Marcos 8:17-37

¹⁷Jesús yaputane pocotsiwa pijimonae tatsi natsipaeba. Ichitha poxoru Jesús yabara paeba xua fariseomonae irʉ Herodes pia pecuidubiwan tatsi daxota Jesús yainyaba piamonae: —¿Eta xua metha pana natsipaebame xua jopa painya necaponaexae pan? Baxua papaebame apara poxoru jopa pana nejume yabara cowʉntsim pocotsiwa paca cuidubatsi. Cataunxuae jopa pana necui yabara yaputaem poxoru jopa paichichipaem xua painya neyaputaewa tsane painya jʉntʉ coyeneintha.

¹⁸Paxam bequein pana necui taneme, ichitha jopa xaniwaicha pana necui yaputaem. Mataʉtano bequein bara pana nejume taneme ichitha jopa xaniwaicha pana nejume copi yaputaem. Mataʉtano pajʉntemainame poxonae pexeinya petsita itʉtsi coyenewa exanan jiwi nexa poxonae pan catan jiwitha.

¹⁹Poxonae janacan pan xua cinco po panbe xua cinco mil pebiwi nexa, ¿eta po cotethabe pawʉnbaponame xua pocotsiwa nacopaba? jei Jesús. Barapomonae Jesús jume notatsi, jeye: —Doce po cotebe apara, jei Jesús pijimonae tatsi.

²⁰—Poxonae janacan pan xua siete po panbe xua cuatro mil jiwi nexa, ¿eta po cotethabe pawʉnbaponame xua pocotsiwa nacopaba? jei Jesús. Barapomonae Jesús jume notatsi jeye: —Siete po cotebe apara, jei Jesús pijimonae tatsi.

²¹Nexata Jesús pijimonae barai xua muxu jei: —Metha matapainya payaputaename xua apara jopa yabara paca tsipaebichi pan. Apara jame paca tsipaebatsi xua jopa bewa pajume cowʉntsim tsane fariseomonae irʉ Herodes pia pecuidubiwan tatsi, jei Jesús.

²²Jesús pijimonae barʉ botouna jeratha Betsaida tomaratha. Barapo tomarapiwi jiwana carendena pon peitata nacʉtsin, Jesús pia xantha tatsi. Barapomonae Jesús wʉcatsi, xua bapon pemata jayabinexatsi xuano xua axaibi peexanaenexatsi.

²³Jesús cobe pita pon peitata nacʉtsin. Bapon cobe capoinchi aisowa beya xua tomara weya. Bapoxonae Jesús naone sutaba bapon peitamaiqueitobetha, itacuere jayabano. Jesús bapon yainyaba jeye: —¿Bara caitacʉpa xua netaewa? jei Jesús.

²⁴Bapon necotaxuba, bapoxonae Jesús jume notatsi, jeye: —Pebiwi tan, daichitha itanonojan. Jiwi saya be naewan jinompa, jei bapon.

²⁵Equeicha Jesús pecobetha itamaiquei jayaba nantiyabe. Barapo pebin daunweya naitata babatsiya tane. Bapoxonae itamaiquei xanepana. Bapon bara beta matapainya wʉnae tane.

²⁶Jesús itorobiya jeye bapon xua penawiyaenexa pia bo beya: —Jopa tomaratha ponaeinde xua jopa baxua taneyabara cueicueijeinexa jiwitha, jei Jesús.

²⁷Bapoxonae Jesús, irʉ pijimonae tatsi pata tsiqui tomaraxitha, po tomaraxi pewʉn Cesarea de Filipo. Poxonae namtotha cataunxuae enapona, bapoxonae Jesús pijimonae yainyaba, jeye: —¿Eta jiwi neyabara jei po coyene xua xan bapon aparan? jei Jesús.

²⁸Barapomonae Jesús jume notatsi, jeye: —Ichamonae cayabara jei: ‘Apara bapon Juan, pon jiwi Pebautisabin pon equeicha petʉpaein asʉ juina’, jei. Irʉ ichamonae cayabara jei: ‘Apara bapon Elías, pon equeicha petʉpaein asʉ juina’, jei. Irʉrʉ ichamonae cayabara jei: ‘Apara bapon jiwana, pomonae Nacom peitorobi jume pepaebiwi’, jei, jei Jesús pijimonae tatsi.

²⁹Bapoxonae Jesús pijimonae yainyaba, jeye: —¿Incane irʉ paxamdʉ? ¿Eta paneyabara jumichimdʉ xua xan eta pondʉn? jei Jesús. Bapoxonae Pedro, Jesús jume notatsi, jeye: —Xam apara Mesías, pon Nacom caitorobica, jei Pedro.

³⁰Jesús pijimonae muxu barai xua pijimonae jopa peyabara paebinexatsi ichamonaetha baxua.

³¹Bapoxonae Jesús tamropata pitaba xua pijimonae tsipaeba pocotsi coyene xua Jesús cana exanaeinchi ichamonae, Jesús jeye: “Xan ponxaein Nacom Tananeitapetsin jiwi bichocono neperaxa jʉbina. Mataʉtano pitiri jiwi, irʉrʉ sacerdotemonae pia pentacaponaewi tatsi, irʉrʉ pomonae jiwi pecuidubiwi Moisés pia peitorobi coyene tatsi, daxita barapomonae neitawetsina. Mataʉtano barapomonae nebexubina. Ichitha equeicha asʉ poponaein poxonae acoibi po matacabiyobe tsuxubi tsane”, jei Jesús.

³²Baxua Jesús pijimonae wʉnaeya muxu tsipaeba xua barapomonae bara xaniwaicha peyaputaenexa. Bapoxonae Pedro, Jesús compa aisowa bebarʉ poinyatsi, Pedro Jesús jume daunweya tsipaebatsi xua Jesús jopa pepaebinexa baxua.

³³Jesús pijimonae napatomeicha necota. Bapoxonae jume daunweya jeye Pedrotha: —¡Xam be pon caurimonae pia pentacaponaein tatsim! Bara newepu ponare, tsipei xam jopa beta nanta xeinaem icha be jopa Nacom ichim poxonae xua beta nanta xeina. Saya xam nanta xeiname icha jiwi ichi poxonae nanta xeina, jei Jesús.

³⁴Bapoxonae Jesús waba pin bicheito, mataʉtano wabano pijimonae, yawa jeye daxita barapomonaetha: —Icha pebin ichichipa xua tajiwimonae jiwanapin penaexanaewa tsane, bewa bapon yabara naitematsi pocotsiwa xua bapon ichichipa pia peexanae coyenewan tatsi. Bapoxonae jame bapon bewa eexanaponae pocotsiwa itoroban, bequein bara bapon bexotsi ichamonae, tajiwimonae jitonxae.

³⁵Pon naantobeya nata exana pocotsiwa bapon ichichipa, bapon jopa xeinaeyo peajʉntʉyapusʉwa, po peajʉntʉyapusʉwa ataya tsiteca xua Nacom pia nacua beicha. Ichitha pon neantobeya inta exana pocotsiwa ichichipan tana neantobexae xuano xua pecueicueijeixae Nacom Pejume Diwesi, bapon xeinaena peajʉntʉyapusʉwa, po peajʉntʉyapusʉwa ataya tsiteca xua Nacom pia nacua beicha.

³⁶Icha pebin bichocono copei xeina pocotsiwa xeina po cae pin nacuathe, ichitha jopa xeinaeyo peajʉntʉcoyenesʉwa po peajʉntʉcoyenesʉwa ataya tsiteca, bapoxonae bapon jopa itacʉpaetsi xua penajʉntʉ coyene capanepaewa xua peweraweracaewa tsane.

³⁷Tsipei pebin jopa itacʉpaetsi xua barapo copeitha Nacom pematomatsiwatsi, xua bapon pecatsinexa tsainchi peajʉntʉcoyenesʉwa xua barapoxonae pepatopaewa tsane Nacom pia nacua beicha tatsi.