Luka 2:4-22

⁴Rahapie Josefe e Dawidire ɋâric Galilaia mâreŋko Nasarete haeo juweczi iŋuc jaha Judaia mâreŋko Dawidire haefuŋ Betelehem ira rawec.

⁵Ehuc ŋokac biŋe‐ticne Maria ehec mâmâc qâreŋ‐jofaniŋte kiwechec jowame rapic.

⁶Fisirâ juhapire Maria motec roro dameŋ‐ticne maickewec.

⁷Eme mârâc motec‐ticne rorâ qoruczi foŋkerâ bulimakao otoo râeme hurâ fowec. Ŋic jaŋe tomafic fusucmambiŋte ŋeŋe fofo basarâ bulimakao ficko ferâ ŋepic hâcne.

⁸Eme hae mâreŋ ijaha ŋic tucne jaŋe ŋafe ira kecɋaŋ gieo lama jaŋere soŋaŋ ŋembiŋ.

⁹Ŋehapie Wofuŋte aŋelo moczi jaŋerao fuame Wofuŋte oŋararaczi batamaec‐jopame mâretec hâwic‐jopawec.

¹⁰Eme aŋelozi ʒiŋuc jazawec: “Ŋoŋe mi hâwic‐ŋopaoc, manaŋgopieŋ, no aŋac ʒeridâŋ bajukopac, irec fârine ŋic mâmâc sasawa fua‐ŋareocmu.

¹¹Miŋecgac Bâbâpiaŋ rune Wofuŋ Kristo hâcne, Dawidire haefuŋko fua‐ŋarekac.

¹²Eme mutâcne‐ŋarepe mananiŋ: Ŋoŋe motec geune jâmbâŋ qoruczi foŋkekicne bulimakao otoo foha ra bâfuaniŋmu.”

¹³Dâŋ iŋuc muhame izia sambâŋ momori gurune fufusuc jaha ututuŋ ŋelo âgo‐jeŋictao tumaŋnerâ ʒiŋuc muhuc Anutu muteŋkembiŋ:

¹⁴“Ʒeri mumuteŋ Anutu faic sambâŋko, mâreŋko ŋic âgo jauŋ ejarekac jaŋerao wama fuakac.”

¹⁵Aŋelo jaŋe sambâŋko risie fepie soŋaŋŋic jaŋe ʒiŋuc muhuc nazaŋ gazaŋ embiŋ: “Nâŋâc Betelehem haeo ferâ Wofuŋzi dâŋ nâzâkac irec fârine honenaŋ.”

¹⁶Iŋuc murâ bâruŋ jaha ferâ Maria â Josefe bâfuac‐jofarâ motec geune bulimakao otoo fohame honembiŋ.

¹⁷Honerâ motecte dâŋ biŋe manambiŋ i mufuambiŋ.

¹⁸Eme soŋaŋ jaŋere mickonec binaŋ manambiŋ jaŋe warecke‐fârembiŋ.

¹⁹Maria eki ine dâŋ i maŋkerâ manatâc qâtâc ehuc juwec.

²⁰Eme soŋaŋ jaŋe risierâ wiac hone manac embiŋ sâc manasurâ Anutu daŋge mumuteŋ ecnembiŋ.

²¹Jesu motec fuarâ fohame ʒoaŋ gie bapa 8 eme motec sahacnao Wofuŋte ma bahuc ʒâŋene Jesu mumbiŋ. Ʒâŋe i motec e mi fuahame aŋelozi qanaŋ mufuawec.

²²Eme Mosere sâcmutâc dâŋ fowec, i reŋkehuc Mariazi bâtâcko juku sahac herâ Josefehec motec Jerusalem haeo baferâ Wofuŋte biŋe qapic.