Markungundru 7:12-33

¹²Jeruja jura nunkangu wata morla manuni kurai ngaperani kara ngandrini kara ngumu ngankala.

¹³Jeruja jura Godaia jaura jurani jirijiribani jaurandru worarai, nina jura matja manina; ja jenia jeribaka jura morla ngankai.”

¹⁴Ja Nulu kana wolara nunkangu karkana wonti ja tanangu jatana wonti: “Pratjanali ngana ngaranimai ja ngundranimai!

¹⁵Panila palarani parai, mina kanani wiriai, jenia nina murumuru ngankai, a-ai, windri jenia, mina nunkangundru dunkai, jendralipara kana murumuru ngankai.

¹⁶Warle talpa ngamalkai ngarala, nulu ngaraiatimai!”

¹⁷Ja Nau punga kulnuni wirina wonti kana wolarandru, ja milieli nunkanali nina jakalkana wonti jeribaka jaurandru.

¹⁸Ja Nau tanangu jatana wonti: “Jeruja bakana jura patipati nganai? Jura wata ngujamai, jenipara pratjana, mina palarandru kanani wiriai, ngandandariai nina murumuru ngankala?

¹⁹Ngangau jenia wata nunkangu ngarani wiriai, a-ai, windri mandrani, ja ngadani palkingai; ja jenia tajina pratjana kulirkai.

²⁰Nau jatana wonti: Mina kanandru dunkai, jendralipara kana murumuru ngankai.

²¹Ngangau kana ngarandru dunkai: Ngundrana madlentji, pinta wokaribani, palakantji, naria nandrani,

²²Kurikantji, potuni milkirini, tjikatjika, jedibani, mirantjatieli tajini ja tapani, milki madlentji, ngirkibani, pirna ngundraterini, patipatirini.

²³Jenia madlentji pratjana ngarandru dunkai, ja kana murumuru ngankai.”

²⁴Ja Nau nakandru terkakana wonti ja Tyrus ja Sidon mitani wokarana wonti; ja Nau punga kulnuni wirina wonti ja ngantjana wonti jenia wata kuinujeli ngujaniananto, windri Nau ngandandarina wonti kurukurumalkaterila.

²⁵Ngangau widla kulnujeli nunkangundru matja ngarana, ngatatajeli nankanali kutji murumuru ngamalkana wonti, ja nani wokarana wonti ja nunkangu tidnani woraterina wonti.

²⁶Nani widla Griecha widla nganana wonti, Syro Phönizia mitani dankanala, ja nani nunkangu ngatjina wonti, Nulu kutji murumuru nankani ngatanandru dunkalkananto.

²⁷Jesus nankangu jatana wonti: “Ngopera kupa jerturinanto; ngangau jenia wata talku nganai kupaia buka manila ja kintalani worala.”

²⁸Nandru kalabana wonti ja nunkangu jatana wonti: “Kau Kaparajai; ja bakana kintala wakali kurlini ngarinalu kupa wakaia buka worduwordu tajiai.”

²⁹Ja Nau nankangu jatana wonti: “Nimkangupini jaurandru wapau! kutji jinkani ngatanandru matja dunkana warai.”

³⁰Ja nani pungani nankanani wokarala tikana wonti, ja kutji murumuru matja dunkanani mankamankana wonti, ja mankara turarani pirini paranani.

³¹Ja Nau nakaldra dunkana wonti Tyrus ja Sidon wondirandru, ja Nau Galilaia pantuni wokarana wonti Dekapolis wondirani terti.

³²Ja tanali nunkangu wapalkana wonti kana talpakuru ja ngapu, ja tana nunkangu ngatjina wonti, Nau nnnkangu mara kuraterinanto.

³³Ja Nulu nina kana wolarandru tjirimalkingana wonti, ja nunkangu talpani Nau mara wutju nunkani kuraterina wonti, ja Nulu ngaltja matja worana, Nulu nina tali karakarana wonti.