Maliku 7:12-33

¹²umweyo anfunika lini pomwe kuwathandiza Baba wace na mai wace.’

¹³Na tenepo mafala ya Mulungu imwe mumbayasandusa yapezi, thangwe ra mtemo wanu omwe mumbasiyirana. Ndipo mumbacita bzinango bzizinji tenepayu.”

¹⁴Pambuyo pace Jezu adacemera pomwe mthithi wa wanthu ule kuti ubwere, aciti: “Tetekerani mwentsenemwe,ndipo mubvesese.

¹⁵bzentse bzomwe bzicoka kunja bzicipita mkati mwa munthu bzinimuswipisa lini. Tsono bzomwe bzimbacoka mwa iye ndibzo bzinimuswipisa.”

¹⁶“Omwe ana makutu yakubva, abve!”

¹⁷Pomwe Jezu adasiya mthithi ule wa wanthu acipita mnyumba, wakupfundzira wace wadamubvundza bza mfananizo ule.

¹⁸Iye adati: “Kodi na imwembo mulikukhala ninga wanango wale; muli kubvesesa lini? Kodi muli kudziwa lini kuti bzetse bzakucokera kunja, na kupita mwa munthu, bzin'kwanisa lini kumuswipisa?

¹⁹Thangwe bzin'pita lini mumtima mwace, tsono mmimba, pambuyo pace nkhukabzitaya ku thengo.” (Pakulewa bzimwebzi, Jezu adalamulira kuti bzakudya bzentse wanthu angakwanise kudya.)

²⁰Adati pomwe, “Bzomwe dzimbaswipisa munthu nidzire bzincoka mmtima mwace.

²¹Thangwe mkati mwa mitima wa wanthu ndimo mumbacoka ndzeru zakuipa, za ciwerewere, za kuba, za kuphana,

²²upombo, kusirira, kuipa mtima, cinyengo, bzakunyantsa, kuipidwa, kunyoza, kubzikuza, ndipombo kupusa.

²³Bzakuipa bzentsenebzi bzimbacokera mkati mwa munthu, ndipo ndibzo bzimbamuswipisa.”

²⁴Jezu adanyamuka komweko aciyenda kumbali ya ku Tiru. adapita munyumba inango, ndipo akhafuna lini kuti wanthu wadziwe kuti iye ali kumweko. Tsono alibe kukwanisa kubisika,

²⁵Nakuti mkazi winango, omwe mwana wace wacikazi akhabonera na mzimu wakuipa, adabva bza Iye. Adabwera kwa Jezu acigodama kuminyendo kwace.

²⁶Mkaziyo akhali wakunja, wa dziko la Siro-Fenisiya. Adakumbira Jezu kuti akacose mzimu wakuipa kwa mwana wace.

²⁷Tsono Jezu adamutawira kuti, “ayai, alekeni wana atome adya acikhuta. Mpsabwino lini kutenga cakudya ca wana nkhuthusira tuntsidza.”

²⁸Pamwepo mkazi ule adati, “Ncadidi, Mbuya, tsono tuntsidza tumbakhala pafupi na mbuto yakudyera tucimbadya tumisuwa tomwe wana ambataya.”

²⁹Pamwepo Jezu adamuuza kuti, “Thangwe la matawiridwe yako , ndoko, mzimu wakuipa wacoka mwa mwana wako.”

³⁰pomwe mkazi ule adabwerera kunyumba kwace,adakawona mwana ule adagona pa talimba, mzimu wakuipa ule wacoka.

³¹Jezu adacoka pomwe ku mbali ire ya ku Tiru,acipita na ku Sidoni, kuyenda ku thawale la ku Galileya,adapita na pakati pa Mizinda Khumi.

³²Wanthu winango wadamubweresera munthu omwe akhali mkhutwi na ubewewe. Wanthuwo adakumbira Jezu kuti amulimbise pakumsandzika manja munthu ule.

³³Jezu adamucosa munthu ule pa mthithi wa wanthu acienda naye pa mbali. Adapitisa bzala mmakutu mwace, acipsipa mata, nkhukuya lirime lace munthu ule.