”

³⁰Ja Nulu tanana daudauana wonti, tanali wata nunkangundru kulnuni kaukaubananto.

³¹Ja Nulu wonina wonti tanangu ngujangujara jinkila: Kanaia Ngatamura pirna ketjaketjananto, ja pinaru worali, ja Priesta pirna worali, ja jaura jinkinietja worali nina woranato ja nari ngankananto, ja ditjini parkulani Nau tepi terkakananto.”

³²Ja Nulu talku ninapini jaura tanangu kaukaubana wonti. Ja Petrulu nina tjirimalkana wonti ja wonina wonti nina daudauala.

³³Nulu najina karitjina mili nunkani najina wonti, ja Nulu Petrus daudauana wonti ja jatana wonti: “Ngakangu ngadaia nganamai, Satanajai! Ngangau jundru wata ngundrai mina Godaia nganai, a-ai, windri mina kanaia.”

³⁴Ja Nulu kana wolara milini nunkanani jela matja karkana, Nau tanangu jatana wonti: “Warle ngantjai, ngakangu karipaterila, nau munta panila ngundrateriatimai, ja nulu kunarku nunkani maniatimai ja ngakangu karipateriatimai.

³⁵Ngangau warle tepi nunkani ngantjai kulkala, nulu nina tintala nganai; ja warle tepi nunkani tintai ngakangundru ja ngantjani jaurandru, nulu nina mankamankala nganai.

³⁶Jenia kanani ngumu nganai kara, nulu mita maru maninani, ja mungara nunkani tintaterinani?

³⁷Mina kalala kanali jinkinanto kara mungarani nunkanani?