San Lucas 24:1-34

¹Domingo payura tɨlawain kɨntuasmin, uspakas mamaz ashamparuzkas kamkin ɨat kit watsal piam pih saarɨt aizpa mɨlara.

²Sun ashamparuz kamkin pianarachasmin, mɨnpazha katsa uk pɨjtara kamtɨt kulkis tainkara.

³Kamkin kulta nappamtuasmin, uspane Anpat Jesústa wanmalarachi.

⁴Uspa izara aizpa minñamtuasmin, sun urain paas ampune uspa mamin kunpailta. Kwisha putchã pĩn kwarɨt.

⁵Ishkuamtu akwa, uspane pilkin wakpuj wainñara. Suasmesa paas ampune usparuza kaiznara: —¿Chima sayamtuas? Uztumikasha kamkin saiman.

⁶Usne apain tuchi. Kuhsnintɨt. Galilea sura us kaizta aizpa nɨjkultain. Ka kaiznara:

⁷“Mɨnpazha Ampu namtɨtmikasha chɨhkanintawa, kwail awa ussa piantanapa. Uspane ussa kurishta irukasa patpian piantaanazi, inapa. Kutña payura irɨttas kuhsnazi,” kizta.

⁸Suasne uspane Jesús kaizta aizpa nɨjkulara.

⁹Kamtɨt kultas kaiyarawane, uspane sun izara aizpa once ɨnintaruzakas wantuzakas kainanara.

¹⁰Magdalena suras Maríakas, Juanakas, Maríakas, Santiagowa akkuhsh, mamaz ashamparuzkas uspa izara aizpa Jesús ɨnintuza kainanara.

¹¹Jesúspa ɨnintaruz sun pit kain i minñara akwa, uspane ashampa kaizara aizpa nɨjkularachi.

¹²Suasne Pedrone usparuztas puz kit kamtɨt kulta ãĩn ɨra. Sum kirɨt kit ayukta iztuasmin, usne pĩn mamarain tarɨt izta. Yalta kailtuasmin, usne iztasparɨt, sun kirɨt akwa.

¹³Sun payuin paas kammuruzne Jerusalén pɨpuluras puzpailta. Once kilómetro ɨt kit Emaús pɨpulura piannanpain ara.

¹⁴Uspane chiwazha kirɨt aizpa kwinta kiwas ɨmtuwaiyara.

¹⁵Kwinta kiamtazasmin, uspa paas mɨmamtazasmin, Jesúsmin uspa paaskasa wanmak kit chamɨzta.

¹⁶Jesústa izpailtakas, uspa paasne uspakasa chammikasha piankaamas. Diosne uspa paasta piankamnintachi.

¹⁷Jesúsne usparuza mɨmara: —Ɨmtazasmin, ¿chi kwinta kimtuas? Us sun paasta mɨmara akwa, uspa paasne iztaspat kit kunat kit tayalpailta.

¹⁸Mazane, Cleofas muntɨtmikane, ussa mɨmara: —Wan Jerusalén pɨpulura piannattuzne an payura sun kit aizpa pian. ¿Mizama nuin sun kit aizpa pianchi?

¹⁹Usne usparuza mɨmanara: —¿Chi kirɨt? Uspane ussa sɨnkailta: —Jesúsne, Nazaret pɨpulura uztamikane, ire. Usne Diospa an wat tɨnta kainammmika tuazi. Usne akkwan iztasparɨt kal kit kit kwisha watsal pit awaruza kwinta kinara. Wan awane Dios ussa ɨninta piankamara.

²⁰Au katsa pariyaruzkas au katsa mikwaruzkas Jesústa chɨhkaara, Pilato ussa inazi kiznapa. Suasne usne ussa kurishta irukasa patpianninara.

²¹Akkwan payukima aune Jesústa tɨriznashɨ, Judío awaruza chɨhtanapa, Roma awaruz usparuza ɨninamanpa. Jesús irɨtkis, kutña payu pɨntɨt.

²²Mɨnpazha aukasa cham ashamparuzne aumɨza ishkwinñara. Uspa tɨlawain kamtɨtkin tuasmin,

²³Jesústa izarachi. Suasne uspane aumɨza kaiyat kit “ángelta iztamakpas” aumɨza kaizara. Ángelne “Jesús uzi” kizpailta.

²⁴Au izmuruzne, mamaz wanmaktuzne, ira kamtɨtkin ɨat kit sunkanain ashampa kaizara aizpa wanmalta. Uspakas ussa izarachi.

²⁵Suasne Jesúsne usparuza kaiznara: —Une wat piankamarachi. Une Dios kainammmika kaizta aizpa wat mɨarachi. Nɨjkularachi.

²⁶Chiyura nurachasmin, Cristone sun kit aizpa naiznatkin, tɨnta namna.

²⁷Suasne Jesúsne usparuza wan Dios pit kamtanara. Usne usparuza ussa Moisés pɨnkɨh parɨt aizpakas ussa wan Dios pit kainammtuz parɨt aizpakas kamtanara.

²⁸Ɨamtuasmin, uspane sun pɨpulura piannanpain. Jesúsne ñancha ɨshimtukanain kira, pɨpulura napmanpa.

²⁹Uspane ussa kwisha paikwat kit kaizpailta: —Aukasa mari. Me nashtɨmtui. Me tɨl parɨmtui, kizpailta. Suasne usne uspakasa ɨt kit uspa yalta napta.

³⁰Misharɨ uspakasa uzkane, usne pan sap kit Diosta aishtaish kizta. Pan kɨztawane, usne usparuza nailnara.

³¹Dios uspa kasu izkulnintakane, uspane ussa piankampailta. Sun urain usne usparuztas kulara. Masain kakshihtɨt.

³²Uspane usparuzpain kaizpailta: —Us aukasa miwara kwinta kimtuasmin, us aumɨza Dios pit kamtamtuasmin, aune kaijchura, ayukta, wat kultuanash.

³³Suasne sun urain kunat kit Jerusalén pɨpulura kailmɨzpailta, once ɨnintuzakas mamaztuzakas wanmalmukin wanmakna. Sun wanmakmuruzne uspa paasta kaiznara:

³⁴—Watcha. Anpatne irɨttas kuhsta. Pedrokas ussa izta.