لُكِ 2:4-22

⁴يُسُقُ قَن نَشَ كٍلِ نَسَرّتِ، تَا نَشَن نَ فَلِلٍ بْشِ مَ، سِفَقٍ رَ بّتّلّيمُ، مَنفّ دَوُدَ بَرِدٍ نَشَن نَ يُدَيَ بْشِ مَ. يُسُقُ سِفَ نَا نّ، بَرِ مَ عَ نُ كٍلِشِ دَوُدَ بْنسْي نُن عَ شَبِلّ نَن كُي،

⁵عَ سِفَ عَ شَ سَ عَ شِلِ سّبّ، عٍ نُن مَرِيَمَ، عَ نُ بَرَ نَشَن شَ كٌتٍ دْشْ. مَرِيَمَ تّيفّشِ نَن نُ عَ رَ.

⁶عٍ نُ نَ مّننِ تّمُي نَشّ، مَرِيَمَ دِ سْتْ تّمُي نَشَ عَ لِ،

⁷عَ قَ عَ شَ دِ سِنفٍ بَرِ، دِ شّمّ. عَ نَشَ عَ مَقِلِن دُفِ كُي، عَ عَ سَ شُرُ سٍ دّفٍدٍ كُي، بَرِ مَ يِفِيَ قَنيِ مُ نُ نَ عٍ بّ.

⁸مّننِ شُرُ سٍ دّ مَدٌنيِ ندٍيٍ نُ نَ وُلَ عِ، شُرُ سٍيٍ كَنتَدٍ كْي رَ.

⁹مَرِفِ شَ مَلٍكّ ندٍ نَشَ مِنِ عٍ مَ، عٍ نَشَ مَرِفِ شَ نْرّ تٌ يَنبَ رَ عٍ رَبِلِنيِ. عٍ نَشَ فَاشُ كِ قَنيِ رَ.

¹⁰مَلٍكّ نَشَ عَ مَسٍن عٍ بّ، «وٌ نَشَ فَاشُ بَرِ مَ ﭑ قَشِ شِبَارُ قَنيِ نَن مَسٍندٍ وٌ بّ، نَشَن قِندِ مَ سّيوّ شُنفبٍ رَ حَمَ بِرِن بّ.

¹¹تٌ، وٌ رَكِسِمَ، عَلَ شَ مِشِ سُفَندِشِ، عَ بَرَ بَرِ دَوُدَ شَ تَا كُي. وٌ مَرِفِ نَن عَ رَ.

¹²وٌ عَ كٌلٌنمَ يِ تْنشُمَ نَن نَ، وٌ دِيْرّ لِمَ عَ مَقِلِنشِ دُفِ كُي، عَ مَن سَشِ شُرُ سٍ دّفٍدٍ كُي.»

¹³مَلٍكّ فّ وْيّندٍ تَن مُ عَ رَ، مَلٍكّ فَلِ نَشَ قَ بٌورٍ قّ مَ. عٍ نُ عَلَ مَتْشْقٍ، عٍ نُ عَ قَلَ،

¹⁴«مَتْشْي نَ عَلَ بّ هَن كٌورٍ مَ! بْحّسَ نَ عَدَ مَدِيٍ بّ دُنِحَ مَ، عَ هِننّشِ نَشٍيٍ رَ!»

¹⁵مَلٍكّيٍ تٌ كٍلِ عٍ شُن مَ تٍقٍ رَ كٌورٍ مَ، شُرُ سٍ دّ مَدٌنيِيٍ نَشَ عَ قَلَ عٍ بٌرٍ بّ، «وٌن شّي بّتّلّيمُ، وٌن شَ سَ يِ قٍ مَتٌ نَشَن نَبَشِ نَا، مَرِفِ بَرَ نَشَن مَسٍن وٌن بّ.»

¹⁶عٍ نَشَ سِفَ عٍ شُلُن نَ، عٍ مَرِيَمَ نُن يُسُقُ لِ، عٍ نُن دِيْرّ، عَ سَشِ شُرُ سٍ دّفٍدٍ كُي.

¹⁷عٍ تٌ نَ تٌ، عٍ نَشَ قٍ بِرِن تَفِ رَبَ، مَلٍكّ نَشَن مَسٍن عٍ بّ نَ دِ شَ قٍ رَ.

¹⁸مِشِ نَشٍيٍ شُرُ سٍ دّ مَدٌنيِيٍ شُي مّ، عٍ بِرِن نَشَ كَابَ عٍ شَ وْيّنيِ مَ.

¹⁹مَرِيَمَ قَن نَشَ يِ قٍ بِرِن نَفَتَ عَ بْحّ مَ، عَ نُ عَ حْشْ سَ عَ شْن.

²⁰شُرُ سٍ دّ مَدٌنيِيٍ نَشَ فبِلٍن عَلَ مَتْشْ رَ، عٍ نُ عَ تَنتُ قٍ بِرِن مَ عٍ بَرَ نَشٍيٍ مّ، عٍ مَن بَرَ نَشٍيٍ تٌ. عٍ عَ بِرِن لِشِ نّ عَلْ عَ مَسٍن عٍ بّ كِ نَشّ.

²¹شِ سٌلٌمَسَشَن تٌ كَمَلِ، دِيْرّ نَشَ سُننَ. عَ شِلِ نَشَ سَ عِسَ، مَلٍكّ نُ بَرَ شِلِ نَشَن مَسٍن عَ نفَ بّ بٍينُن عَ شَ تّيفّ عَ مَ.

²²مَرَ سّنِيّنيِ وَشَتِ تٌ كَمَلِ عَننَبِ مُنسَ شَ سّرِيّ كِ مَ، يُسُقُ نُن مَرِيَمَ نَشَ عِسَ شَنِن دَرِ سَلَمُ، عَ شَ مَسٍن مَرِفِ بّ،