Luke 9:16-52

¹⁶Ra inew amern rtamp-rnem aker aylperr atherr-then, irrwerl-warl-athek aremel, “Akngeyay, anantherr inkwerelhem, ntwarl amern-then aker-then anthew anewantherr.” Rap rlweth-akeynew amern-then aker-then akelyarl-akely, antheynemel kwertengerl-rnemew-anem. Rernem antheynenheng-arey, amern-then aker-then akngerrerrew. Rernem antherl-apenh, akngerrel arlkweyew.

¹⁷Ingkerrel atnerteng irreyew-atety arlkwew. Rernemarl arlkwew-penh, kwertengerl-rnemel amern ampeny-ampeny akwetyerl-apenh, rtnwernem 12-warl arrernerl-apenh arriwew-atety.

¹⁸Ingwer-ingwer Jesus ament alhew, Akngey-warl-athek angkaynteyew. Kwertengerl ikwerenh-rnem ikwerel-arleng aneyarr-alhew. Rap renh-rnem ayernew, “Ilek ingwer-rnemelan ayenh ilem?”

¹⁹Rernem tyernew, “Ingwerentyelan ngenh ileyel John Baptise-emeley-angker-arrpantey. Ingwerentyel ngenh ileyel Elijah-arrpantey. Ingwerentyelan ngenh ileyel angkakert Akngey-wenh-arrpantey, awank-akerrarl anenh, ipmepenh itetherrenty-arrpantey.”

²⁰Jesus angkew, “Arrantherr-alew? Ilekarl arrantherr ayenh ileyel?” Peter-el tyernew, “Ngan artwa renh, Akngeyarl awank-akerr angkew, ra ahern nhenh-warl thweneyew.”

²¹Jesus arrngert angkew ikwer-rnem alakenh, “Innga wenh! Arrantherrap ingwerentyak iley-angenh, Akngeyelarl ayenh thwenew ahern nhenh-warl.”

²²“Ayengan Artwa Inngarl Akngey-wenh. Ingwer-ingwer apmwel-ayeth-anem atyeng aynteyenh. Arlka ayeng irrwampeyenh, ayengap apmwa awelheyenh. Akngerr atyeng-wety arlkarerreyenh; atyetyart-rnem Jew-rnem-wenh, artwa rltwernem tyaty ilkwareny-rnem-then, artwa angka Moses-wenhew akalty anthey-angker-rnem-akerr. Ingwer-rnemel ayenh atweyenh ipmewarl. Ingwa atherr-penhan ayeng angkeparl itetherreyenh ipmepenh.” Alakenh-anyem ra ilelhew kwertengerl ikwerenh-rnemew.

²³Jesus angkew akngerrew, ikwerel-arlengarl anenh-rnemew, “Ingwerenty ayenharl apenteyew, ra nthakenh ikwerenharrp-angkwarr alhey-angenh, arrangkw. Ingwer-rnemel renh irrwampenh-anthem, ayenh apententy. Ran ipmelhey-angenh, ayenh apent-aynteyew intem-anteyarl.

²⁴Ra iterreyel apek ament, mwanty iteth-antey arntarnt-arelh-aynteyew. Alakenhan apmwel-ayetharl iterreyel. Rap atnengkanerrem arrpemarl, nthakenh Akngey-itwel intem-antey aney-alpey-angenh, arrangkw. Alakenh apek ingweran iterreyel, ‘Ayeng apek ilwenty, atharl Jesus apenteyel, kel mwerrarl.’ Rap Akngey-itwel intem-antey aney-alpem.

²⁵Ingwerentyel apek ilek-ilek mwerr-angker inaynteyew ikwer. Apwert-then ra inaynteyew, amern-then inaynteyew, arnkwethen akngerr inaynteyew. Ampwal yanh-rnem-akert ra nthekwern Akngey-itwel aney-alpey-angenh, arrangkw! Ra ayenh apentey-angenh, rap ilwemarl, nthekwern Akngey-itwel aney-alpey-angenh, arrangkw.

²⁶Ayengan Artwa Inngarl Akngey-wenh. Ingwer-ingweran ayeng apey-alpeyenh irrwerl-they antyerl akngerr-akert. Anantherrap arrtyernenhey-alpeyenh itwernel-apeny, rlterrk Akngey-wenh-akertel. Arrantherr apek nyerrerrem, ayenh apentewerr angka atyenh-wety-then, ayengap arrantherr-wety nyerrerrem arrpemarl.

²⁷Ayengan arraty angkeyel arrewantherr. Ingwerenty apmer nhelarl rlengk anew-aneyel-rnem, rernem Akngey anngel areyenh. Rernem ilweyew-alenty, rernem areyenh, Akngeyarl atyetyart ilkwa aneyenh ingkerrew.”

²⁸Wik anyent-penh Jesus alhew apwert irrwerl-warl, Akngey-warl-athek angkaynteyew-anem. Rap kwertengerl-rnem irrpety atnwenhew, Peter awayenheng-atherr James-then John-then.

²⁹Jesus-arl angkenh Akngeyew, inngerran ingwer-lkwererrew, arnkwa arlter innga irrew, amparrkew-anem.

³⁰Arwapeny artwa atherr-anem ikwerel-arleng rtneyelpew, angkey-alhew ikwer, ratherranap Moses-then Elijah-then.

³¹Rernemap ingkerrenh amparrkenh. Artwa ratherr angkew Jesus-ew, “Rlengk-anteyap nga ilwey-alhem Jerusalem-itwew, Akngeyelarl awank ilew-angkwarr.”

³²Jesus-arl angkenh artwa ingwer-atherrew, Peter artwa ikwer apelty atherr-then ankwa apelp ayntenh. Rernem ankwethey akwentenhey-alpew, rernemap arew, Jesus artwa ingwer-atherr-then ingkerrenh rernem amparrkenh.

³³Artwa ingwer-atherr alpeyew-alenty rtnenh, Peter angkew, “Ingkartay! Mwerr anantherr mpwelhenh-antey! Anantherr lywenty-rnem irrpety mpwareyew; ngkwengarl anyentan, ingweran Moses-ewarl, ingweran Elijah-ewarl!” Ran iterl-arey-angenh, ranap apmwel-ayeth angkenh. Ra iterrenh, artwa atherrang anenty-arrpantey ahern nhenh-itwew alerl.

³⁴Peter angkenh-antey, kwenpayel-anem renh-rnem ingkerrenh artew, kwertengerl-rneman atererrew.

³⁵Rernemap awew, Akngey rarl angkew kwenpay-they alakenh-anyem, “Nhanyem Alerey atyenh-antey, atharl awank ilew, renh thweneyew ahern-warl. Awelhenh-arey ikwer, rarl angkeyelewan arrewantherr!”

³⁶Akngey angkenh-penh, rap ywerrerl-alhew, kwertengerl-rnemel arew, Jesus-arl ament-anem rtnenh. Rernemap iterl-arew, mwerr-angker rernem arew. Rernem ingwer-rnemew iley-angenh-antey. Ingwer-ingwerantap rernem ilerl-arrernew ingwer-rnemewan.

³⁷Ingwepenh ingwerel Jesus kwertengerl-rnem irrpety-akert atwarreynenh apwert irrwerl-they. Ingwer-rnemel arew, rernemarl atwarrenhey-alpenh, akngerr innga ikwer-rnem arnekerrew.

³⁸Artwa anyentan arlkew, “Atyetyartay! Amperrngerra alerey atyenh anyentew! Akngemang atha renh ngkweng-warl, raw mwerrerreyew?

³⁹Arrentyan aylpem ikwer-warl angkepelarreng, awey rap arlkenty iwem. Arrewelheleyam-alpem renh angkepelarreng, iwem renh ahern-warl-then. Iylkerretyan thelelhem arrakert-they. Arrenty ran antelhem ikwer-itwel intem-antey. Rap angkep apeyam-aylpem ikwer-warl, renh irrwampenh-anthem intem-antey, awey rap ilweyew irrem.

⁴⁰Atha kwertengerl ngkwenh-rnem ayernew, arrenty irrenteyew ikwer-they. Rernemap arrangkwarl, irrentey-angenharl.”

⁴¹Jesus angkew ikwer-rnemew ingkerrew, “Arrantherran atyeng awelhey-angenh arrangkw-antey! Arrantherran apmwel-ayetharl iterreyel. Ayengan arlkarewelheyel, arrenhantherrenh akalty-antheyel angkepelarreng! Ayeng nthakenh arrewantherrel-arleng aney-angenh arleng-alenty!” Rap artwa ikwer angkew, “Akngetya alerengkw ngkwenh atyeng-warl.”

⁴²Aynelikw awey renh akngetyenh, arrentyel renh ilatwew ahern-warl arrewelhelemel. Jesus-el arrenty irrentew awey ikwer-they, renhap atnwenhew-anem aynikw-warl.

⁴³Ingwer-rnemarl rtnenherrenh, rernemap apatew. Rernem angkew, “Inngangay! Akngeyel arnwarnem arawerrng-akertel!” Ingkerrenh angkerrenh-antey, Jesus nakenh. Rap angkew kwertengerl ikwerenh-rnemew,

⁴⁴“Awelhenh-arey arternp atyeng! Ayengan Artwa Inngarl Akngey-wenh. Ingwerentyel ayenh ahayiweyenh artwa apmwernem-warl, rernem ayenh atweyew ipmew-antey.”

⁴⁵Kwertengerl-rnemel nthakenh iterl-arey-angenh, rarl ilelhenh ikwer-rnem. Akngey ikwer-rnem arrngert angkew, rernem iterl-arewerr. Rernem apatenh, renh ayerneyew, angka ikwer-rnem anaynteleyew.

⁴⁶Ikwer-penh kwertengerl-rnem angkerrenh, rernemap ilterrenh alakenh, “Angwenharlap ilkwa inngan anewantherr-they?”

⁴⁷Jesus-el nthakenh renh-rnem awey-angenh. Kel ra renh-rnem iterl-arenhan, rernemarl alakenh iterrenhan. Ra ilew, ampa akely apetyeyew, rtneyew ikwerel-arleng.

⁴⁸Ra angkew kwertengerl-rnemew, “Nga ampew mwerr anem, ngap atyeng mwerr anem arrpemarl. Ngan atyeng mwerr anem, ngap Akngeyewarl mwerr anem arrpemarl. Akngey ranap ayenharl thwenew. Ngarl akely antwelhem, ngap ilkwarl Akngey-angkwarr.” Alakenh Jesus angkenh ikwer-rnem.

⁴⁹John-an angkew, “Ingkartay! Anwernantherr arew, artwa anyentel arrenty-rnem irrentenharl, itna ngkwenhel itnewemel. Anwernantherr renh iltew, anewantherr-areny-wenyarlap ran.”

⁵⁰Jesus angkew, “Arrngert angkey-angenh. Ran anewantherr tyel-angkey-angenh, ranap anewantherr-apeny.”

⁵¹Kel Jesus-el iterl-arenh, rarl Jerusalem-itwew ilweyenh, irrwerl-anem alpeyenh angkep. Ra iterrew, Jerusalem-warl alheyew-antey, rap anperl-alhew-anem.

⁵²Galilee-they ra alheyew akwerterrp-antey Samaria-ampeny-angkwarr Judea-warl. Rap angkakert-rnem thwenew arrwekel Samaria-warl, apmer ikwer-rnem alaleweyew.