Luka 2:4-22

⁴Wo rɔ, Yusufu bɔra Nasarɛti, mɛn ye Kalile mara rɔ, ka wa Jude mara rɔ. A wara Bɛtilɛhɛmu, Mansa Dawuda la so kɔnin, ka a masɔrɔn ale ye Mansa Dawuda bɔnsɔn de ri.

⁵Mariyamu wara a kɔfɛ, mɛn mamirani a bolo la. Alu fila wara ie tɔɔ sɛbɛli diya Bɛtilɛhɛmu. Wo tuma, Mariyamu kɔnɔma le tɛrɛ.

⁶Ka ie to Bɛtilɛhɛmu, Mariyamu moyi lon sera.

⁷A moyira a dencɛ fɔlɔ la. A ka faanin miniminin den ɲɛrɛnni ma ka a la kolofen na damunun kɛ fen kɔndɔ, baa alu tun ma jiya diya sɔrɔn lɔndan jiya bon na.

⁸Wo tuma, saagbɛngbɛnna doilu tɛrɛ ye Bɛtilɛhɛmu so da la. Alu tɛrɛ ye sila ie ɲana waa rɔ ye, ka ie janto ie la saa kuruilu rɔ.

⁹Su wo rɔ, Maari Alla la mɛlɛka do ka a jɛrɛ yiraka woilu la. Maari Alla nɔɔrɔ mɛlɛnda ka ie laminin, ka ie masilan kojuuya.

¹⁰Kɔni mɛlɛka ka a fɔ ie yɛ ko: «Ai kana silan, baa n nani kibaro ɲuma fɔla ai yɛ, mɛn di ai la jamana mɔɔilu bɛɛ lasewa kosɛbɛ.

¹¹Kisiba ra sɔrɔn ai yɛ bi, Mansa Dawuda la so kɔndɔ. Ale le Maari ri, Alla la Mɔɔ Ɲenematɔmɔnin kɔnin.

¹²N ye tɔɔmasere mɛn yirakala ai la: Ai ye wa den ɲɛrɛnni sɔrɔn, a mamini faanin dɔ, a lani soboilu la damunun kɛ fen kɔndɔ.»

¹³I kɔrɔkɔrɔ wo rɔ, wo yɔrɔ kelen dɔ, mɛlɛka siyaman ba bɔra ka na la mɛlɛka fɔlɔman wo kan. Alu bɛɛ ladɛnni ka Alla tando ko:

¹⁴«Gbiliya ye kɛ Alla yɛ mɛn ye sankolo rɔ. Jusu suma ye kɛ mɔɔilu yɛ duukolo kan, mɔɔ mɛnilu duman a yɛ kɔnin.»

¹⁵Mɛlɛkailu koseyi mɛn kɛni sankolo rɔ, saagbɛngbɛnnailu ka a fɔ iɲɔɔn yɛ ko: «An ye wa Bɛtilɛhɛmu. Alla ra ko mɛn lase an ma, an ye wa wo lakɔrɔsi.»

¹⁶Alu ka ikaliya ka wa Mariyamu ni Yusufu tɛrɛn. Alu ka den ɲɛrɛnni lani tɛrɛn kolofenilu la damunun kɛ fen kɔndɔ.

¹⁷Alu ka den wo yen ɲa mɛn ma, alu ka wo bɛɛ dantɛɛli kɛ mɔɔilu yɛ.

¹⁸Mɛnilu ka ie la dantɛɛli kan namɛn, woilu bɛɛ kabannakoyara.

¹⁹Kɔni Mariyamu ka wo bɛɛ to a jusu rɔ ka imiri wo ma kosɛbɛ.

²⁰Saagbɛngbɛnnailu wo ka ie kɔseyi waati mɛn na, alu bɛɛ ka Alla gbiliya ka a tando, alu ka mɛn bɛɛ lamɛn a ni alu ka mɛn bɛɛ yen, a bɛɛ kɛra ikɔ mɛlɛka ka a fɔ ie yɛ ɲa mɛn ma.

²¹Den sɔrɔn ka tele seyin bɔ tuma mɛn, alu ka a la kojii kɛ. A tɔɔ lara ko Isa, mɛlɛka ka tɔɔ mɛn fɔ Mariyamu yɛ, ka a tɛrɛn a tun ma kɔnɔ ta burun.

²²Alu sɛniya waati dafara tuma mɛn, sɛniya waati mɛn sɛbɛni Nabi Musa la sariya rɔ kɔnin, Yusufu ni Mariyamu wara den di Jerusalɛmu. Alu wara a yiraka kanma Maari Alla la,