MARKUS 7:12-33

¹²dhali yan’ko’d um ’koki dhal a’di bway mo mmomii ari toŋ kamu/ ṯal ’de/ gom com mo walla kum mo be.

¹³Wakan um ki p̱uu gwo ma Arumgimis mo gom gwo gi gwoŋ ’kwanin dhamom bum mo a’di jin luḵa um mo. Dhali um ki miiya ris ton tiya gi wakan mo be.

¹⁴Dhali a’di ki yuḵ ’kwani i a’di mo doḵ/e dhali o uni gwo mo ki: Ciḵi gwo ’peni aha/ mo ma, aris umi ’baar mo dhali mishi gwo ’ban mo ma.

¹⁵Toŋ kamu/ yisa di’da jin di’d ’pena pije/ jin midi ya bwa wathi/ mo dhali shi/ a’di is mo, hili a’di jin piyi’d ka pije/ ’peni bwa wathi/ mo tani a’di shi/ki a’di is mo be.

¹⁶Waḵki/ wathiŋ kamu/ ta gi gu’ban’ce mo mmociḵ gwo mo tani dhalki a’di ciḵ gwo mo ma.

¹⁷Dhali ki a’di cic̱ki gu’b mo tani dhali dhal ’kwani mo tani imanciḵ a’di gwo doṯki a’di gwo mo gom gwom ’bi’th/e yan mo be.

¹⁸Dhali a’di ki o uni gwo mo ki: A/ki um si’da/ ’kokin kan mo mmo’koki mish gwo ’ban mowa? ’Kona um ki mish ’taa ki ma to yin jin yaki’d e bwa wathi/ ’pena pije/ mo tani midi mol shi/ a’di is mo be

¹⁹haali/ a’di diki seya dum piti mo hili e bwam piti mo dhali wakan a’di ki ya ka pije/ mo. (Wakan a’di ṯorki gwo eya tente/ ka ris tonṯe/ ’baar mo ta kun dhelelkin mo be.)

²⁰Dhali a’di ki o gwo mo ki: To jin piyi’d ka pije/ ’peni ’twa/ wathi/ mo tani a’di ishi/ki a’di is mo be.

²¹Haali/ ’peni bwaman mo, ’peni bwaman ma du wathi/ mo tani a’di p̱u’dkina gwon thus kun kulumu ibwa kun shi/ashi/ mo, kun ta mii gun miinu miinyc̱al mo, dhali mmota ’di/ mo dhali mmo’kosha mee mo dhali mmota c̱al mo

²²dhali mmo’thoṯẖ bwa mo dhali mmomii mii kun ’coḵa’coḵ mo dhali mmota he’k e mo dhali mii kun ’kanuwa ḵanthi/ mo dhali miin dhap̱an mo dhali mmota imanthutha thu’th ’pen mo, mmodhu ’ba/ ki ca mo dhali mii jin miinu miim p̱us mo.

²³Aris tonthus gwansani ’baar mo kun pikin ka pije/ ’peni bwa wathi/ mo tani uni a’di ishi/ki wathi/ is mo be.

²⁴Dhali a’di cuki mis mo ’peni mun mo dhali ya mo e bampa/ gi Pan Sur mo dhali Pan Saydaa/ mo. Dhali a’di cic̱ki gu’b mo dhali a’di diki dhal jan ’deŋ kamu/ bway mo mmomish a’di mo. Hili a’di molu bag mo be.

²⁵Hili ki jahanne/ a’boma kamu/ a’di jin bu’thkin ma rum thus jin nyo/o’d ’bwa/ mo ciḵki gwo mo gom a’di mo, dhali a’di p̱u’dki’d mo dhali c̱a’bki jiŋ ’kup̱a’dup̱uni shoki a’di mo be.

²⁶A’bom yansan ta’da ’bom gi Paŋ Griḵi mo be, a’di jin dho’thkunu mo e Pam P̱inikiyya ma Suriyya mo. Dhala yim doṯki a’di gwo mo mmo/ura ruma ’cesh ka pije/ ’peni ’bwa/ mo be.

²⁷Dhali a’di ki owa yim gwo mo ki: Dhalki uc̱i c̱inu tonṯe/ mmoshwa nṯwa/a/ mo, haali/ a’di diki ’bor mo mmoḵal tonṯe/ ’peni uc̱i mo dhali ṯa’k a’di ka ’ka mo.

²⁸Hila yim thoḵki a’di gwo mo ki: Nye, Tap̱a, hili a’ka si’da/ uni mini shwa kuluny maa uc̱i kun raskin ’pena tharabeesa mo be.

²⁹Dhali a’di ki owa yim gwo mo ki: Gom gwo jin ona /e wakansan mo tani yaku/ /e mo. Aruma ’cesh dhalki ’bwa/um pini ’pen mo be.

³⁰Dhali ayim yaki pa mo dhali gama ’ci mmo/ish eya ci mo dhali aruma ’cesh dhalki a’di ’pen mo be.

³¹Dhali yan’ko’d a’di doḵki’d ka nyaŋ’ko’d mo e Pan Sur mo dhali yaki tur mo e Pan Saydaa/ mo eya Al ma Jaliil mo dhali ki tur mo e bampa/ gi Pan Deḵap̱olis mo be.

³²Dhali uni ḵalki a’di wathi/ jin ta’da ’diye/ mo dhali ’twam piti jin c̱umpulkina a’di wal mo. Dhali uni ŋap̱ki a’di mo mmokar me’d piti ap̱o/ a’di mo be.

³³Dhali uni ki ḵal a’di ’pen ka pije/ mo ’pena waambuhany ’kwani mo, a’di ’de/ mo. A’di ki kar me’d piti e bwany’cem piti mo, dhala Yesus ki ’taḵ manya/ mo dhali ta a’di ale’d piti is ki me’d mo be.