Luka 24:1-34

¹Fura oherebau uzeuze roḡaeroḡae zeꞌa ruhibiroteꞌe ahiri aseꞌeteꞌe muravaḡa hohoḡa madu idu onamiro.

²Ze feurirotene, idu ꞌueꞌeteꞌe hadiḡa boro kiune vaḡinoga horoniro.

³Ebu ze diuḡiro, rehano Zuhiꞌa Boro Iesu ahiri mene horoniro.

⁴Ze naginiꞌa ani mazao fureranateꞌe zamare ꞌadaꞌadiro. Eꞌe madaḡano vaze ꞌaheuꞌa tabara zeḡe babaḡano edaro. Zeꞌe dabua vazavazahoḡa vidaro.

⁵Ebu roḡaeroḡaeꞌa rihau rudanadu zeḡe mazao ovoe ḡuḡuriro. Rehano vaze ꞌaheuꞌa ziro, raenaꞌa, “Za nougadu ḡabone vazeḡa rune habaꞌano vaḡeꞌohe?

⁶Ani ahaoꞌe ꞌoꞌoꞌa, rehano ani bare ḡabode iḡuneha! Aniꞌa Galilea habaꞌano nagini ziroteꞌe zamaroꞌi!

⁷Aniꞌa raenaꞌa, 'Eḡe, Vaze Ubugaꞌe revonadu sauꞌa azaḡa evora riꞌiniꞌuma ebu sataurohiꞌuma, rehano mada uḡiduḡano bare ḡabode iḡuniꞌuma.'”

⁸ꞌOuge reirotene, roḡaeroḡaeꞌa Iesuꞌa reiroteꞌe ḡoeꞌa zamariro.

⁹Roḡaeroḡaeꞌa idu habaꞌanonoꞌo bare onaadu zeḡe mazao naginiꞌa fureraroteꞌe niduꞌa Iesu tahiꞌa 11 zu ane vaze nunu niduꞌa ziro.

¹⁰Idu habaꞌa onamiroteꞌe roḡaeroḡaeꞌe Magadala roḡaeḡa niḡa Maria, ꞌahogaꞌe niḡa Ioana, Iakobo viꞌa niḡa Maria ebu roḡae nunu. Zeꞌe naginiꞌa fureranateꞌe apostolo azaḡa mazao rae fureniro.

¹¹Rehano Iesu tahiꞌatahiꞌaꞌa ze ḡoereꞌe ḡiriho hariḡa radu mene mae ḡihiniro.

¹²U Petero ani iḡunadu idu habaꞌa dure onamiro. Aniꞌa ḡuḡuradu idu zamaḡa ḡianirotene, Iesu ahiri umiroteꞌe dabuaḡa daꞌo horoniro. Ebu ani naginiꞌa fureranateꞌe zamare ꞌadaꞌadeꞌenaꞌa, ne bare onamiro.

¹³Eꞌe madaḡano roḡaeroḡae ḡoere igiroteꞌe azaḡa boꞌaḡano tahiꞌa ꞌaheuꞌa Emausa neḡa ibiḡa onaminu. Eꞌe neḡaꞌe Ierusalema habaꞌanonoꞌo ani faḡaꞌe 11 kilomita.

¹⁴Anianine ibio onameꞌenaꞌa naginiꞌa fureranateꞌe ḡauḡa niduꞌa ḡoꞌane onaminu.

¹⁵Zeḡeꞌa ḡoꞌane onameꞌenogano, Iesu aneꞌa zeḡe uhiḡa aradu idaḡa onamiro.

¹⁶Zeḡe horoniro rehano, mene ederiro aꞌe Iesu, mazaḡa ze ani mene ederoga veize biriro.

¹⁷Iesuꞌa ziro, raenaꞌa, “Ḡanine onameꞌenaꞌa, nagini ḡoꞌaneꞌohe?” Ebu ze vetuḡarauꞌenaꞌa tue edaro.

¹⁸Ze boꞌaḡano vaze ꞌahoga niḡa Kuleopaꞌa naenaeniro, raenaꞌa, “Izidi Ierusalema habaꞌano naginiꞌa fureranataꞌaꞌe vaze niduꞌa edeḡa. Ḡaꞌe eꞌea radiunu rehano, ḡaꞌa daꞌo aḡuꞌahehe?”

¹⁹Iesuꞌa zinaꞌa, “Naginiꞌa fureraneha?” Zeḡeꞌa ninaꞌa, “Aꞌe Iesu, Nazareta vazeḡa hariḡa. Badiꞌa zu vaze niduꞌa zamao ani peroveta vazeḡa raha. Aniꞌe haḡaiḡa gigiꞌa haḡainu zu ḡoere gigiꞌa haraminu.

²⁰Rehano Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu vaze ibitoziniꞌeteꞌe azaḡaniꞌa Iesu manoga radu Roma gavana ꞌevorao riꞌiniro ebu satauroniro.

²¹Emeꞌe ani Isaraela azaḡa agireonoꞌo mae vaḡiziꞌuma vazeḡa rae zamariro. Ebu Izidi Iesu rudaroteꞌe madaḡanonoꞌo onao mada uḡidu maha.

²²U eme boꞌaḡano roḡaeroḡae nuꞌa zaguzagufeha. Ze oheredaꞌo idu habaꞌa onameha,

²³rehano Iesu ahiꞌa mene horoneha. Ebu ze bare onaradu, raenaꞌa, 'Aneruꞌa emeḡe mazao fureranadu Iesuꞌe bare ḡabodeha rae raha.'

²⁴Emeḡe boꞌaḡano vaze nuꞌa idu habaꞌa onamatene, roḡaeroḡaeꞌa rateꞌe teige, ze zuni Iesu ahiꞌaꞌe mene horoneha.”

²⁵Iesuꞌa ziro, raenaꞌa, “Zaꞌe mene huhuzaḡa! Peroveta azaḡaniꞌa reiroteꞌe ḡoeꞌa mene ḡarihe mae ḡihineꞌohe.

²⁶Peroveta azaḡaniꞌa raenaꞌa, 'Kerisoꞌe ꞌouge aduga meꞌuma, ebu hena ḡabodadu ane haba agaḡano diuḡiuma.'”

²⁷Iesuꞌa Buka Zaḡoḡa zamaḡano Moseꞌonoꞌo onamo peroveta azaḡaniꞌa ani moneo mirihiroteꞌe ḡoeꞌa niduꞌa faine ihoze onamiro.

²⁸Ebu ze Emausa neḡa hanitiro, rehano Iesuꞌe ize ibio onamihi reiro.

²⁹Ze Iesu radoga radu uminiro, raenaꞌa, “Ḡorava raneha zu madaꞌe hauḡeha. Eꞌanoꞌo emeḡe teite bazihi!” ꞌOugadu ani zeḡe ne diuḡiꞌ onamiro.

³⁰Ani ogomu veize zeḡe teite ehoriro. Ebu beredi madu Badiꞌa mazao kuranadu vahege ziniro.

³¹Eꞌe zamaḡano ubumazeꞌa bohatanadu 'Ahiꞌe Iesu!' rae ederiro. Rehano zeḡe ubumao ani dauḡiro.

³²Ebu anianine ḡoretitiro, raenaꞌa, “Ibio aneꞌa eme teite ḡoeratene zu Buka Zaḡoḡa huga meꞌodofeatene, zamafeꞌa matuꞌe rudaneha!”

³³Ebu tahiꞌa ꞌaheuꞌa Emausa neḡaꞌonoꞌo zogone iḡunadu Ierusalema habaꞌa bare itiro. Eꞌea Iesu tahiꞌa 11 zu zeḡe teite radiunuteꞌe vaze nu haniziro.

³⁴Ze raenaꞌa, “Hube hune Iesu ani bare ḡabodeha ebu Simona mazao fureraneha!”