Luka 22:3-19

³Isakariota vazeḡa niḡa Iudaꞌe Iesu tahiꞌa 12 zamaḡano tahiꞌa ꞌahoga. Sataniꞌa ane zama diuḡiro.

⁴Ani Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu kuru neḡa taufeꞌeteꞌe ḡihiꞌaḡaḡihiꞌaḡa vaḡe onamiro. Ebu zeḡe ꞌevoreo Iesu riꞌiniteꞌe ibiḡa vaḡe ḡoeriro.

⁵Ze matuꞌe rudanadu Iuda mazao ḡoere tiro, ninaꞌa, “Moni ḡaniꞌuma.”

⁶Iuda ani naenaezinaꞌa, “Manoḡa!” Ebu ani vaze ḡuḡuvaḡa oꞌoꞌa zamaḡano Iesu riꞌinoga veize mada manoḡa vaḡiro.

⁷Isiti Oꞌoꞌa Berediḡa Muiḡa madaḡa ibiꞌaꞌe Iḡine Modeꞌeteꞌe Muiḡa ebu dibuꞌo mamoeḡa ubuga mauꞌeteꞌe madaḡa, eꞌe reiro.

⁸Iesu ani Petero zu Ioane tuḡuzeꞌenaꞌa, ziro. “Onamadu emeḡe oganoga veize Iḡine Modeꞌeteꞌe Muiḡa ruhibe toꞌi!”

⁹Ebu zeḡeꞌa ḡadiniro. “Ḡa uraꞌe nouma ruhibe tiꞌuma?”

¹⁰Aneꞌa naenaezinaꞌa, “Egoꞌi! Ierusalema habaꞌano diuḡine, ohoze ꞌahoganiꞌa vu ḡoḡoreḡa odoheꞌeteꞌe horoniꞌuma. Ebu ani ḡaruna hegotadu aneꞌa diuḡiꞌuma neḡa diuḡoꞌi!

¹¹Diuḡadu eꞌe ne vazeḡa ꞌahige ḡorenoꞌi, 'Ihore vazeḡaniꞌa ane tahiꞌatahiꞌa teite Iḡine Modeꞌeteꞌe Muiḡa aꞌuma neḡa zamaḡaꞌe nouꞌeꞌe rae ḡadimuꞌohe.'

¹²Ebu aniꞌa ne hitagano bazuni neḡa boro ꞌahoga ihoziꞌuma zu ruhibe teateꞌe ḡauḡa horoniꞌuma. Deꞌea ogomufe ruhibe toꞌi!”

¹³Ze iḡunadu onamiro, ebu Iesuꞌa ziroteꞌe ḡauḡa niduꞌa horoniro. ꞌOugadu Iḡine Modeꞌeteꞌe Muiḡa ruhibe tiro.

¹⁴Madaḡaniꞌa feurirotene, Iḡine Modeꞌeteꞌe Muiḡa afine, Iesu ani apostolo azaḡa teite eꞌe neḡa zamaḡano ehoriro.

¹⁵Ebu aniꞌa ziro, raenaꞌa, “E izema aduga hidogano, zae teite Iḡine Modeꞌeteꞌe Muiḡa ꞌahi anoga hubehune uratiro.

¹⁶Mazaḡa eḡeꞌa ziꞌohe, eꞌe Muiḡa ꞌahiꞌe mene bare aꞌuma onamo Badiꞌaꞌa ibitohauꞌeteꞌe madaḡano Iḡine Modeꞌeteꞌe Muiḡa huganiꞌa hubehune hudaꞌuma.”

¹⁷Ebu ani vaini vuḡa bioḡa madu Badiꞌa mazao kuranadu ziro, raenaꞌa, “ꞌAhi madu zae zuni tahitahe gagoꞌi!

¹⁸Mazaḡa eḡeꞌa ziꞌohe, eꞌe vaini vuḡa mene bare gagiꞌuma, onamo Badiꞌaꞌa ibitohauꞌeteꞌe habaꞌa madaḡaniꞌa onaiꞌuma.”

¹⁹ꞌOugadu ani beredi meiro, zu Badiꞌa mazao kuranadu vahege tahitahadu ziniro. Ebu zinaꞌa, “Beredi ꞌadiꞌe eḡe ahiri. Zae ziniꞌohe. Eḡe zamaroga radu haḡaiḡa ꞌadi haḡaoꞌi!”