Luka 24:1-34

¹Sonda uupicte hae fure pârâckezo ehame ŋokac jaŋe wiac âsu biaŋ bâmockembiŋ i ʒâŋeruŋko amecke rambiŋ.

²Ra fisirâ honembiŋ: Qânâ sâko e rârieme hawec aaŋ fowec.

³Eme ʒâŋeruŋ maŋko raʒirâ Wofuŋ Jesu qâŋɋâŋ‐ticne basambiŋ.

⁴Basarâ weaŋkerâ domahapie ŋic jajahec ŋaqi‐jekic bâric bâricnekicne mi maŋfuŋ‐jeŋicko fuarâ domazepirec i!

⁵Eme ŋokac jaŋe hâwic‐jopame dunduŋ domahapie ŋic jahe ʒiŋuc jazapic: “Ŋoŋe wemocte ɋârine jukac e hâmokicne jaŋerao basaŋgopieŋ?

⁶E ʒira mi fokac, e ɋârerâ faharejec, Galilaia mâreŋko juhuc dâŋ kecʒiŋuc ŋazawec i manasuniŋ:

⁷‘Mamac‐nanezi Ŋic Fâri Wâtuŋne e sâqocne bapa jaŋere meo râeme qapie hâmorâ ʒoaŋ jahec â moc eha ɋârerâ fahareocmu.’”

⁸Iŋuc mupire ŋokaŋ jaŋe dâŋ i manasuhuc

⁹ʒâŋeruŋkonec risierâ haeo fisirâ motecfâcne 11 â ŋic ŋokac gâcne dâŋ binaŋ ejarembiŋ.

¹⁰Ŋokac ʒâŋe‐jeŋic Maria Madala haeonec â Johana â Maria Jakobore neŋgoc erâ âgofâc‐jeŋic gâcne mâmâc jumbiŋ. Izi hâcne aposolo biŋedâŋ jazambiŋ.

¹¹Jazapie dâŋjeŋic manapie pacgoroŋ dâŋ eme mi mana ʒakiembiŋ.

¹²Â Petoro e ine fahare ʒâŋeruŋko gasacke rarâ okarierâ fime raʒime qoruc râpâ sawa honewec. Erâ wiac fuawec i mana warec ehuc haeo risie rawec.

¹³Eme ʒoaŋ ijaha Jesure kikefuŋfâc jaŋeraonec ŋic jajahec Emausi haeo ranicte rapic. Hae i ʒoricko mi ŋewec, Judaŋic jaŋe qâqâtâc bembeŋkeme Jerusalem haeonec rârâ ʒoaŋ otewezo ehame fisi jumbieŋ.

¹⁴Eme ŋic jahe hatao rahuc wiac fuawec irec muc manac epic.

¹⁵Mu gufuc ehuc muc manac rahapire Jesu e jahac rarâ bâfuac‐jofame mâmâc rambiŋ.

¹⁶Eme ʒâŋe‐jekic bâsâockekicnere mi hone tarapic.

¹⁷Iŋuc ehapire wio‐jacterâ muwec: “Ŋohe wemo wiacte nazaŋ gazaŋ ehuc jukopirec?” Mume jahe ʒâŋe mai‐jekic sorondoŋ eha domapic.

¹⁸Ehuc jaheraonec moc ʒâŋene Keleopa eki muwec, “Jerusalem haeo ŋic hombaŋte fisimbiŋ jaŋe dâŋ biŋe sâko hazec sâc mana‐fârehapie go mocjahazi weniŋuc erâ hazec furu jukomec.”

¹⁹Eme eki wio‐jacterâ muwec, “Wemo wiac?” Mume jahe mupic, “Wiac Jesu Nazarete haeonec ere binaŋ. E porofete sâko juhuc Anuture maio â ŋicmaio wiac tâpiri jaha mu bac ehuc juwec.

²⁰Ehame taha bapa micne â fekicnefâc‐nâŋec jaŋe hâmoocte mutaracnehuc kiarao râepie mume maripoŋko qambiŋ.

²¹Nâŋe ine ere mamanac juhuc ʒiŋuc mumbeŋ: ‘Eki hâcne Israe ŋic nâŋâc niŋgiŋkonec firuec‐nâpozejec.’ Eme qapie hâmome juhapene biac ʒoaŋ gie bapa jahec â moc ekâc.

²²Ehame miŋecgac nâŋeraonec ŋokac gâcne bu qâqânduc dâŋ nâzâmbieŋ. Jaŋe furicte ʒâŋeruŋko rarâ

²³qâŋɋâŋ‐ticne basarâ risierâ ʒiŋuc mumbieŋ: ‘Aŋelo jajahec fua‐nârehuc, Jesu ɋârerâ faharejec, iŋuc nâzâkopirec.’

²⁴Eme dâŋ i manarâ nâŋeraonec ŋic âgofâc‐nâŋec tucnezi rarâ ŋokac mumbieŋ sâc bâfuambieŋ â e jahacne ine mi honembieŋ.”

²⁵Dâŋ iŋuc muhuc âzâcnepire eki muwec: “Porofete jaŋe dâŋ mu qâreŋ embiŋ i ŋoŋe wemocte mutuc â maŋ mâmâcne juhuc mi mana ʒakieeŋgopieŋ?

²⁶Kristo e wemocko hâmoc ʒâic tâmiric juku sambâŋ tatamac‐ticnao raʒizac?”

²⁷Iŋuc murâ Mose â porofete dâŋ erao iticnehuc qâreŋkembiŋ, irec fuŋne ritu‐jacte‐fârewec.

²⁸Eme raku Emausi hae bâqiŋkembiŋ. Ehuc eki hae fotâcnerâ raocte eme

²⁹jahe sakarehuc mupic, “Ʒoaŋ biac rifireha hae ŋafezo ekacte go nâhehec juc.” Eme jahehec juocte mana‐jacteme ficko mâmâc fembiŋ.

³⁰Eme nânâ nâniŋte waha ŋerâ poroŋ rorâ jambuŋkehuc bazurâ jactewec.

³¹Ehame ʒâŋe‐jekic raruŋkeme hone tarapic. Hone tarapire izia sipuac ewec.

³²Eme jahe nazaŋ gazaŋ erâ kecʒiŋuc mupic: “Hatao dâŋ nâsâhuc mitire fuŋne ritu‐nâcteme bunâhec bâruŋkejec hâcne ine.”

³³Iŋuc murâ izia faharerâ Jerusalem haeo risie rapic. Ra fisirâ e jahacne motec 11 â âgofâc‐jeŋic gâcne tumaŋnerâ ŋehapie bâfuac‐jopapire

³⁴jaŋe biac ʒiŋuc jasambiŋ: “Wofuŋ e jâmbomac faharerâ Simoŋ fuacnejec.”