Ducasën Dada uaid 1:54-65

⁵⁴Chuiquid Dapa Abentsëcquiobi chidon usundoendac, quequin ambi tsusedpabo chuimiampicpadomboen Nuquin Papan ëbi usundomiac.

⁵⁵Tsusedpa Abadauambëdta aton tsyuecquidtedi ambi tantiampicpadomboen Nuquin Papan ëbi usundomiac. Mimbi usundoaid ëbi yacno yuedanquid nec, quequin Nuquin Papan ambi tantiampicpadembi ëbi isec,” quec comapenec cuëdënash Madia ënëdpanëdash.

⁵⁶Adec ënëdash Edisabedbëd ushë daëd nidmec tabadashic ushë utsi nidbudtsëcnubi aton shubuno nidoapanëdash.

⁵⁷Adnubien Edisabedën bacuë tishte ushë chonoc dada bacuë tishpanëdash.

⁵⁸Bacuë tishenquiocboedëmbi nëbi aton bacuë tishosh, quesho tantiash aton matses ado shubu utsinquidotedi Edisabedbëd bëdambo icpanëdash.

⁵⁹Adashic, 8tedec ushtanquin Edisabedën madon shui dëbid dëteshunu quesho tantiash utsibo cho-chopanëdash. Choash puduedash bacuëmpi aton papa cuëmëdquid cuënu quenubi

⁶⁰Edisabed: —Padenquio. Abi cuëmëdquid Uan nec —quepanëdash.

⁶¹Adoaquien utsibo: —Min matses utsi Uan cuëmëdquid nibëdec —queshun

⁶²Sacadias ismenuequin mëdante uic-uiccaquin: —Abi cuëmëdquid chui. Tantianu —capanëdash utsibon.

⁶³Adoaquien dada uate bedshun, Abi cuëmëdquid Uan nec, quequin dada uaquin Sacadiasën ismepanëdash. Adoaquien: —¿Abimboda mimbi cape? —quecuededpanëdash utsibo.

⁶⁴Adnubien Nuquin Papan oncameoac Nuquin Papan naid Sacadiasën chuibampanëdash.

⁶⁵Aden chuibansho tantiash: —Dacuëdampambo iquec. ¿Atotsiepashun onquenquiocboedëmbi nëbi onquequin Nuquin Papan naid chuibampec? —quecuededpanëdash utsibo. Aden tantianec aton shubuno nidaneshun ambi isboedbëdtabi ambi tantiaboed utsibon chuipanëdash.