Lukasi 20:19-34

¹⁹Vawula va Malawu na vatambika vakomi vakasakeyi njila ya kumuwomesha chipindi chichila chila, vavatilili vandu, nongwa vamanyili kucha chilangushilu achi chivayilata veni.

²⁰Topi vakamulembisheyi, vavalayisha valembesha vayigolili kucha veni vandu va haki ili vamuwomeshi filongu fyaki, pambeli vamukamuli na kumuyegha kwa vatavala na vanauwesu.

²¹Vala valembesha vamudasha Yesu, “Muwula, tukumanya ukudeta na kuwula milandu ya nakaka. Tukumanya yuwi kuna lushawu ng'odu. Yuwi ukuwula fya nakaka fya deha ya Chapanga.”

²²Topi vamudasha, “Tuwombeli, yikujumishiwa kuhomba kodi kwa mutwa wa Loma awu ng'odu?”

²³Yesu amanyili ufyangu wawu, kavawombela,

²⁴“Munangushi ligwala lyeni. Wuli wushu na lihundu lya ghani?” Veni vayangula, “Ya mutwa wa Loma.”

²⁵Yesu kavawombela, “Fya mutwa wa Loma mumupi mutwa wa Loma na fya Chapanga mumupi Chapanga.”

²⁶Vawesha kandi ha kumuwomesha kwa chilongu chochosi pala pa vandu na vayikala kokota vakujinga nyangulilu yaki.

²⁷Pambeli Masadukayu vamu, vala yivadeta yivasovili vakushukuka ng'odu kushukuka, vamuyendela, vamudasha,

²⁸“Muwula, Musa atuyandikilili kucha muna mdala asovili lakini amulekili mdala waki ngajila mwana, mdala yula atoliwili na mlongumundu, ili amuleleli vana mlongumundu.

²⁹Kwavelili na valongu saba. Wakwaa ahetili mdala pambeli kasova ngajila kuleka vana.

³⁰Yula mlongu mundu wa pili kamuhala mdala yula na mweni kasova ngajila kuleka mwana.

³¹Hata mlongu wa tatu wuwula wula, mbaka vosi saba, vasova ngajila kuleka vana.

³²Pambeli na yula mdala kasova.

³³Topi lijuva lya kushukushiwa, daghavi mdala wa ghani? Nongwa vosi saba vamuhetili.”

³⁴Yesu kavawombela, “Vandu va mlima awu vakuheta na kuhetiwa.