Luke 22:3-19

³Ma aram me yan i ying e mo’onyan’ ngak Judas, ni yima pining Iskariot ngak, ni ir reb fa ragag nge l’agruw i gachalpen Jesus.

⁴Ma aram me pagrad Judas nge yan i non ngak e pi tolang ko prist nge ngak e pi pilungen matnagen e Tempel u rogon ni nge yagnag Jesus ngorad.

⁵Miyad felan’ mrogned ngak ni ngar pi’ed e salpiy ngak ni puluwon.

⁶Me ta’reban’ Judas ngay, ma aram mi i guy rogon e ngiyal’ nra bung rogon riy ni nge yagnag Jesus ngorad ni dabi nang e girdi’ murung’agen.

⁷Ngiyal’ ni ba’aram ni yibe madnom riy ni yibe kay e flowa ndariy e is riy, me taw nga reb e rran ni ngan li’ fapi saf ni fan ko ggan ko madnom ni Paluk’af.

⁸Me l’oeg Jesus Peter nge John ngranow nike ga’ar ngorow, “Mmarow ngam ngongliyew rogon e ggan ni ngad ked ko blayal’ ni ggan ko Paluk’af.”

⁹Miyow fith ngak ni lungurow, “U uw e gab adag ni nggu warow nggu ngongliyew rogon riy?”

¹⁰Me ga’ar, “Mu telmew! Nap’an ni bay mmarow i yan ngalan binaw ma bayi mada’ nagmew be’ nib mo’on ni be fek ba rume’ i ran. Mi gimew lek ngalan e re naun nra chuw ngay,

¹¹me lungumew ko en ntafen e re naun nem, ‘Ke ga’ar fare Tamchib, Bu uw fare senggil ni nggu wayed pi gachalpeg e ggan ko blayal’ riy ni ggan ko Paluk’af?’

¹²Ma bayi dag ngomew ba senggil ni ba ga’ ni kem’ay i fal’eg rogon ni bay ko thal nlang, mi gimew ngongliy rogon e ggan rodad riy.”

¹³Miyow yan miyow pir’eg urngin ban’en nri bod rogon ni yog Jesus ngorow, miyow ngongliy e ggan ko blayal’ riy ni ggan ko Paluk’af.

¹⁴Fa’ani taw ko fare awa, me yan i par Jesus nga tagil’ u tebel ni yad fapi apostel.

¹⁵Me ga’ar ngorad, “Kari gum’ ni bochan ni nggu un ngomed ngad ked e re ggan ko Paluk’af ney u m’on ko gafgow ni nggu tay!

¹⁶Ya nggog ngomed ni gathi bay kug way nge yan i mada’ ko ngiyal’ ni bay yib i m’ug e bin riyul’ i fan ko gin nsuwon Got.”

¹⁷Me fek Jesus fare kap, me pining e magaer riy ngak Got me ga’ar, “Mfeked e re kap ney nge bigimed me unum ba gaf e n’en ni bay riy;

¹⁸ya nggog ngomed ni gathi bay ku gu unum e wayin nge yan i mada’ ko ngiyal’ ni bay yib e gagiyeg rok Got.”

¹⁹Ma aram me fek fare flowa, me pining e magaer riy ngak Got, me t’ar nge pi’ ngorad ni be ga’ar, “Ireray dowag, ni kan pi’ ni bochmed. Um rin’ed e ren’ey ngi i pugurag ngomed.”