Lukaj 9:16-52

¹⁶A kotin limada lopon prot limau o mam riamen, majanda nanlan, laolaoki, pilitiki pena, kotiki on japwilim a tounpadak kan, pwe ren nene on pokon o.

¹⁷Irail jak, o karoj medier, ap rikada dodo eijokriau luan kamadip o.

¹⁸Kadekadeo ni a kotin laolao kelep, japwilim a tounpadak kan ian i. A kotin kainoma re ’rail majani: Ij me aramaj kin inda me nai?

¹⁹Irail japen potoan on: Ioanej jaunpaptaij, a akai me inda Eliaj, o pil akai kin inda, me dene jaukop en kaua men iajadar.

²⁰A kotin majani on irail: A da me komail kin inda ij nai? Petruj ap japen potoan on: Ir me Krijtuj japwilim en Kot.

²¹A i me kotin padik inapwiedi irail, ren der indan meamen mepukat,

²²Majani: Nain aramaj pan kalokolok laud, o lokidokila ren jaumaj, o jamero lapalap, o jaunkawewe kan, o a pan kamela, o ni ran kajilu a pan maureda,

²³Ap kotin majani on irail karoj: Meamen men idauen ia i en tonmeteki pein i o ale a lopu ni ran karoj, o idedauen ia do.

²⁴Pwe meamen kanakanai on maur a, pan pupe jan. A meamen kajela maur a pweki nai, pan diarada.

²⁵Pwe da me pan mau on aramaj amen, me aneki pena jappa karoj, ap kajela pein i o kajapokela pein i?

²⁶Pwe me kin namenok kin ia o ai padak kan, i me Nain aramaj pil pan namenokki, a lao kodo ni a linan, o linan en Jam a, o na tounlan jaraui kan.

²⁷A melel I indai on komail, akai irail, me mi met, jota pan mela, irail lao udial wein Kot.

²⁸A kadekadeo murin pon walu pon murin majan pukat i ap ukada Petruj, o Ioanej, o Iakopuj kotidala pon nana o pwen laolao.

²⁹A ni a kotin laolao mom en jilan i ap wukila o japwilim a likau puetepuetela o linalin.

³⁰A kilan, ol riamen ian i majan pena! Ira me Mojej o Eliaj.

³¹Ira pwarado ni ara linan o mamajani duen a pan kamatala nan Ierujalem.

³²A Petruj o me ian i me toutouki mair. Ira lao pirida, re ap udial a linan o ol riamen kotikot impa.

³³Kadekadeo ira lao kotiwei jan re a, Petruj ap indan Iejuj: Main, meid mau atail kotikot met. Kit en kauada kijin im jilikij: Tanpaj ar, o en Mojej, o en Eliaj; a jaja me a kajokajoi.

³⁴Ni a kajokajoi mepukat, pali en dapok kadupal irail edi, irail ari majakadar ni ar tilon nan dapok o.

³⁵O nil eu peidido jan nan dapok o majani: Iet nai ol kompok, komail en ron i!

³⁶A nil wet lao wiauier, re ap diaradar Iejuj ta. Ir ari nenenlata; o ni ran oko re jota kaireki meamen duen me re kilaner.

³⁷A kadekadeo manda en ran o irail lao kotidido jan nana o, pokon kalaimun ap poto don i,

³⁸A kilan, ol amen nan pokon o nil laudeda potoan on: Jaunpadak, i poeki re ir, re kotin majani don ai tunol putak o, pwe iei ai ieroj.

³⁹Re kotin mani, nen o lao koledi i, a kin madan weriwer, a kin jenjeroki jili, a ap kin pudopud o meid apwal ni a kin koiei jan i.

⁴⁰Nai ari poeki ren japwilim ar tounpadak kan, ren kauje wei jan i, a re jota kak.

⁴¹A Iejuj kotin japen majani: O di wet meid jopojon o japun, ia arain ai pan mimi re omail? Ia arain ai pan kokoa komail? Wa don ia noum putak!

⁴²A ni a kokodo, tewil ap kapururada o jeroki jili i, a Iejuj kotin kidaueda nen jaut o, o kakelada putak o, ap kapure on i ren jam a.

⁴³A irail karoj puriamuiki manaman en Kot. A ni ar puriamuiki en Iejuj a wiawia kan ap kotin majani on japwilim a tounpadak kan:

⁴⁴Majan pukat en kaloledi nan jalon omail: Nain aramaj pan panala ni pa en aramaj.

⁴⁵A irail jota weweki majan wet, pwe a rir jan irail, i me irail jajaki. Irail ari majak kalelapok re a duen majan pot et.

⁴⁶Irail ap pil lamelame, ij me pan lapalap re ’rail?

⁴⁷A Iejuj lao kotin mani ar lamelam nan monion arail, ap ale jeri men, kida impa a,

⁴⁸O majani on irail: Meamen pan apwali kijin jeri men et ni ad ai, nan a kin apwali ia, a meamen pan apwali ia, nan a kin apwali, me kadar ia do; a me tikitik re omail, nan i me pan lapalapala.

⁴⁹Ioanej ap japen potoan on: Main, je kilaner amen, me kaujewei tewil akan ni mar ar. Kit ari inapwiedi, pwe a jota kin ian kit idedauen ir.

⁵⁰A Iejuj kotin majani on i: Eder inapiedi, pwe me jo kin palian komail, nan a kin ian komail.

⁵¹A kadekadeo a lao anjau, me a pan peukadala, a ap kotin jaupeilan kotilan inen won Ierujalem.

⁵²A kotin poronela men kadar akan, me pan tion mo a. Irail ari kokola lele don kijin kanim en Jamaria eu, pwen rapaki waja, me a pan pweiokidi ia.