Luk 2:4-22

⁴Lehsa mat anan Josep haqayta na in Devit ago ned teq in asenlul araq iyim in uliq Nasaret saw Galiliy-ibta hulosim in Devit ago uliq Betlehem-ub saw Judiya-ibtab tilah.

⁵Lehad in ayow Mariya waqim inaq tilahmo. Ad in Mariya inaq nanmo wastitayim an a hi waqadmo Mariya agem tiqiy. Agem tiqiyan teq in giger ginan emnan haqad uliq Betlehem-ub tilehiy.

⁶Lehim in uliq nab osad Mariya amun emgo akaman tiqiy.

⁷Iyan in ago amun aqenta matta na tiqam. Emim in tubusanib isihim bulmakau didaq neqayta adegnib eman wo tuqus. Na ezaqgo bit bunmo ban haiq tiqiyan in asanib karuw abitnibmo osiy.

⁸Ari saw nab mataw sipsip giwamuzayta na asor in uliq adek ban pesan nog osad teq in taromab gigo sipsip giwamuz yaqay.

⁹Sa Iyahta ago angelo araq in gigerab tugwahtim. Gwahtiqanmo Iyahta ahol anuwan hitiqad mataw na tigiqisih nat. Giqisih netsa in tirab yaqay.

¹⁰Rabsa angelo na gibilan, Ne hi rabiy ham. Ad ne huritiy ham. Ya gamuk araq dimun diqta on mataw bunmo gimen a bol ham. On mataw kabemmo gamuk ka huriteq teq in ginad tidimniy daqay ham.

¹¹Muran diqmo aw araq in Devit ago uliqab amun tiqam ham. Amun na ayah iyeq teq in ne gilumsiheq ta giwaqdaqta ham. In anan Krais ham. In ne gigo Iyahta ham.

¹²Ne leheq amun na kazaq ahol tuwaq daqayta ham. In tubusanib isihim bulmakau didaq neqayta adegnib eman woqim usaq ham.

¹³Ari angelo na in nazaq haqad tursamo God ago hib angelo kabemmo in agerab tugwahtiqiy. Gwahtiqim in God abin iluwad bilaqiy,

¹⁴I God anan sorid ulilibmo gwaleh bugan haqiy. Sa og kab on mataw God agem dimunta negaqta na in ginad dimniysa gigem kute nemsa osiy haqiy.

¹⁵Angelo nazaq haqadmo in mataw na gihulosad muleqim Heven-ib ta gwalehiy. Ari angelo gwalehsamo mataw sipsip giwamuzayta na an bulonim bilaqiy, I Betlehem-ub leheq nagah Iyahta anan bilamta ka i le ahol waquq haqiy.

¹⁶Haqad in hidmo tilehiy. Lehim in Mariya aduw Josep inaq ossa tigibiyiy. Ad amun bulmakau didaq neqayta adegnib ussa in ahol tuwaqiymo.

¹⁷In amun na ahol waqim teq in angelo amun anan gibilanta na ananin tutim tibilaqiy.

¹⁸Bilaqsa mataw huritiyta na bunmo in mataw sipsip giwamuzayta gigo gamuk na anan ginadnad emad gihol turuh nam.

¹⁹Teq amun anen Mariya in gamuk na huritan gamuk na bunmo in anadib tuqus bugyaq. Ussa in gamuk na anadin emad teq in anadibmo bilaqyaq, Ka yaqgo amunmo anan bilaqiyta ka in gamuk adugan ezaq diqta bilaqiy? haqyaq.

²⁰Teq mataw sipsip giwamuzayta na muleqim ta lehiy. Lehad angelo gamuk gibileniyta na teq in le nagah ahol waqiyta na bunmo ago in ginad dimniysa in God abin diq tiqiluw yaqay. Na ezaqgo angelo gibileniyta nazaqmo diq in le ahol waqiyta na ago iyan.

²¹Ari abeb kam 8 nazaq tihiqiyan teq mataw in amun ahol abatan asan tuqurotim teq in anan Yesus haqad tibiyiy. Amun anen agemab a hi gwahtiqsamo angelo anan bilaqan usta nazaqmo in tibiyiy.

²²Ari Mariya amun tiqemim in ahol udinim os. Osim tihiqiyan aw amun inaq gihol zaygo akaman tugwahtim, Moses ago marib gunun bilamta nazaq. Gwahtiqan Josep awe Mariya inaq in gigo amun ad Jerusalem-ub tilehiy, in amun Iyahta abenab emgo haqad.