Lukas 1:54-65

⁵⁴Na soru-bara dhèu Israꞌel Na, dènge loe boe padꞌelo sasue Na mi rèngu.

⁵⁵Uru èèna, Na paꞌèki tèke le lii pajaji dènge bèi-baki èdhi, nuka baki Abraham dènge ana-èpu na aaꞌi-aaꞌi ra. Dꞌai sange neꞌe, lii pajaji èèna paꞌèki mèno.”

⁵⁶Hèia Maria pea dènge Elisabet toke tèlu hèru, heka lèpa asa èmu na ètu Nasaret.

⁵⁷Ropa dꞌai hèru, ka Elisabet nara iisi ana mone ca dhèu.

⁵⁸Lii neꞌe, ra palolo dꞌai aꞌari na dènge rae lesa, aku rèngu na, Ama Lamatua padꞌelo le dꞌara hua iia Na, ka Na hia Elisabet ana mone ca dhèu. Hèia rèngu aaꞌi-aaꞌi ra karejꞌe kahèi.

⁵⁹Lodꞌo ana ne dꞌai aru lodꞌo, ka ra suna ne, madhutu atora dhèu Yahudi. Ra neo pangare ana ne, Sakaria, madhutu ngara ama na.

⁶⁰Te ngaa ina na bꞌala ra, aku nèngu na, “Aadꞌo sèmi èèna! Ngara na hudꞌi Yohanis ku!”

⁶¹Te ngaa ra bꞌala ne, “Nga tao ka pili ngara Yohanis? Nèti aꞌari miu, ca dhèu sa dhu ngara dhae, sèmi mèka èèna!”

⁶²Ka ra senen ho karèi Sakaria, sèna ka neo pangare ana ne ngara na ngaa.

⁶³Hèia Sakaria senen ho manèngi lei. Ra hia ne lei, ka na suri peka na, “Ngara na Yohanis!” Ka dhèu aaꞌi-aaꞌi malaa titu kèna.

⁶⁴Cagꞌagꞌa laa, heꞌo na dhu sakaa mèno èèna, mako dènge ka. Ka na koa-kio kolongara Ama Lamatua.

⁶⁵Hèia dhèu aaꞌi-aaꞌi dhu pea padètu ètu sèra sa, madhaꞌu dènge malaa. Ka lii neꞌe mulai ra palolo nèti hèbꞌa sa hèbꞌa, toke dhèu-dhèu ètu ledhe-ledhe ètu propensi Yudea reꞌa aaꞌi kahèi.