San Lujc 20:19-34

¹⁹Bixhioz rniabee ree bixhioz con ree mextr rajc ley, hor guin gajc guyën reeman niniaaz reeman Jesús guial gogbee reeman cuzaꞌtaman laa reeman, per bidxeb reeman bejn ree.

²⁰Abiꞌ guxhaal reeman bén ziglaꞌch ree laaman din güünzi reeman guial gulüü na̱j reeman benzaꞌc, din yaguiil reeman mod guiniee Jesús diidx ni gudxiib reeman guijc, din chileꞌ yayü reeman laaman loj gobernador Rom.

²¹Dxel gunabdiidx reeman lojman, rëb reeman: ―Mextr, dunujn rayagbee guial rnieel rulüü tëël ziꞌc rayal, din par lüj tiblojzi na̱j bejn, abiꞌ walil rulüül guial xhienaag rën Dios guiban bejn.

²²¿Zagdxen ya radijxan impuest loj rey César, o ad zagdxetan?

²³Per gogbee gajc Jesús xgab mal ni cayüjn reeman abiꞌ rëbaman loj reeman:

²⁴―Gol balüü tijb cintabl lon. ¿Chu loj ca lojn chu tëë laj ca lojn? Badxiꞌ reeman laan, rëb reeman: ―Loj rey César ca lojn në lajman.

²⁵Dxel rëbaman loj reeman: ―Gol badëëcliza loj rey César ni na̱j xieen César, guiáad loj Dios gol badëë ni na̱j xieen Dios.

²⁶Abiꞌ gra ni guneeman niz loj ree bejn, achetri badxejl nudxiib reeman guijc din niniaaz reeman laaman. Badxali loj reeman ni guneeman abiꞌ achetri rëb reeman.

²⁷Tioꞌp choon ree bénsaducew bignaj Jesús, bénsadusew guin ree ad rliladxt reeman guial yaban ree bengüt, zeel rëb reeman loj Jesús:

²⁸―Mextr, loj xley Moisejs rëb guial bal guiët tijb xinguiaaw abiꞌ achut xiꞌnx guyu con lacheelix, bijch xingüt guin guxhliaanë béngunaa bizëjb guin din chuꞌ xiꞌn reex ziꞌc gulüü xiꞌn xin güt guinan.

²⁹Guyu tijb famil lod goc reex gajdx bijch. Baxhliaa xin yaloj guin, per güjtix abiꞌ ad guyut xiꞌn reex con lacheelix.

³⁰Dxel bijch barojpix baxhliaanë béngunaa guin, per güjtgajquix ad guyu gajct xiꞌn reex.

³¹Zianz baxhliaanë xin bayon guin béngunaa bizëjb guin, zianz baxhliaanëman guigajdx reex abiꞌ gra reex güjt achut xiꞌn reex guyu con laaman.

³²Ni bigratë në béngunaa guin güjt.

³³Yan, chi yaban ree bengüt, ¿chu loj guigajdx reex gac xbéngunaa laaman guial gra reex baxhliaanë laaman?

³⁴Dxel rëb Jesús loj reeman: ―Loj guidxliuj guie ruxhliaa ree bejn abiꞌ rudëëd xiꞌn reeman ruxhliaa.