Luka 24:1-34

¹Ɲɔɲɔn lon taminni, Lahadi sɔɔma dala jona, muso woilu ka tulu suman duman ni latikolon ta ka wa kaburu da la.

²Alu seni kaburu da la, kabakurun ba mɛn lani tɛrɛ kaburu da la ka da tuun, wo ra makurukuru ka bɔ ye.

³Wo rɔ, alu donda kaburu kɔndɔ, kɔni alu ma Maari Isa suu tɛrɛn ye.

⁴Ka alu to wo kɔndafili rɔ, alu ka cɛ fila yen, faanin gbɛ mɛlɛnmɛlɛnna tɛrɛ ye mɛnilu kan na.

⁵Musoilu silanda kojuuya, ka ie ɲakɔrɔ bɛn duu ma. Cɛ fila wo ka a fɔ ie yɛ ko: «Nfenna ai ye mɔɔ ɲenema ɲininna suuilu tɛma?

⁶A tɛ yan. A ra wuli ka bɔ saya rɔ. A ka mɛn fɔ ai yɛ Kalile mara rɔ, ai kana ɲina wo la.

⁷Wo tuma a ka a fɔ ai yɛ ko: ‹A fɛrɛ tɛ fo Mɔɔ Dencɛ ye don kojuukɛlailu bolo. Alu ri a ta ka a gbɔngbɔn jiri kan ka a faa. Tele fila a sawana, a ri lawuli ikɔ tuun.›»

⁸Wo ka musoilu hankili lajii Isa la kuma rɔ.

⁹Alu ka ibori ka wa wo ɲa bɛɛ fɔ keladenba tan ni kelen yɛ, a ni ie dɛkuru tɔilu bɛɛ.

¹⁰Mariyamu Makidalaka, ni Yahani, ni Yakuba na Mariyamu, a ni ie dafɔɲɔɔnilu le tɛrɛ, mɛnilu bɔra kaburu da la ka wa dantɛɛli kɛ keladenbailu yɛ.

¹¹Kɔni keladenbailu ma dantɛɛli wo jate. Alu ma la a la fewu.

¹²Hali wo, Piyɛri wulira ka ibori ka wa kaburu da la. A se mɛn kɛni ye, a ka imajii ka kaburu kɔndɔ mafɛnɛ. A ma foyi yen a kɔndɔ fo kansankɛ gbansan. A kɔndafilini ka ikɔseyi so kɔndɔ.

¹³Nba, wo lon kelen na, karanden fila bɔra Jerusalɛmu ka wa so do la, mɛn tɔɔ ko Emayusi. Wo so ni Jerusalɛmu tɛ ri kilo tan ni kelen ɲɔɔn bɔ.

¹⁴Ko mɛnilu kɛni, alu tɛrɛ ye barola woilu kan.

¹⁵Ka alu to barola, Isa nara ka imadon ie la. A ni ie wara iɲɔɔn fɛ.

¹⁶Alu ka Isa yen ie ɲa la, kɔni alu filiyara a ma.

¹⁷Isa ka ie maɲininka ko: «Ai tɛrɛ ye barola nfen de kan?» Alu ka ilɔ, alu fila nin nafinni ie ma.

¹⁸Mɛn tɔɔ ko Kilopasi, wo ka Isa jabi: «Ile kelen de lɔndanyala Jerusalɛmu yan mɛn i ma a lɔn ko mɛn ye taminna yan tele ɲin dɔ?»

¹⁹Isa ka ie maɲininka ko: «Ko su ɲuman de wo ri?» Alu ka a jabi: «Ko mɛn kɛra Isa Nasarɛtika la. A la kuma ni a la kɛwalilu yirakara an na ko Alla la nabiɲuma barakani le ale ri, Alla ɲana a ni mɔɔ bɛɛ ɲana.

²⁰Sarakalasela kuntiilu ni an na jamana ɲɛmɔɔilu ka a mira. Alu wara a ri Rɔmu faama cɛ ma ko a ye a faa. Wo rɔ, alu ka a gbɔngbɔn jiri kan ka a faa.

²¹An jii tɛrɛ ye a kan ko ale ri Isirayɛli mɔɔilu hɔrɔya, kɔni alu ra a faa. A faa tele sawanan de bi ri.

²²An na dɛkuru muso doilu nara kuma do fɔ an yɛ. Wo ka an kɔndafili kosɛbɛ. Alu ka a fɔ an ɲana ko alu wara kaburu da la bi sɔɔma jona,

²³kɔni alu ma a suu tɛrɛn kaburu kɔndɔ. Alu ka ikɔseyi ka a fɔ an yɛ ko alu ka mɛlɛka doilu yen, mɛnilu ka a fɔ ie ɲana ko Isa ɲenema le.

²⁴Wo le ka a kɛ, an dafɔɲɔɔn doilu bɔra ye ka wa wo lakɔrɔsi. Alu wara kaburu da la ka a bɛɛ tɛrɛn iko musoilu ka a fɔ ɲa mɛn. Kɔni alu ma Isa jɛrɛ yen.»

²⁵Isa ka ie jabi: «Ai hankilitanilu! Nabiɲumailu ka mɛnilu fɔ, ai tɛ lala woilu la jona dɛ!

²⁶Ni wo tɛ, nabiɲumailu ka a fɔ ko Alla la Mɔɔ Ɲenematɔmɔnin di tɔrɔya sɔrɔn ten, ka ban ka don a la gbiliya jɛrɛ jɛrɛ rɔ. Kuma wo ma kan ka kanbali wa?»

²⁷Wo rɔ, fen fen sɛbɛni a jɛrɛ la ko rɔ Alla la kuma rɔ, ka damira Nabi Musa la sariya rɔ haan ka na se nabiɲuma tɔilu bɛɛ la sɛbɛlilu ma, a ka wo bɛɛ kɔrɔ fɔ ie yɛ.

²⁸Alu ka so magbɛn tuma mɛn, Isa ka a jɛrɛ kɛ taminbatɔ ri.

²⁹Kɔni alu ka a madiya kosɛbɛ, ka a fɔ a yɛ ko: «I jaandi, i ye to an fɛ yan. Su kotɔ le, dibi ri don sisen.» Wo rɔ, a ni alu donda so kɔndɔ iɲɔɔn fɛ.

³⁰Damunun waati seni, alu bɛɛ ka isii damunun kanma. Isa ka buru ta ka baraka bila Alla yɛ, ka a rakadikadi ie bɛɛ tɛma.

³¹Waati kelen wo la, karanden fila bɛɛ ɲa lakara ka a lɔn ko lɔndan cɛ wo ye Isa le ri. Kɔni Isa tununda ie ma kelen di.

³²Alu fila ka iɲɔɔn maɲininka ko: «A ka Alla la kuma fɔ an yɛ sila kan tuma mɛn, an jusu ma bɔ wa?»

³³Alu fila wulira kelendi ka ikɔseyi Jerusalɛmu. Alu se mɛn kɛni ye, alu ka keladenba tan ni kelen ni karanden tɔilu ladɛnni tɛrɛn yɔrɔ kelen.

³⁴Alu bɛɛ ladɛnni ka a fɔ mɔɔ fila wo yɛ ko: «Tuɲa jɛrɛ jɛrɛ le. An Maari ra wuli ka bɔ saya rɔ. Simɔn jɛrɛ ra a yen.»