Isanquienare Maricoshi 7:12-33

¹²Aitaque meeca te pishineteriji pishaninca irintacoteari iriri, iriniro.

¹³Picoacaaqueri inquemisantero poametapinitiriri, aisati poametaqueri intseenquero icantiri Tasorentsi. Aitaque picantanirotapinitari: pojocacaayetiri ashaninca iquemisanti.

¹⁴Ari icajemajiri aisati apatojeitainchari, icantajeitiri: —Pinquemajeitavaquena maaroni. Piojeitavaquero oca.

¹⁵Ocameetsati avajeitearo paitapeerica, eiro otimitsi antane: tecatsi oncantero avari ashire. Piquenqueshiretiro caari cameetsatatsi, irootaque pantapinitantarori.

¹⁶Otimirica piyempita piquemantari, pinquemavaque.

¹⁷Ari ijajeitanaji apatotimentariri, iqueapaaji Jesoshi pancotsiqui. Isampitiri iroamere: —¿Jaoca ocantari pishiacaaventiniriri?

¹⁸Icantiri: —Aisatimpa avirori, ¿tempa pinquemavaquena? Paitapeerica iroyeari ashaninca, ocameetsati, eiro otimitsi irantane. Tempa piotavaquero.

¹⁹Eiro omatirotsi ishire, ainti ojataque isheitoqui, impoiji ishitajiro. Irootaque yoamejeitiriri ocameetsataque paitarica yoyeeyetari.

²⁰Aisati icantiri: —Oca iquenqueshiretiri antacairiri ashaninca caari cameetsatatsi.

²¹Te iroyearoji caari cameetsatatsi, irointi iquenqueshiretiro. Irootaque yantajeitantarori maaroni: yantavintsatiro tsinane caari yai, antavintsatiri shirampari caari ai, icoshiti, yoanti.

²²Yaimentaro ijina, aimentari ojime. Inevetaro yashiyetari pashini atiri. Icamaaritanti, yamatavitanti, imayempitantapiniti, imashitsati, icantimatanti, ishemeti. Te ontimeji iojeitantari.

²³Iquenqueshiretiro atiri caari cameetsatatsi, irootaque yantantarori: impoiji otimi irantanepee.

²⁴Impoiji ijatanaji Jesoshi Tiroqui. Isavicapaaque pancotsiqui, te incoaveteaji irioyeeterime. Iro cantaincha tecatsi incantea irimanea.

²⁵Otimi anta tsinane, yatajeaonquiro oshinto camaari. Oquemacotavaqueri tsinane Jesoshi, ojatashitaqueri, otiyeroashitapaacari.

²⁶Caari oni jorio, oponeaca Shirojenishiaqui. Ocantapaaqueri: —Yatajeaoncaquero noshinto camaari, poavisacotajenaro.

²⁷Icantavaquero: —Nojivatavaquerita noshanincasanori nintacoteari. Te oncameetsateji aapitsatajeri yoari ajananequite, amperi otsiti iroyeari.

²⁸Iroori acanaqueri: —Je, queario. Aitaque iniri otsiti nijanteaji. Yoatsopequititayetari atomi.

²⁹Icantajiro: —Je, cameetsa; queario picantaqueri. Cameetsa pijataje meeca, avisacotanaji pishinto.

³⁰Opianaja ovancoqui. Oneapaajiro oshinto, onariaca omaamentoqui, avisacotaji.

³¹Impoiji yovaanaja aisati Jesoshi, iquenanaji Tiroqui, Shiroqui aisati Tecaporishiqui. Ari yareetapaaja incajarequi Carireaquiniri.

³²Yameetapaaqueneri aparo shirampari imayempiti, aisati imasontiti. Icantapaaqueri: —Pimpamitavaqueri, poavisacotajeri.

³³Yora Jesoshi yojocanajiri apatotimentariri, apaniro itsipatanacari mayempiri. Yoiminquiaqueneri iracotsapaqui iyempitaqui. Iquitiojaquero iracotsapaqui, ipantaqueri inenequi.