Luka 9:16-52

¹⁶O Isus lelja o pandž mare hem o duj maćhe, dikhlja naupre ko nebo, zahvalinđa e Devlese zako mare hem zako maćhe hem phaglja len. Tegani dinđa o mare hem e maćhen e učenikonenđe te den e manušenđe te xan.

¹⁷I sare xale đikote na čalile. A palo adava, dešuduj korpe čedinde pe okolestar so ačhilo oto xajba.

¹⁸A jekh dive o Isus inele korkoro ple dešuduje učenikonencar, i molinđa pe. I ked završinđa i molitva, pučlja e učenikonen: “So phenela o narodo, ko injum me?”

¹⁹A on phende: “Nesave manuša phenena da tu injan o Jovan o Krstitelj, a nesave avera phenena da tu injan o proroko o Ilija, a palem nesave avera phenena da tu injan jekh oto avera proroci taro purano vreme kova uštino taro mule.”

²⁰Tegani o Isus pučlja e učenikonen: “A so tumen phenena, ko injum me?” O Petar phenđa: “Tu injan o Hrist, kole o Devel bičhalđa!”

²¹A o Isus naredinđa e učenikonenđe te na vaćeren nikase dai ov o Hrist.

²²I phenđa: “Me, o Čhavo e Manušesoro, valjani but te patinav. O starešine, o šerutne sveštenici hem o učitelja e Mojsijasere zakonestar na ka prihvatinen man. O manuša ka mudaren man, ali o trito dive o Devel ka vazdel man taro mule.”

²³I o Isus vaćerđa ple učenikonenđe hem sa e narodose so inele adari: “Ko mangela te ovel mlo učeniko, nek ačhaj plo dživdipe, nek lel plo krsto taro dive ko dive hem nek phirel pala mande.

²⁴Adalese so đijekh kova mangela plo dživdipe te arakhi, ka našali le, a ko dela plo dživdipe zbog mande, ka ovel le čačikano dživdipe.

²⁵Na vredini ništa e manušese i sa i phuv ked bi ovela olesiri te na lelja o dživdipe savoi čačikano.

²⁶Adalese ko lađala mandar hem mle lafonendar, i me, o Čhavo e Manušesoro, ka lađav olestar ked ka irinav ki phuv ano sjaj savo ka ovel sar o sjaj mle Dadesoro hem e svetone anđelengoro.

²⁷A čače vaćerava tumenđe, isi nesave akalendar so terđona akate kola na ka meren đikote na dikhena o carstvo e Devlesoro.”

²⁸Ked nakhle sar đi ofto dive sar o Isus phenđa adava, lelja peja e Petre, e Jovane hem e Jakove i dželo ki gora te molini pe.

²⁹I sar ine molini pe, lesoro muj ulo averčhane hem lesere šeja ule but parne hem sjajna.

³⁰I dikh, nekotar ano baro sjaj iklile duj manuša, o Mojsije hem o Ilija hem lelje te vaćeren e Isuseja.

³¹On vaćerde e meribnastar savo adžićeri e Isuse. Sigende ka ovel adava ano Jerusalim te šaj ovel ađahar sar o Devel so planirinđa.

³²A o Petar hem okola so inele oleja, zasuće. Ked uštine, dikhle e Isuse ano baro sjaj hem e duje manušen sar terđona oleja.

³³I ked lelje o Mojsije hem o Ilija te ciden pe e Isusestar, o Petar phenđa e Isusese: “Gospodarona, šukari amenđe akate so injam. Te ćera trin šatorja: jekh tuće, jekh e Mojsijase hem jekh e Ilijase.” Na džanđa so vaćeri.

³⁴Sar ine vaćeri adava, iklilo jekh oblako savo učharđa len. A o učenici darandile ked učharđa len o oblako.

³⁵I šundilo glaso taro oblako savo vaćerđa: “Akavai mlo Čhavo, o Pomazime! Ole šunen!”

³⁶I palo adava so šundilo o glaso, o učenici dikhle samo e Isuse korkore. I trainde, tegani nikase na vaćerde adalestar so dikhle.

³⁷Tejsato dive, ked o Isus hem o trin učenici huljile tari gora, baro narodo alo te dikhel e Isuse.

³⁸I dikh, nesavo manuš tari gužva lelja te vičini: “Učitelju, molinava tut te pomožine mle čhavese, adalese soi maje jekhoro!

³⁹O bišukar duho but puti napadini le i otojekhvar vrištini; frdela le ano grčevija hem ikljola lestar pena taro muj; uništini le hem skoro nisar na ačhaj le.

⁴⁰I molinđum te učenikonen te ikalen e bišukare duho, ali on našti ine te ikalen le.”

⁴¹A o Isus phenđa: “O, biverakere hem rumime manušalen! Sa edobor vreme injum tumencar, a palem na verujinena. Pučav man pana kobor valjani te trpinav tumen. Ana te čhave akari!”

⁴²I sar o čhavoro avela ine đi o Isus, o bišukar duho frdinđa le ki phuv ano grčevija. A o Isus naredinđa e bišukare duhose te cidel pe e čhavorestar, sasljarđa e čhavore hem phenđa lesere dadese: “Ače to čhavo”.

⁴³Tegani sare inele začudime so dikhle e Devlesoro baro zoralipe. Sar sare čudinena pe ine zako adava so ćerđa o Isus, ov phenđa ple učenikonenđe:

⁴⁴“Šunen šukar akala lafija: Me, o Čhavo e Manušesoro, valjani te ovav predime ano vasta e bišukare manušengere.”

⁴⁵Ali o učenici na xalile so o Isus manglja te vaćeri adaleja. Adava inele olendar garavdo sar te na xaljoven le, a darandile te pučen le so adaleja manglja te vaćeri lenđe.

⁴⁶A o učenici lelje maškara pumende te raspravinen ko šaj olendar te ovel najbaro.

⁴⁷A o Isus džanđa soi lenđe ki godi, lelja jekhe čhavore, čhivđa le uzala peste

⁴⁸i phenđa lenđe: “Đijekh kova primini akale čhavore zbog maje, man primini. A đijekh kova man primini, primini e Devle kova bičhalđa man. Kova maškara tumende pes dikhela sar najtikore, ole o Devel dikhela sar najbare.”

⁴⁹A o Jovan phenđa e Isusese: “Gospodarona, dikhljam nesave manuše sar ano klo anav ikali e demonen e manušendar. Amen o učenici na mukljam lese te ćerel adava, adalese so na džala amencar pala tute.”

⁵⁰A o Isus phenđa lese: “muken le te ćerel adava, adalese so okova kova nane protiv tumende, ovi tumencar!”

⁵¹A ked inele paše o dive e Isusesere te ovel vazdime ko nebo, ov zorale odlučinđa te džal ko Jerusalim.

⁵²I bičhalđa nesave manušen angla peste. I on džele i đerdinde ko nesavo gav e Samarijakoro te pripreminen le e Isusese.